آبزرور ریسرچ فاؤنڈیشن کی طرف سے 3 سے 12 اگست 2025 تک نیپال کی مختلف سیاسی جماعتوں کی نمائندگی کرنے والے نیپالی نوجوان رہنماؤں کے 12-10 اراکین کے وفد کے دورے کا اہتمام کیا جا رہا ہے۔ نئی دہلی، پنے اور ممبئی میں طے شدہ اس دورے کا مقصد سیاسی اور نوجوان سطح پر مصروفیت کو مزید مضبوط کرنا ہے۔

اس دورے کے ایک حصے کے طور پر، وزارت برائے امور خارجہ ، حکومت ہند نے، نوجوانوں کے امور اور کھیل کی وزارت ، حکومت ہند اور آبزرور ریسرچ فاؤنڈیشن  کے ساتھ مل کر 5 اگست 2025 کو بھاسکر کانفرنس ہال، سشما سوراج بھون، نئی دہلی میں ینگ لیڈرز کی گول میز کانفرنس کا اہتمام کیا۔ گول میز کی صدارت نوجوانوں کے امور اور کھیلوں کے مرکزی وزیر ڈاکٹر منسکھ منڈاویہ نے کی۔ اس موقع پر ہندوستان کے نوجوان ارکان پارلیمنٹ نے نیپالی نوجوان لیڈروں کے وفد سے بات چیت کی۔

گول میزکانفرنس کا موضوع ‘بھارت نیپال دو طرفہ تعلقات میں نوجوانوں کی آمدورفت اور کھیلوں کا رول’تھا۔ کانفرنس نے دونوں ممالک کے ابھرتے ہوئے سیاسی رہنماؤں کے درمیان بات چیت کے لیے ایک متحرک پلیٹ فارم فراہم کیا۔ اس مذاکرے میں باہمی افہام و تفہیم کو فروغ دینے اور خطے میں نوجوانوں کو درپیش مشترکہ چیلنجوں سے نمٹنے کے لیے باہمی تعاون کے مواقع پیدا کرنے پر توجہ مرکوز کی گئی۔

ڈاکٹر منسکھ مانڈویا نے اپنی تقریر میں ہندوستان-نیپال تعلقات کے قدیم ثقافتی رشتوں پر روشنی ڈالی۔ انہوں نے کہا کہ ہندوستان اور نیپال کے درمیان صدیوں پرانے تہذیبی، ثقافتی اور روحانی رشتوں پر مبنی ایک منفرد رشتہ ہے، جو تاریخ، جغرافیہ اور عوام سے عوام کے رشتوں سےجڑے ہوئے ہیں۔ اس پائیدار شراکت داری کو باہمی احترام اور مشترکہ ورثے، علاقائی تعاون اور نوجوانوں کی قیادت میں پیش رفت کے ذریعے مزید مضبوط کیا جانا چاہیے۔ انہوں نے کہا کہ ہندوستان اور نیپال دونوں میں نوجوانوں کی نمایاں آبادی ہے اور یہ ڈیموگرافک ڈیویڈنڈ ہماری مشترکہ خوشحالی اور علاقائی ترقی کی کلید ہے۔

ڈاکٹر منسکھ مانڈویا نے وزیر اعظم کی دور اندیش قیادت پر زور دیا اور کہا کہ ان کی قیادت میں ہندوستان نے 2047 تک ایک ترقی یافتہ ملک بننے کے لیے ایک پرجوش سفر یعنی ترقی یافتہ ہندوستان @ 2047 کا آغاز کیا ہے، ۔ یہ تبدیلی صرف اقتصادی ترقی سے متعلق نہیں ہے۔ یہ ایک ایسا ماحولیاتی نظام بنانے کے بارے میں ہے جہاں ہمارے نوجوان ترقی کر سکیں، اختراع کر سکیں اور اہم کردار ادا کر سکیں۔ حکومت ہند اس مشن میں سب سے آگے رہی ہے۔ حکومت کھیلو انڈیا، فٹ انڈیا اور سنڈے آن سائیکل جیسے جامع پروگراموں کو نافذ کر رہی ہے۔

