സാങ്കേതികവിദ്യയുടെ ഉപയോഗവും പൗരന്മാരുടെ 'ജീവിതം സുഗമമാക്കലും' പ്രോത്സാഹിപ്പിക്കുകയെന്ന പ്രധാനമന്ത്രി ശ്രീ നരേന്ദ്ര മോദിയുടെ വീക്ഷണത്തിന് അനുസൃതമായി, 2025 ഓഗസ്റ്റ് 15 മുതൽ രാജ്യത്തുടനീളമുള്ള ദേശീയപാതകളിലും എക്സ്പ്രസ്സ് വേകളിലുമായി ഏകദേശം 1,150 ടോൾ പ്ലാസകളിൽ 'ഫാസ്റ്റ് ടാഗ് വാർഷിക പാസ്' സൗകര്യം എൻ എച്ച് എ ഐ വിജയകരമായി നടപ്പിലാക്കി.

ദേശീയപാത ഉപയോക്താക്കളിൽ നിന്ന് വാർഷിക പാസിന് മികച്ച പ്രതികരണമാണ് ലഭിച്ചത്. നടപ്പിൽ വരുത്തിയ ആദ്യ ദിവസം വൈകുന്നേരം 7 മണി വരെ ഏകദേശം 1.4 ലക്ഷം ഉപയോക്താക്കൾ വാർഷിക പാസ് വാങ്ങുകയും പ്രവർത്തനക്ഷമമാക്കുകയും ചെയ്തു. ഏകദേശം 1.39 ലക്ഷം ഇടപാടുകൾ ടോൾ പ്ലാസകളിൽ രേഖപ്പെടുത്തി. ഏകദേശം 20,000 മുതൽ 25,000 വരെ ഉപയോക്താക്കൾ ഒരേസമയം രാജ്മാർഗ് യാത്ര ആപ്പ് ഉപയോഗിക്കുന്നു. കൂടാതെ, വാർഷിക പാസുള്ള ഉപയോക്താക്കൾക്ക് ടോൾ നിരക്ക് ഈടാക്കിയിട്ടില്ലെന്ന് അറിയിച്ച് എസ്എംഎസ് സന്ദേശങ്ങൾ ലഭിക്കുന്നു. 

പാസ് ഉപയോക്താക്കൾക്ക് സുഗമമായ യാത്രാനുഭവം ഉറപ്പാക്കുന്നതിനായി ഓരോ ടോൾ പ്ലാസയിലും എൻ എച്ച് എ ഐ ഉദ്യോഗസ്ഥരെയും നോഡൽ ഓഫീസർമാരെയും നിയമിച്ചിട്ടുണ്ട്. പാസ് ഉപയോക്താക്കളുടെ സംശയങ്ങൾ എൻ എച്ച് എ ഐ വിവിധ മാർഗങ്ങളിലൂടെ പരിഹരിക്കുന്നു. കൂടാതെ, പാസ് ഉപയോക്താക്കളുടെ പരാതികൾ പരിഹരിക്കുന്നതിനായി, 100-ലധികം എക്സിക്യൂട്ടീവുകളെ ഉൾപ്പെടുത്തി 1033 എന്ന ദേശീയപാത ഹെൽപ്പ് ലൈൻ കൂടുതൽ ശക്തിപ്പെടുത്തിയിട്ടുണ്ട്.

ദേശീയപാത ഉപയോക്താക്കൾക്ക് സുഗമവും ചെലവ് കുറഞ്ഞതുമായ  യാത്രയ്ക്കായി ഒരു വർഷത്തെ കാലയളവിലേക്കോ അല്ലെങ്കിൽ 200 ടോൾ പ്ലാസ ക്രോസിംഗുകൾക്കോ ആയി ഒറ്റത്തവണ 3000 രൂപ നിരക്കിൽ  
ഫാസ്റ്റ് ടാഗ് വാർഷിക പാസ് പ്രയോജനപ്പെടുത്താവുന്നതാണ്. ഇത് ഫാസ്റ്റ് ടാഗ് ഇടയ്ക്കിടെ റീചാർജ് ചെയ്യേണ്ടതിന്റെ ആവശ്യകത ഇല്ലാതാക്കുന്നു. സാധുവായ ഫാസ്റ്റ് ടാഗ് ഉള്ള എല്ലാ വാണിജ്യേതര വാഹനങ്ങൾക്കും ഫാസ്റ്റ് ടാഗ് വാർഷിക പാസ് ഉപയോഗിക്കാനാവും. രാജ്മാർഗ് യാത്ര ആപ്പ് അല്ലെങ്കിൽ എൻ എച്ച് എ ഐ വെബ്‌സൈറ്റ് വഴി ഒറ്റത്തവണ ഫീസ് അടച്ചതിന് ശേഷം രണ്ട് മണിക്കൂറിനുള്ളിൽ പാസ്സ് പ്രവർത്തനക്ഷമമാകും.

ഏകദേശം 8 കോടിയിലധികം ഉപയോക്താക്കളുമായി 98 ശതമാനത്തോളം പേർ ഉപയോഗിക്കുന്ന ഫാസ്റ്റ് ടാഗ് രാജ്യത്തെ ഇലക്ട്രോണിക് ടോൾ പിരിവ് സംവിധാനത്തിൽ വിപ്ലവകരമായ മാറ്റം സൃഷ്ടിച്ചിട്ടുണ്ട്. വാർഷിക പാസ് സൗകര്യം ഏർപ്പെടുത്തുന്നത് ഫാസ്ടാഗ് ഉപയോക്തൃ അനുഭവം മെച്ചപ്പെടുത്തുക മാത്രമല്ല, ദേശീയപാതകളിലും എക്‌സ്പ്രസ് വേകളിലുമുള്ള യാത്രകൾ കൂടുതൽ ലാഭകരവും സുഗമവുമാക്കുകയും ചെയ്യും.

***********************