کوئلہ اور کانکنیکے مرکزی وزیر مملکت جناب ستیش چندر دوبے نے آج دھنباد میں بی سی سی ایل ہیڈکوارٹر میں نظر ثانی شدہ جھریا ماسٹر پلان پر ایک اعلیٰ سطحی جائزہ میٹنگ کی صدارت کی۔میٹنگ میں ڈپٹی کمشنر، دھنباد جناب آدتیہ رنجن ،سی ایم ڈی، بی سی سی ایل، سمیرن دتہ،بی سی سی ایل، وزارت کوئلہ، اور ضلعی انتظامیہ اور جے آر ڈی اے کے نمائندگان نے شرکت کی۔ وزیر نے بی سی سی ایل کے سنٹرل ہسپتال جگ جیون نگر میں نئے تعمیر شدہ آئی سی یو وارڈ اور اسٹیل گیٹ، دھنباد میں ملٹی اسکل ڈیولپمنٹ انسٹی ٹیوٹ کا بھی افتتاح کیا۔

 

جائزہ اجلاس کی صدارت کرتے ہوئے جناب ستیش چندر دوبے نے نظر ثانی شدہ جھریا ماسٹر پلان کا گہرائی سے جائزہ لیا۔ انہوں نےبیلگاریہ ٹاؤن شپ کا بھی معائنہ کیا اور اسٹیک ہولڈرز سے بات چیت کی۔

اپنے خطاب میں،جناب دوبے نے اس بات پر زور دیا کہ کوئلہ صنعت بھارت کی توانائی کی حفاظت میں ریڑھ کی ہڈی کی حیثیت رکھتی ہے۔ وزیر نے کہا کہ حکومت نہ صرف کوئلے کی پیداوار بڑھانے بلکہ بحالی اور سماجی ترقی کے کاموں کو تیز کرنے کے لیے بھی پرعزم ہے۔ انہوں نے روشنی ڈالی کہ جھریا ماسٹر پلان اوربیلگایہ ٹاؤن شپ جیسے منصوبے تاریخی اقدامات ہیں جن کا مقصد بے گھر خاندانوں کو محفوظ اور باوقار زندگی فراہم کرنا ہے۔ وزیر نے یہ بھی کہا کہ ہنر مندی کے فروغ کے اداروں اور صحت کی دیکھ بھال کی خدمات کو مزید مضبوط بنانے سے مقامی نوجوانوں اور ملازمین کو بااختیار بنایا جائے گا اور وہ بہتر معیار زندگی کو یقینی بناتے ہوئے انہیں خود انحصار بنائیں گے۔

 

ڈائریکٹر (ٹیکنیکل آپریشنز)، جناب سنجے کمار سنگھ نے نظر ثانی شدہ جھریا ماسٹر پلان کے تحت تازہ ترین پیشرفت کے بارے میں ایک تفصیلی پریزنٹیشن پیش کی، جس میں بحالی، ہنر مندی کے فروغ کے پروگراموں، اور خالی شدہ زمین کی دوبارہ تعمیر سے متعلق اہم اشارے پر روشنی ڈالی۔ ڈپٹی کمشنر، دھنباد،جناب آدتیہ رنجن نے بیلگار یہ ٹاؤن شپ کے لیے مکمل کیے گئے کاموں اور مستقبل کے منصوبوں کا بھی جائزہ پیش کیا۔

 

وزیر نے تمام اشاریوں کا جائزہ لیا اور اس بات پر زور دیا کہ بحالی تب ہی کامیاب سمجھی جائے گی جب تمام بنیادی شہری سہولیات سڑکیں، ٹرانسپورٹیشن، ہسپتال، اسکول اور پولیس سٹیشن ٹاؤن شپس میں وقت پر دستیاب ہوں۔ انہوں نے بی سی سی ایل، جے آر ڈی اے اور تمام متعلقہ ایجنسیوں کو ہدایت دی کہ وہ نظر ثانی شدہ جھریا ماسٹر پلان کے مقاصد کو مقررہ وقت کے اندر پوری لگن کے ساتھ پورا کریں۔

 

جائزہ میٹنگ کے بعد،جناب دوبے نے اسٹیل گیٹ پر نو تعمیر شدہ ملٹی اسکل ڈیولپمنٹ انسٹی ٹیوٹ کا افتتاح کیا۔ اس موقع پر، انہوں نے بی سی سی ایل کی سی ایس آر فنڈڈ اسکیم کے تحت فائدہ اٹھانے والوں میں پانچ ای رکشوں کی چابیاں بھی تقسیم کیں، جو جے آر ڈی اے کے تعاون سے لاگو کی گئی تھی، جس کا مقصدبیلگاریہیہ ٹاؤن شپ میں نقل و حرکت کو بہتر بنانا تھا۔ اس اسکیم کے تحت مستحقین میں 50 ای رکشے تقسیم کیے جائیں گے۔ شری دوبے نے 30 طلباء کو سرٹیفکیٹ بھی دیئے جنہوں نے ملٹی اسکل ڈیولپمنٹ انسٹی ٹیوٹ بیلگاریہ میں ملٹی اسکل ٹیکنیشن ٹریڈ ٹریننگ کامیابی سے مکمل کی۔

جناب دوبے نے بعد میں بی سی سی ایل اور ضلع انتظامیہ کے سینئر عہدیداروں کے ساتھ بیلگاریہٹاؤن شپ کا معائنہ کیا۔ انہوں نے دوبارہ آباد ہونے والے خاندانوں سے بات چیت کی، دستیاب سہولیات کا جائزہ لیا، اور حکام کو معیار زندگی کو بہتر بنانے کے لیے تمام بنیادی سہولیات کی بروقت فراہمی کو یقینی بنانے کی ہدایت کی۔

 

اس کے بعد، مرکزی اسپتال، جگ جیون نگر میں، وزیر نے 16 بستروں والے سرجیکل آئی سی یو وارڈ کا افتتاح کیا۔ وزیر نے احاطے کا بھی معائنہ کیا اور ڈاکٹروں اور نرسنگ عملے سے بات چیت کی۔ وزیر نے اس اقدام کو کان کنی کے علاقوں میں ملازمین اور ان کے خاندانوں کی صحت اور بہبود کے تحفظ کے لیے ایک اہم قدم قرار دیا۔

***

(ش ح۔اص)

UR No 5377

(Release ID: 2161376)