ہماری حکومت سماجی طور پر ذمہ دار نوجوانوں کو قائدانہ خصوصیات کے ساتھ پروان چڑھاتی ہے۔ اسپورٹس مین شپ کے جذبے کو فروغ دینے سے نوجوانوں میں جوش اور خدمت کا جذبہ بھی پیدا ہوتا ہے۔ انہوں نے حکومت ہند کے ذریعہ شروع کردہ یکسر تبدیلی کے ڈیجیٹل یوتھ انگیجمنٹ پلیٹ فارم ‘مائی بھارت’ کے بارے میں بھی بات کی۔ 1.80 کروڑ سے زیادہ رجسٹریشن کے ساتھ مائی بھارت لاکھوں نوجوان ہندوستانیوں کو سیکھنے اور قوم کی تعمیر کے مواقع سے جوڑتا ہے۔ یہ نوجوانوں کی امنگوں کو قومی ترقی کے اہداف سے ہم آہنگ کرتا ہے اور انہیں ہندوستان کی ترقی کی کہانی میں فعال شراکت دار بننے کا اختیار دیتا ہے۔

اس کے علاوہ گول میز میں ہندوستان اور نیپال کے درمیان نوجوانوں کے تعلقات کو مضبوط بنانے کے اقدامات پر بھی تبادلہ خیال کیا گیا۔ بات چیت میں نوجوانوں کے تبادلے، علم کے تبادلے، کھیلوں کی ترقی اور نوجوانوں پر مرکوز پروگراموں میں صنفی شمولیت میں تعاون کو بحال کرنا بھی شامل تھا۔ نیپالی نوجوان رہنماؤں کے وفد نے دونوں ممالک کے روایتی کھیلوں جیسے کھو کھو، کشتی اور کبڈی کو بحال کرنے کے لیے ثقافتی تعاون پر بھی زور دیا۔ اس کا مقصد علاقائی کھیلوں کو عالمی شہرت تک پہنچانا ہے۔

نیپال کے نوجوان لیڈروں کے وفد کا جاری دورہ ہندوستان اور نیپال کے مشترکہ وابستگی کی نشاندہی کرتا ہے تاکہ جامع ترقی اور ترقی کے لیے اپنے نوجوانوں کی توانائی اور صلاحیت کو بروئے کار لاتے ہوئے کثیر جہتی شراکت داری کو بڑھایا جائے۔ گول میز کانفرنس میں نیپال کے نوجوان لیڈروں کو ہندوستان میں ہونے والی تبدیلی کی پیش رفت کے بارے میں بھی آگاہ کیا گیا۔ کانفرنس کے دوران، یہ تسلیم کیا گیا کہ ہندوستان اور نیپال دونوں میں نوجوانوں کی بڑی آبادی ہے اور انہیں ایک جیسے چیلنجوں کا سامنا ہے۔ کانفرنس نے بہترین طریقوں اور تجربات کو شیئر کرنے کے لیے ایک پلیٹ فارم فراہم کیا۔

اس طرح کے باہمی تعاون کے اقدامات کی بنیاد 25 نومبر 2014 کو نیپال کی حکومت اور حکومت ہند کے درمیان کھٹمنڈو میں دستخط شدہ نوجوانوں کے امور کے لیے تعاون پر مفاہمت کی یادداشت کے ذریعے رکھی گئی تھی۔

اس مفاہمت نامے کی دفعات کے تحت ہندوستان اور نیپال کے درمیان مختلف بین الاقوامی یوتھ ایکسچینج پروگرام(آئی وائی ای پی)  کامیابی کے ساتھ منعقد کئے گئے ہیں، جو نوجوانوں کی شرکت کے تئیں دونوں ممالک کی مسلسل وابستگی کو اجاگر کرتے ہیں۔

*****

ش ح۔ ک ا۔ ع د

U-No. 4263

 

(Release ID: 2153478)