ફિટ ઇન્ડિયા સન્ડે ઓન સાયકલની 32મી આવૃત્તિ ફિટનેસની ભવ્ય ઉજવણી અને માદક પદાર્થોના દુરૂપયોગ સામે મજબૂત સંદેશ સાથે સમાપ્ત થઈ. આ પ્રસંગે, કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ વારાણસીમાં બનારસ હિન્દુ યુનિવર્સિટી (BHU) કેમ્પસમાં 3000થી વધુ લોકો સાથે સાયકલ ચલાવી હતી.

ડૉ. મનસુખ માંડવિયાએ દેશના યુવાનોને ડ્રગ્સના દુરૂપયોગથી દૂર રાખવાના મહત્વ પર ભાર મૂક્યો અને BHU કેમ્પસમાં એકઠા થયેલા વિશાળ મેળાવડાને સક્રિય જીવનશૈલી અપનાવવા માટે પ્રોત્સાહિત કરતા કહ્યું: "સ્વસ્થ શરીર સ્વસ્થ મનનું નિર્માણ કરી શકે છે અને સ્વસ્થ મન રાષ્ટ્રને વિકસિત ભારત તરફ આગળ ધપાવી શકે છે."

રાષ્ટ્રવ્યાપી સાયકલિંગ પહેલની આ ખાસ આવૃત્તિ સેન્ટ્રલ બોર્ડ ઓફ સેકન્ડરી એજ્યુકેશન (CBSE), કેન્દ્રીય વિદ્યાલય સંગઠન, કાઉન્સિલ ફોર ધ ઇન્ડિયન સ્કૂલ સર્ટિફિકેટ એક્ઝામિનેશન (CISCE), DAV કોલેજ મેનેજમેન્ટ કમિટી, નવોદય વિદ્યાલય સમિતિ અને બાલ ભારતી પબ્લિક સ્કૂલ સહિત અનેક શૈક્ષણિક સંસ્થાઓના સહયોગથી યોજવામાં આવી હતી.

ડૉ. માંડવિયાએ કહ્યું, “સન્ડે ઓન સાયકલ એક જન આંદોલનમાં ફેરવાઈ ગયું છે. આજે, ઉપખંડમાં 6000થી વધુ સ્થળોએ તમામ શૈક્ષણિક સંસ્થાઓએ વિકાસ ભારત માટે નશા-મુક્ત યુવા અભિયાનમાં ભાગ લીધો હતો. યુવાનોમાં ડ્રગ્સના વ્યસનને દૂર કરીને જ આપણે આપણા પ્રધાનમંત્રી શ્રી નરેન્દ્ર મોદીજીના વિકસિત ભારતનું સ્વપ્ન પૂર્ણ કરી શકીએ છીએ. આ પહેલ દ્વારા, સરકારનો ઉદ્દેશ્ય એ છે કે દેશના યુવાનો ફિટ અને સ્વસ્થ રહે અને રાષ્ટ્રની પ્રગતિમાં મહત્વપૂર્ણ ભૂમિકા ભજવે.”

ડૉ. માંડવિયા સાથે  કેન્દ્રીય યુવા બાબતો અને રમતગમત રાજ્ય મંત્રી શ્રીમતી રક્ષા નિખિલ ખડસે, ઉત્તર પ્રદેશના ખેલ મંત્રી શ્રી ગિરીશ ચંદ્ર યાદવ, વારાણસી ઉત્તરના ધારાસભ્ય શ્રી રવિન્દ્ર જયસ્વાલ, પિન્દ્રા વારાણસીના ધારાસભ્ય શ્રી અવધેશ સિંહ , વારાણસી કેન્ટ.ના ધારાસભ્ય શ્રી સૌરવ શ્રીવાસ્તવ, એમએલસી શ્રી ધર્મેન્દ્ર સિંહ, એમએલસી શ્રી હંસરાજ, વારાણસીના વિભાગીય કમિશનર શ્રી એસ. રાજલિંગમ અને SAI નેતાજી સુભાષ પ્રાદેશિક કેન્દ્ર, લખનૌના પ્રાદેશિક નિર્દેશક શ્રી આત્મા પ્રકાશ ઉપસ્થિત રહ્યા હતા.

સાયકલ સવારો બનારસ હિન્દુ યુનિવર્સિટી કેમ્પસના લીલાછમ અને શાંત વાતાવરણમાંથી પસાર થયા, સર સુંદરલાલ હોસ્પિટલ, માલવિયા ભવન, બિરલા હોસ્ટેલ, IIT ચૌરાહા, વિશ્વનાથ મંદિર જેવા પ્રતિષ્ઠિત સ્થળોમાંથી પસાર થયા અને તેમના પ્રારંભિક બિંદુ, એમ્ફીથિયેટર ગ્રાઉન્ડ પર પાછા પહોંચ્યા. મોટી સંખ્યામાં લોકોએ યોગ, ધ્યાન અને ઝુમ્બા સત્રોમાં પણ ભાગ લીધો, જેના કારણે આ કાર્યક્રમ ફિટનેસનો ભવ્ય ઉજવણી બન્યો.

