ماہی گیری ، مویشی پروری اور ڈیری کی وزارت کے مرکزی وزیر مملکت جناب جارج کورین نے 19 اگست 2025 کو لوک سبھا میں ایک سوال کے تحریری جواب میں بتایا کہ حکومت ہند کا محکمہ ماہی گیری ، ہندوستان سے سمندری مصنوعات سمیت کچھ اشیاء  کی درآمد پر امریکہ کی طرف سے کیے جانے والے تجارتی اقدامات سے واقف ہے ، جن میں صفائی ستھرائی کی تعمیل اور پائیداری کے تقاضے شامل ہیں ۔  ان  اقدامات کا اطلاق متعدد تجارتی شراکت داروں پر ہوتا ہے  اور یہ صرف ہندوستان کے لیے مخصوص نہیں ہیں ۔  آندھرا پردیش سمیت ہندوستانی سمندری غذاؤں کی برآمدات پر مجموعی اثرات کا تعین مصنوعات کی تفریق ، طلب کی شرطیں ، معیار کی سطح  اور برآمد کنندگان و  درآمد کنندگان کے درمیان معاہدے کے بندو بست جیسے عوامل کے مجموعے سے ہوتا ہے ۔

حکومت سمندری غذاؤں  کے برآمد کنندگان ، صنعتی تنظیموں،  کاروباریوں اور ریاستی ماہی گیری کے محکموں کی مشاورت سے ماہی گیروں ، سمندری غذاؤں کے پروسیس کنندگان اور برآمد کنندگان کی فلاح و بہبود کو بدستور ترجیح دیتی ہے ۔  پردھان منتری متسیہ سمپدا یوجنا (پی ایم ایم ایس وائی) اور فشریز اینڈ ایکواکلچر انفراسٹرکچر ڈیولپمنٹ فنڈ (ایف آئی ڈی ایف) کے تحت حکومت ماہی گیری کے بنیادی ڈھانچے کے قیام اور مضبوطی میں مدد کر رہی ہے، جس میں ماہی گیری کی بندرگاہوں اور فش لینڈنگ سینٹرز کی اپ گریڈیشن ، مچھلی پکڑنے کے مابعدکے بنیادی ڈھانچے ، کولڈ چین اور پروسیسنگ کی جدید سہولیات ، ری سرکولیٹری ایکواکلچر سسٹم (آر اے ایس) اور بائیو فلوک جیسی جدید ٹیکنالوجیز کو اپنانا ، معیار کی جانچ  اور تشخیص کی لیبارٹریز ، برآمد کے لئے  تیار انواع کو فروغ دینا وغیرہ شامل ہیں ۔

میرین پروڈکٹس ایکسپورٹ ڈیولپمنٹ اتھارٹی (ایم پی ای ڈی اے) برآمد کنندگان کے رجسٹریشن ، کوالٹی کامعیار طے کرنے ، درآمد کنندگان کے ساتھ رابطہ ، صلاحیت سازی کے پروگرام ، اور تجارتی میلوں ، نمائشوں اور خریدار- فروخت کنندہ کی ملاقاتوں میں شرکت کے ذریعے سمندری غذاؤں  کی برآمدات کو فروغ دیتی ہے ۔

امریکی مارکیٹ سمیت مختلف برآمدی منڈیوں میں ہندوستانی سمندری غذاؤں کی پائیدار  اور بلاتعطل فراہمی کو یقینی بنانے کے لیے ، حکومت میرین میمل اسٹاک اسسمنٹ پروجیکٹ نافذ کر رہی ہے اور پی ایم ایم ایس وائی کے تحت شرم ٹرالرز میں ٹرٹل ایکسکلوڈر ڈیوائسز (ٹی ای ڈی) کی تنصیب میں مدد کر رہی ہے ۔  پی ایم ایم ایس وائی کے تحت ماہی گیروں کی روزی روٹی کو محفوظ بنانے کے لیے سمندری کاشت ، مصنوعی چٹانوں کی تنصیب ، اور حیاتیاتی تنوع کے تحفظ کے دیگر اقدامات کی حمایت بھی کی جاتی ہے ۔  ان کوششوں کا مقصد سمندری انواع اور بازاروں کے  تنوع کے ساتھ برآمداتی رسائی کو برقرار رکھنا ، ذریعہ معاش کا تحفظ کرنا اور ہندوستان کے سمندری شعبے کی طویل مدتی مسابقت کو یقینی بنانا ہے ۔

۔۔۔۔۔۔۔۔۔۔۔۔

(ش ح – م ش ع۔ ق ر)

U. No.4887

(Release ID: 2157982)