କେନ୍ଦ୍ର ନୂତନ ଓ ଅକ୍ଷୟ ଶକ୍ତି ମନ୍ତ୍ରଣାଳୟର ସଚିବ ଶ୍ରୀ ସନ୍ତୋଷ ଷଡ଼ଙ୍ଗୀ ଆଜି ଓଡ଼ିଶାର ମୁଖ୍ୟ ଶାସନ ସଚିବ ମନୋଜ ଆହୁଜା ଏବଂ ଅନ୍ୟ ବରିଷ୍ଠ ଅଧିକାରୀଙ୍କ ସହ ଏକ ଗୁରୁତ୍ବପୂର୍ଣ୍ଣ ବୈଠକରେ ଆଲୋଚନା କରିଛନ୍ତି। ଏହି ବୈଠକରେ ଭାରତ ସରକାରଙ୍କର ଦୁଇଟି ପ୍ରମୁଖ ଯୋଜନା - ଜାତୀୟ ସବୁଜ ହାଇଡ୍ରୋଜେନ ମିଶନ ଏବଂ ‘ପିଏମ ସୂର୍ଯ୍ୟଘର: ମୁଫତ ବିଜଲି’ ଯୋଜନା ବିଷୟରେ ଆଲୋଚନା ହୋଇଥିଲା।

ଭାରତର ସବୁଜ ହାଇଡ୍ରୋଜେନ କ୍ଷେତ୍ରରେ ପରିବର୍ତ୍ତନର ନେତୃତ୍ୱ ନେବା ପାଇଁ ଓଡ଼ିଶା ଦୃଢ଼ ସ୍ଥିତିରେ ଅଛି ବୋଲି ମୁଖ୍ୟ ଶାସନ ସଚିବ ଶ୍ରୀ ଆହୁଜା ଜୋର ଦେଇ କହିଥିଲେ। ଜଳ ଉପଲବ୍ଧତା, ବୃହତ ପରିମାଣର ଅକ୍ଷୟ ଶକ୍ତିର ସମନ୍ୱୟ ଏବଂ ସକ୍ଷମ ଭିତ୍ତିଭୂମି ବିକାଶ ଭଳି ପ୍ରମୁଖ ଆହ୍ବାନଗୁଡ଼ିକୁ ସେ ସ୍ବୀକାର କରିଥିଲେ। ମୁଖ୍ୟ ସଚିବ କହିଥିଲେ, ରାଜ୍ୟର ରଣନୀତିକ ଉପକୂଳବର୍ତ୍ତୀ ସ୍ଥିତି, ଦୃଢ଼ ଶିଳ୍ପ ଇକୋସିଷ୍ଟମ ଏବଂ ସକ୍ରିୟ ନୀତିଗତ ଢାଞ୍ଚା ଓଡ଼ିଶାକୁ ସବୁଜ ହାଇଡ୍ରୋଜେନର ବିଶ୍ୱ ରପ୍ତାନିକାରୀ ହେବା ପାଇଁ ଅନୁକୂଳ ପରିସ୍ଥିତି ସୃଷ୍ଟି କରିଛି।

ନୂତନ ଓ ଅକ୍ଷୟ ଶକ୍ତି ମନ୍ତ୍ରଣାଳୟ ସଚିବ କହିଥିଲେ, ଭାରତର ସବୁଜ ହାଇଡ୍ରୋଜେନ କ୍ଷେତ୍ରକୁ ବ୍ୟାପକ ଭାବେ ବୃଦ୍ଧି କରିବା ଲାଗି ଓଡ଼ିଶା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବାକୁ ଦୃଢ଼ ସ୍ଥିତିରେ ରହିଛି। ରାଜ୍ୟରେ ସବୁଜ ଆମୋନିଆ/ସବୁଜ ମିଥାନଲ ଭଳି ସବୁଜ ହାଇଡ୍ରୋଜେନ ଉପାଦାନର ଉତ୍ପାଦନ ପାଇଁ ଘରୋଇ ନିବେଶକଙ୍କ ମଧ୍ୟରେ ଯଥେଷ୍ଟ ଆଗ୍ରହ ସୃଷ୍ଟି ହୋଇଛି। ବିଶେଷକରି ପାରାଦୀପ ଏବଂ ଗୋପାଳପୁର ଭଳି ପ୍ରମୁଖ ବନ୍ଦର ନିକଟରେ ଏଥିପାଇଁ ଅପାର ସମ୍ଭାବନା ରହିଛି।

