ہندوستان بھر میں کروڑوں کسان خریف کی کھیتی کے لیے بارش پر انحصار کرتے ہیں جو ان کی آمدنی اور معاش کا بنیادی ذریعہ ہے۔ اگر کسانوں کو مانسون کے بارے میں پیشگی پیشین گوئی موصول ہوتی ہے، تو اس سے ان کو بہتر فیصلہ کرنے میں مدد مل سکتی ہے کہ کیا، کتنا اور کب بونا ہے۔ مصنوعی ذہانت (AI) کے ذریعے موسم کی پیشین گوئی میں انقلاب کی بدولت اب یہ ممکن ہے۔

زراعت اور کسانوں کی فلاح و بہبود کی وزارت (ایم او اے ایف ڈبلیو) کسانوں کے لیے مصنوعی ذہانت (AI) کی طاقت کو بروئے کار لا رہی ہے۔ ایک نئی عوامی پہل کے تحت، ایم او اے ایف ڈبلیو نے اس سال 13 ریاستوں میں تقریباً 3.8 کروڑ کسانوں کو ایس ایم ایس (m-Kisan) کے ذریعے AI پر مبنی مانسون کی پیشین گوئیاں بھیجی ہیں۔ یہ پیشین گوئی پہلے سے کہیں زیادہ جلدی دستیاب تھی، بارش سے چار ہفتے قبل تک۔ AI پر مبنی ماڈلوں نے یہ ممکن بنایا کہ کسانوں کی ضروریات کے مطابق خصوصی پیشین گوئیاں تیار کی جائیں، جو ان کے خریف کے زرعی فیصلوں کی منصوبہ بندی کے لیے ایک اہم ذریعہ ثابت ہوئیں۔ یہ اپنی نوعیت کی پہلی ہدفی ترسیل ہے، جس نے ایم او اے ایف ڈبلیو کو دنیا میں AI پر مبنی موسم کی پیشین گوئی براہ راست کسانوں کے فائدے کے لیے استعمال کرنے میں ایک رہنما کے طور پر نمایاں کیا ہے۔

8 ستمبر کو کرشی بھون میں منعقدہ پروگرام جائزہ اجلاس میں ایڈیشنل سکریٹری ڈاکٹر پرمود کمار مہردا اور جوائنٹ سکریٹری جناب سنجے کمار اگروال نے نوبیل انعام یافتہ اور یونیورسٹی آف شکاگو کے پروفیسر مائیکل کریمر سے وزارت کی اس انقلابی پہل اور پروگرام کے توسیعی منصوبے پر تبادلہ خیال کیا۔ ایڈیشنل سکریٹری ڈاکٹر مہردا نے کہا: ”یہ پروگرام AI پر مبنی موسم کی پیشین گوئی میں ہونے والے انقلاب کو بروئے کار لا کر مسلسل بارشوں کی آمد کی پیش گوئی کرتا ہے، جس سے کسان بااعتماد طریقے سے زرعی سرگرمیوں کی منصوبہ بندی کر سکتے ہیں اور خطرات کا بہتر انتظام کر سکتے ہیں۔ ہم آئندہ برسوں میں اس کوشش کو مزید بہتر بنانے کے لیے پرعزم ہیں۔“

اس سال مانسون جلدی آیا لیکن شمال کی طرف بڑھنے میں ایک رکاوٹ آگئی، جس کے باعث موسم کے درمیان 20 دن تک بارشیں رک گئیں۔ زراعت اور کسانوں کی فلاح و بہبود کی وزارت (ایم او اے ایف ڈبلیو) کی جانب سے تقسیم کی گئی AI پر مبنی پیشین گوئیوں نے اس رکاوٹ کو درست طور پر شناخت کیا۔ حکومت نے کسانوں کو ہر ہفتے تازہ ترین معلومات فراہم کیں یہاں تک کہ ان کے علاقے میں مسلسل بارشیں شروع ہو گئیں۔ جوائنٹ سکریٹری شری سنجے کمار اگروال نے کہا: ”جیسے جیسے ماحولیاتی تبدیلی موسم کی غیر یقینی کیفیت کو بڑھا رہی ہے، پیشین گوئیاں کسانوں کو موافقت میں مدد دینے کے لیے ایک مؤثر ذریعہ ہیں۔“

 

موسم کی پیشین گوئی میں مصنوعی ذہانت کا انقلاب

2022 سے، مصنوعی ذہانت (AI) کی قیادت میں ایک انقلاب نے موسم کی پیشین گوئی کے علم کو تبدیل کر دیا ہے، جس سے کئی جگہوں پر زیادہ درست پیشین گوئیاں ممکن ہو سکیں۔ ان ماڈلوں کو صارفین کی ضروریات کے مطابق ترتیب دیا جا سکتا ہے اور یہ پیچیدہ مظاہر، جیسے کہ ہندوستانی مون سون، ہفتوں پہلے پیشین گوئی کرنے کی ہماری صلاحیت کو بڑھا رہے ہیں۔ زراعت اور کسانوں کی فلاح و بہبود کی وزارت (ایم او اے ایف ڈبلیو) نے کروڑوں کسانوں کے فائدے کے لیے اس انقلاب کو اپنانے میں ایک بڑا قدم اٹھایا ہے۔

وہ پیشین گوئیاں جو ایم او اے ایف ڈبلیو استعمال کر رہا ہے، دو آزاد ماڈلوں کے امتزاج پر مبنی ہیں جو ہیں گوگل کا نیورل GCM اور ECMWF کا آرٹیفیشل انٹیلیجنس فورکاسٹنگ سسٹم (AIFS)۔ سخت جائزوں میں، یہ ماڈل دیگر دستیاب پیشین گوئیوں کے مقابلے میں کسانوں کے لیے مقامی طور پر مون سون کے آغاز کی پیشین گوئی میں واضح برتری دکھاتے ہیں۔

پروفیسر رمیش چند، رکن نیتی آیوگ نے اس بات پر زور دیا کہ کسانوں کی ضروریات کو مدنظر رکھ کر موسمی معلومات فراہم کرنا بہت ضروری ہے۔ ”یہ پہل بہت قیمتی ہے کیونکہ یہ خاص طور پر کسانوں کی ضروریات پر مرکوز ہے، آسان فہم زبان میں موزوں موسمی پیشگوئیاں فراہم کرتی ہے اور انہیں باخبر زرعی فیصلے کرنے میں مدد دیتی ہے۔“

وزارت نے ڈیولپمنٹ انوویشن لیب - انڈیا اور پریسیژن ڈیولپمنٹ کی ٹیموں کے ساتھ مل کر براہ راست کسانوں کے ساتھ کام کیا تاکہ اس بات کو یقینی بنایا جا سکے کہ پیغامات کو سمجھا جائے اور عملی طور پر استعمال کیا جا سکے۔

نوبل انعام یافتہ مائیکل کریمر نے کہا، ”یہ وزارت زراعت کی بہت بڑی کامیابی ہے، جو لاکھوں کسانوں کو فائدہ پہنچا رہی ہے اور بھارت کو کسانوں کی ضروریات کو پورا کرنے کے لیے جدید ترین ٹیکنالوجی کے استعمال میں آگے لے جا رہی ہے۔ وزارت کا پروگرام AI کے دور میں لوگوں کو مرکز میں رکھنے کا نمونہ ہے۔“

********

ش ح۔ ف ش ع

U: 5947

(Release ID: 2166114) Visitor Counter : 2