بھارتی بحریہ کے نئے بحری بیس، آئی این ایس اراولی کا افتتاح 12 ستمبر 2025 کو گروگرام میں چیف آف دی نیول اسٹاف ایڈمرل دنیش کے ترپاٹھی کی موجودگی میں کمیشن کیا گیا۔

شاندار کمیشننگ تقریب میں چیف آف نیول اسٹاف کو پچاس جوانوں کے دستے نے گارڈ آف آنر پیش کیا۔ یونٹ کے پہلے کمانڈنگ آفیسر کیپٹن سچن کمار سنگھ نے سنسکرت میں دعا خوانی کی، جس کے بعد کمیشننگ وارنٹ پڑھا گیا۔ محترمہ ششی ترپاٹھی، صدر این ڈبلیو ڈبلیو اے نے کمیشننگ پلاک کی نقاب کشائی کی، اس کے بعد قومی ترانے کی دھن پر بحریہ کا جھنڈا لہرایا گیا۔

اس کمیشننگ تقریب میں نائب امیر بحریہ سنجے وتسیان، وائس چیف آف نیول اسٹاف، نائب امیر بحریہ ترن سوبتی، ڈپٹی چیف آف نیول اسٹاف، دیگر سینیئر بحری افسران اور معزز مہمانوں نے بھی شرکت کی۔

اپنے خطاب میں چیف آف نیول اسٹاف نے کہا کہ آئی این ایس اراولی ایک مضبوط انتظامی اور لاجسٹک سپورٹ کی بنیاد فراہم کرتا ہے جو سہولیات کے بڑھتے ہوئے دائرے اور جدیدیت کے مطابق ہے، تاکہ بلا تعطل آپریشنوں کو یقینی بنایا جا سکے۔ انہوں نے کہا ”یہ نیا بیس نہ صرف ٹیکنالوجی کا مرکز ہوگا بلکہ تعاون کا بھی مرکز بنے گا جو ہمارے پلیٹ فارموں اور شراکت داروں کو سمندروں کے پار جوڑے گا۔ یہ ہمارے معزز وزیر اعظم کے تعاون پر مبنی وژن ’مہا ساگر‘ کی حقیقی عکاسی ہے اور یہ بھارت کے کردار کو انڈین اوشین ریجن میں ترجیحی سیکیورٹی پارٹنر کے طور پر مزید مستحکم کرے گا۔“

کمانڈنگ آفیسر اور کمیشننگ عملے کو مبارکباد دیتے ہوئے چیف آف نیول اسٹاف نے انہیں بحریہ کی بنیادی اقدار — فرض، عزت اور جرات — پر کاربند رہنے کی تلقین کی اور کہا ”جب آپ معلومات پر غلبے کے ذریعے اعلیٰ معیار کی راہ اختیار کریں تو ہمیشہ ان اقدار کو اپنا رہنما بنائیں۔“

آئی این ایس اراولی، جس کا نام مضبوط اور ثابت قدم اراولی پہاڑی سلسلے سے اخذ کیا گیا ہے، بھارتی بحریہ کے مختلف اطلاعاتی اور مواصلاتی مراکز کو سپورٹ کرے گا، جو بھارت اور بھارتی بحریہ کے کمانڈ، کنٹرول اور میری ٹائم ڈومین اویئرنیس (ایم ڈی اے) کے ڈھانچے کے لیے نہایت اہم ہیں۔

بحریہ کے اس بیس کا نعرہ ”تعاون کے ذریعے بحری سلامتی“ ہے، جو بحری یونٹ، ایم ڈی اے مراکز اور دیگر شراکت داروں کے ساتھ بلا رکاوٹ تعاون اور ہم آہنگی کی عکاسی کرتا ہے۔

بیس کی چوٹی پر مرکزی پہاڑی تصویر شامل ہے جو مضبوط اور ثابت قدم اراولی پہاڑی سلسلے کی بہترین علامت ہے، جب کہ ابھرتا ہوا سورج ابدی نگہبانی، لچک اور توانائی کی علامت ہے، نیز مواصلات اور ایم ڈی اے کے شعبے میں جدید ٹیکنالوجی کی آمد کا اشارہ بھی ہے۔

اس طرح یہ علامت اس بیس کے اس عزم کو ظاہر کرتی ہے کہ وہ بھارت کے بحری مفادات کے تحفظ کے لیے دائمی نگہبانی کو یقینی بنائے گا۔

 

 

 

                                               **************

ش ح۔ ف ش ع

12-09-2025

                                                                                                                                       U: 5953

 

(Release ID: 2166126) Visitor Counter : 2