কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে নতুন দিল্লীত দুদিনীয়া অষ্টম ৰাষ্ট্ৰীয় সুৰক্ষা ৰণনীতি সন্মিলন – ২০২৫ উদ্বোধন কৰে।

এই সন্মিলনখন হাইব্ৰিড, ফিজিকেল আৰু ভাৰ্চুৱেল, ফৰ্মেটত অনুষ্ঠিত কৰা হয়। দেশৰ বিভিন্ন প্ৰান্তৰ পৰা প্ৰায় ৮০০ বিষয়াই ইয়াত অংশগ্ৰহণ কৰে আৰু ৰাষ্ট্ৰীয় সুৰক্ষা সম্পৰ্কীয় বিভিন্ন বিষয়ত গভীৰ আলোচনাত মিলিত হয়। দিল্লীত অনুষ্ঠিত সন্মিলনত কেন্দ্ৰীয় গৃহ সচিব, উপ-ৰাষ্ট্ৰীয় সুৰক্ষা উপদেষ্টা, আৰু কেন্দ্ৰীয় সশস্ত্ৰ আৰক্ষী বাহিনী (চিএপিএফ) তথা চিপিঅ’সমূহৰ মুৰব্বীকে ধৰি জ্যেষ্ঠ বিষয়াসকলে অংশগ্ৰহণ কৰে। ৰাজ্য/কেন্দ্ৰীয় শাসিত প্ৰদেশসমূহৰ আৰক্ষী সঞ্চালক প্ৰধানসকল, অত্যাধুনিক পৰ্যায়ৰ যুৱ আৰক্ষী বিষয়া আৰু বিশেষীকৃত ক্ষেত্ৰসমূহৰ ডমেইন বিশেষজ্ঞসকলে নিজ নিজ ৰাজ্যৰ ৰাজধানীৰ পৰা ভাৰ্চুৱেল পদ্ধতিত এই সন্মিলনত অংশগ্ৰহণ কৰে।

সন্মিলন উদ্বোধনৰ পূৰ্বে কেন্দ্ৰীয় গৃহমন্ত্ৰী শ্ৰী অমিত শ্বাহে শ্বহীদ স্তম্ভত পুষ্পাঞ্জলি অৰ্পণ কৰি ৰাষ্ট্ৰৰ সুৰক্ষা আৰু অখণ্ডতাৰ বাবে প্ৰাণ আহুতি দিয়া চোৰাংচোৱা ব্যুৰোৰ বীৰ কৰ্মীসকলক শ্ৰদ্ধাঞ্জলি জনায়।

সন্মিলনৰ প্ৰথম দিনা, ৰাষ্ট্ৰ-বিৰোধী বহিঃ শক্তি আৰু সিবিলাকৰ দেশীয় যোগাযোগ, মাদক দ্ৰব্যৰ ব্যৱসায়ৰ লগত জড়িত হোৱাকে ধৰি ইয়াৰ ভূমিকাৰ বিষয়ে আলোচনা কৰা হয়। এনক্ৰিপ্ট কৰা যোগাযোগ এপ আৰু অন্যান্য শেহতীয়া প্ৰযুক্তিৰ অবৈধ ব্যৱহাৰৰ ফলত সৃষ্টি হোৱা প্ৰত্যাহ্বান, ভিৰ ব্যৱস্থাপনাৰ বাবে প্ৰযুক্তিৰ ব্যৱহাৰ আৰু জনবসতিহীন দ্বীপসমূহৰ সুৰক্ষাৰ ওপৰতো গুৰুত্ব আৰোপ কৰা হয়। সন্মিলনৰ সময়ত সন্ত্ৰাসবাদীক বিত্তীয় সাহায্য প্ৰদানৰ সৈতে জড়িত বিষয়সমূহো আলোচনা কৰা হয়।