રક્ષા ખડસેએ બાદમાં પત્રકારોને જણાવ્યું હતું કે, "આપણા કેન્દ્રીય મંત્રી ડૉ. મનસુખ માંડવિયાના માર્ગદર્શન હેઠળ, દેશભરમાં ફિટ ઇન્ડિયા સન્ડે ઓન સાયકલનું આયોજન કરવામાં આવી રહ્યું છે. આ પહેલ માટે અમને નાગરિકો તરફથી ખૂબ જ સારો પ્રતિસાદ મળી રહ્યો છે. આજે અમે BHU કેમ્પસમાં સાયકલ ચલાવવાનું આયોજન કર્યું હતું અને મને એ કહેતા ખૂબ આનંદ થાય છે કે અહીં મોટી સંખ્યામાં લોકોએ અમારી સાથે સાયકલ ચલાવી હતી. યુવાનો વ્યસનના નુકસાનને સમજે છે. ક્યાંક ને ક્યાંક આપણે શરૂઆત કરવાની જરૂર છે અને સંદેશ સ્પષ્ટ છે કે ફક્ત એક સ્વસ્થ યુવા જ સમૃદ્ધ રાષ્ટ્રનું નિર્માણ કરી શકે છે." આ અઠવાડિયે ફિટ ઇન્ડિયા સન્ડે ઓન સાયકલના દિલ્હી સંસ્કરણમાં ઉત્સાહપૂર્વક હાજરી જોવા મળી હતી, જેમાં રાષ્ટ્રીય રાજધાની ક્ષેત્રની 300થી વધુ શાળાઓના 1000થી વધુ શાળાના વિદ્યાર્થીઓ રાષ્ટ્રીય સાયકલ ચળવળમાં જોડાયા હતા. ભારતના આંતરરાષ્ટ્રીય સાયકલ સવારો એસો અલ્બેન, મયુરી લ્યુટ અને સુશીકલા અગાશે યુવા સહભાગીઓને પ્રોત્સાહિત કરવા માટે હાજર રહ્યા હતા.

"એક સાયકલિસ્ટ હોવાને કારણે મને ખૂબ આનંદ મળે છે. હું તાજેતરમાં મારા વતન આંદામાન વેકેશન માટે ગઈ હતી અને ત્યાં પણ ફિટ ઇન્ડિયા સન્ડે ઓન સાયકલ કાર્યક્રમ યોજાઈ રહ્યો છે તે જોયું. લોકો આ ઇવેન્ટ્સને ઉચ્ચ સ્તરે લઈ જઈ રહ્યા છે અને મને વધુને વધુ ભારતીયો ફિટનેસમાં સામેલ થતા જોઈને આનંદ થાય છે," 2022 એશિયન સાયકલિંગ ચેમ્પિયનશિપમાં બ્રોન્ઝ મેડલ વિજેતા એસોએ જણાવ્યું હતું.

રાહગિરી ફાઉન્ડેશનના સહયોગથી આયોજિત આ કાર્યક્રમમાં યોગ, ઝુમ્બા, દોરડા કૂદ, બેડમિન્ટન તેમજ શાળાકીય રમતોનો ઝોન સામેલ હતો જેમાં સાપ અને સીડી, કેરમ, ચેસ, મિની ગોલ્ફ અને લુડો જેવી મનોરંજક પ્રવૃત્તિઓનો સમાવેશ થતો હતો.

'ફિટ ઇન્ડિયા સન્ડે ઓન સાયકલ'નું આયોજન યુવા બાબતો અને રમતગમત મંત્રાલય દ્વારા સાયકલિંગ ફેડરેશન ઓફ ઇન્ડિયા (CFI), ડૉ. શિખા ગુપ્તાના નેતૃત્વ હેઠળની રોપ સ્કિપિંગ ટીમ, રાહગિરી ફાઉન્ડેશન, માય બાઇક્સ અને માય ભારત સાથે મળીને કરવામાં આવે છે. આ સાયકલિંગ ઇવેન્ટ તમામ રાજ્ય અને કેન્દ્રશાસિત પ્રદેશોની રાજધાનીઓ તેમજ SAI પ્રાદેશિક કેન્દ્રો, રાષ્ટ્રીય શ્રેષ્ઠતા કેન્દ્રો (NCOEs), SAI તાલીમ કેન્દ્રો (STCs), ખેલો ઇન્ડિયા રાજ્ય શ્રેષ્ઠતા કેન્દ્રો (KISCEs) અને ખેલો ઇન્ડિયા કેન્દ્રો (KICs) પર વિવિધ વય જૂથોમાં એકસાથે યોજવામાં આવે છે.

AP/NP/GP/JD