ماحولیات، جنگلات اور موسمیاتی تبدیلی کی وزارت
مرکزی وزیر ماحولیات نے دہلی-این سی آر میں ہوا کے معیار کے انتظام پر اعلیٰ سطحی جائزہ اجلاس کی صدارت کی
مشن موڈ میں ’ایک پیڑ ماں کے نام‘ مہم کے تحت مربوط آلودگی کنٹرول اور ہریالی کے اقدامات پر توجہ مرکوز کی گئی
Posted On:
16 SEP 2025 6:16PM by PIB Delhi
ماحولیات، جنگلات اور موسمیاتی تبدیلی کے مرکزی وزیر جناب بھوپیندر یادو نے آج نئی دہلی میں ایک اعلیٰ سطحی جائزہ اجلاس کی صدارت کی، جس میں دہلی-این سی آر خطے میں فضائی آلودگی کی روک تھام اور کنٹرول کے لیے جاری اقدامات کا جائزہ لیا گیا۔
اس اجلاس میں اہم اسٹیک ہولڈروں نے شرکت کی، جن میں کمیشن برائے ماحولیاتی معیار (سی اے کیو ایم)، دہلی این سی ٹی حکومت، ہریانہ، پنجاب اور دیگر متعلقہ ادارے شامل تھے۔ سردار منجندر سنگھ سرسا، معزز وزیر ماحولیات، دہلی این سی ٹی حکومت اور جناب بی وی آر سبرہمنیم، سی ای او نیتی آیوگ نے بھی اجلاس میں حصہ لیا۔
اجلاس کے دوران، جناب یادو نے اہم اقدامات پر پیش رفت کا جائزہ لیا، جیسے کہ آن لائن کنٹینیوس ایمیشن مانیٹرنگ سسٹم کی تنصیب اور حقیقی وقت میں نگرانی، ہوا کی آلودگی کنٹرول ڈیوائسز کی تعیناتی اور مؤثر طور پر فضلہ جمع کرنے اور تلف کرنے کے لیے ایک مربوط فضلہ انتظامی منصوبے کا نفاذ، ساتھ ہی آنے والے فصل کے موسم میں بھوسے جلانے کے ممکنہ خدشات۔
ہوا کی آلودگی کم کرنے اور سڑکوں کو صاف رکھنے کے لیے میکینائزڈ روڈ سوئیپر کے استعمال کو بڑھانے کی کوششوں پر بھی تفصیل سے بات ہوئی۔ شہری سبزہ کاری کو بڑھانے پر زور دیا گیا، خاص طور پر ’ایک پیڑ ماں کے نام‘ کے فلیگ شپ اقدام کے تحت وسیع پیمانے پر شجرکاری مہمات کے ذریعے، جو دہلی اور این سی آر میں مشن موڈ میں نافذ کی جا رہی ہیں۔ وزیر نے ہوا کی آلودگی کم کرنے کے لیے زیادہ سے زیادہ اثر کے حامل مرکزیت والے اقدامات کی تجویز دی۔ انہوں نے اہم آلودگی پیدا کرنے والی صنعتوں میں او سی ای ایم ایس اور اے پی سی ڈی کے قیام جیسے زیرِ عمل اقدامات کو تیز کرنے کی ضرورت پر زور دیا۔
جناب یادو نے ہوا کی آلودگی سے نمٹنے کے لیے تمام اداروں کے مشترکہ نقطہ نظر کی ضرورت پر زور دیا۔ انہوں نے دہلی این سی آر میں مختلف اداروں کے ذریعے ہوا کی آلودگی کو کنٹرول کرنے کے اقدامات کی نگرانی کے لیے ایک مربوط کمانڈ اور کنٹرول سینٹر کی ضرورت پر بھی زور دیا۔
وزیر نے صنعت سے اپیل کی کہ وہ ہوا کی آلودگی کے خلاف جنگ میں حصہ لیں۔ جناب یادو نے کہا کہ کوششیں تمام متعلقہ فریقوں — صنعت، شہری، اور ادارے — کے رویوں میں تبدیلی پر مرکوز ہونی چاہئیں تاکہ آلودگی کم کرنے والی سرگرمیاں سب کی جانب سے بتدریج اپنائی جائیں۔ وزیر نے شہریوں کی شمولیت کو آسان بنانے کے لیے مختلف ایپس کے انضمام پر بھی زور دیا۔
مرکزی وزیر نے تمام فریقوں، بشمول شہریوں، کے ساتھ مربوط کارروائی اور تعاون کے ذریعے خطے میں ہوا کے معیار کو بہتر بنانے کے لیے حکومت کے غیر متزلزل عزم کو دوبارہ دہرایا۔
**************
ش ح۔ ف ش ع
16-09-2025
U: 6110
(Release ID: 2167343)
Visitor Counter : 2