কেন্দ্ৰীয় গৃহমন্ত্ৰীয়ে কেন্দ্ৰীয় আৰু ৰাজ্যিক আইন প্ৰয়োগকাৰী সংস্থাসমূহৰ উন্নত আন্তঃসংস্থা সমন্বয়েৰে সন্ত্ৰাসবাদী কাৰ্যকলাপ আৰু চোৰাং ব্যৱসায়ৰ সৈতে জড়িত পলাতকসকলক ঘূৰাই অনাৰ বাবে বিশেষ ব্যৱস্থা গ্ৰহণ কৰিবলৈ নিৰ্দেশ দিয়ে। লগতে, সন্ত্ৰাসবাদী আৰু অপৰাধীৰ মাজত দেশৰ ভিতৰত চলি থকা নেক্সাছৰ ঘৰুৱা ন’ডসমূহ ভাঙি পেলোৱাৰ বাবে গ্ৰহণ কৰা পদ্ধতিটো পুনৰ মূল্যায়ন কৰা উচিত। কেন্দ্ৰীয় গৃহ মন্ত্ৰালয়ক সকলো অংশীদাৰৰ সহযোগত এক মঞ্চ স্থাপন কৰিবলৈ আৰু সন্ত্ৰাসবাদী নেটৱৰ্কে ব্যৱহাৰ কৰা এনক্ৰিপ্ট কৰা যোগাযোগৰ সৈতে মোকাবিলা কৰাৰ সমাধান বিচাৰিবলৈ নিৰ্দেশ দিয়া হয়। সন্ত্ৰাসবাদীক বিত্তীয় সাহায্য প্ৰদানৰ পদ্ধতিসমূহ পৰ্যালোচনা কৰাৰ সময়ত সংস্থাসমূহক বিত্তীয় অনিয়মৰ বিশ্লেষণৰ জৰিয়তে সন্ত্ৰাসবাদী মডিউলসমূহ উন্মোচন কৰিবলৈ নিৰ্দেশ দিয়া হয়। লগতে গৃহ মন্ত্ৰালয়ক, আৰক্ষী সংগঠনসমূহে যাতে কেৱল থলুৱা প্ৰযুক্তিহে ব্যৱহাৰ কৰে তাৰ প্ৰতি লক্ষ্য ৰাখিবলৈ কোৱা হয়।

সন্মিলনৰ দ্বিতীয় দিনা, অসামৰিক বিমান পৰিবহণ আৰু বন্দৰ নিৰাপত্তা, সন্ত্ৰাসবাদ-বিৰোধী, বাওঁপন্থী উগ্ৰবাদ আৰু মাদক দ্ৰব্য সৰবৰাহৰ বিৰুদ্ধে যুঁজ দিয়াৰ ব্যৱস্থাৰ বিষয়ে আলোচনা কৰা হ’ব।

ডিজিএছপি/আইজিএছপি সন্মিলন- ২০১৬ৰ সময়ত প্ৰধানমন্ত্ৰী শ্ৰী নৰেন্দ্ৰ মোদী জীয়ে তৃণমূল পৰ্যায়ত বিষয় বিশেষজ্ঞসকলৰ সহযোগত কাম কৰা অত্যাধুনিক পৰ্যায়ৰ বিষয়াসকলৰ গভীৰ অভিজ্ঞতা ব্যৱহাৰ কৰি দেশৰ প্ৰধান ৰাষ্ট্ৰীয় নিৰাপত্তা প্ৰত্যাহ্বানসমূহৰ সৈতে মোকাবিলা কৰাৰ উপায় উদ্ভাৱনৰ উদ্দেশ্যে প্ৰতি বছৰে ৰাষ্ট্ৰীয় সুৰক্ষা ৰণনীতি সন্মিলন অনুষ্ঠিত কৰিবলৈ নিৰ্দেশ দিছিল। প্ৰধানমন্ত্ৰীৰ নিৰ্দেশ অনুসৰি, এই সন্মিলন ২০২১ চনৰ পৰা হাইব্ৰিড ফৰ্মেটত আয়োজন কৰি থকা হৈছে যাতে ইয়াত অধিক সংখ্যক বিষয়াই অংশগ্ৰহণ কৰিব পাৰে।

**********

RK/VV/HS/PR/PS

(Release ID: 2149001)