ଏହି ବୈଠକରେ ଓଡ଼ିଶା ସରକାର, ପ୍ରମୁଖ କେନ୍ଦ୍ରୀୟ ମନ୍ତ୍ରଣାଳୟ ଏବଂ ପ୍ରମୁଖ ସବୁଜ ହାଇଡ୍ରୋଜେନ୍ ଡେଭଲପରମାନଙ୍କର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ। ଅଧିକ ପରିମାଣର ସବୁଜ ହାଇଡ୍ରୋଜେନ୍/ ସବୁଜ ଆମୋନିଆ ପ୍ରକଳ୍ପର ବିକାଶରେ ଗୁରୁତ୍ୱପୂର୍ଣ୍ଣ ଆହ୍ବାନଗୁଡ଼ିକ ଉପରେ ବିଚାରବିମର୍ଶ କରାଯାଇଥିଲା। ବିଶେଷକରି ଗୋପାଳପୁରର ଏସଇଜେଡ ଠାରେ ଏଥିପାଇଁ ରହିଥିବା ସମ୍ଭାବନାକୁ ନେଇ ଆଲୋଚନା ହୋଇଥିଲା।

ଏହି ପ୍ରୟାସଗୁଡ଼ିକ ଦ୍ରୁତ ଗତିରେ ବଢ଼ୁଥିବା ଭାରତର ସବୁଜ ହାଇଡ୍ରୋଜେନ୍ ଇକୋସିଷ୍ଟମ ଲାଗି ବ୍ୟାପକ ରୋଡମ୍ୟାପ୍ ପ୍ରସ୍ତୁତ କରିବା ପାଇଁ ପଥ ପ୍ରଶସ୍ତ କରିବ।

ଓଡ଼ିଶା ସରକାର ଧାର୍ଯ୍ୟ ସମୟସୀମା ମଧ୍ୟରେ ସବୁଜ ହାଇଡ୍ରୋଜେନ୍ ଉପାଦାନର ଉତ୍ପାଦନ ଓ ରପ୍ତାନି ପାଇଁ ଏକ ସହଯୋଗୀ ଇକୋସିଷ୍ଟମ ଏବଂ ପସନ୍ଦଯୋଗ୍ୟ ନିବେଶ ଗନ୍ତବ୍ୟସ୍ଥଳ ବିକାଶ ପାଇଁ ପ୍ରତିବଦ୍ଧତାକୁ ଦୋହରାଇଛନ୍ତି।

‘ପ୍ରଧାନମନ୍ତ୍ରୀ ସୂର୍ଯ୍ୟ ଘର: ମୁଫତ ବିଜଲି ଯୋଜନା’ ହେଉଛି ଭାରତ ସରକାରଙ୍କର ଏକ ପ୍ରମୁଖ କାର୍ଯ୍ୟକ୍ରମ। ଏହାର ଲକ୍ଷ୍ୟ ହେଉଛି, ସାରା ଦେଶରେ ଛାତ ଉପରେ ସୌରଶକ୍ତି ୟୁନିଟ ସ୍ଥାପନକୁ ପ୍ରୋତ୍ସାହିତ କରିବା। ନୂତନ ଏବଂ ଅକ୍ଷୟ ଶକ୍ତି ମନ୍ତ୍ରଣାଳୟର ସଚିବ ଓଡ଼ିଶାରେ ଏହାର ଅଗ୍ରଗତିକୁ ନେଇ ମୁଖ୍ୟ ସଚିବଙ୍କ ସହିତ ସମୀକ୍ଷା କରିଥିଲେ। ସମୀକ୍ଷା ପରେ, ରାଜ୍ୟ ସାରା ଛାତ ଉପରେ ସୌରଶକ୍ତି ପ୍ଲାଣ୍ଟ ସ୍ଥାପନକୁ ତ୍ୱରାନ୍ୱିତ କରିବା ପାଇଁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଥିଲା। ମୁଖ୍ୟ ଶାସନ ସଚିବ ନିୟମିତ ଏସଏଲବିସି ବୈଠକ ଆୟୋଜନ କରିବା, ବିକ୍ରେତା ଓ ବ୍ୟାଙ୍କରମାନଙ୍କ ସହିତ ଜଡିତ ହେବା ଏବଂ କାର୍ଯ୍ୟକାରିତାକୁ ସହଜ କରିବା ପାଇଁ ତୁରନ୍ତ ଋଣ ମଞ୍ଜୁର ଓ ବଣ୍ଟନ ନିଶ୍ଚିତ କରିବା ଉପରେ ଗୁରୁତ୍ୱାରୋପ କରିଥିଲେ। ୧ କିଲୋଓ୍ବାଟରୁ କମ୍ କ୍ଷମତା ସ୍ଥାପନ କରୁଥିବା ନିମ୍ନ ଆୟକାରୀ ପରିବାରଗୁଡ଼ିକ ପ୍ରତି ଏକ କେନ୍ଦ୍ରିତ ଆଭିମୁଖ୍ୟ ସହିତ ୟୁଟିଲିଟି-ଲେଡ-ଏଗ୍ରୀଗେସନ (ୟୁଏଲଏ) ମଡେଲ କାର୍ଯ୍ୟକାରୀ କରିବାକୁ ମଧ୍ୟ ପରାମର୍ଶ ଦେଇଥିଲେ।

 

ମନ୍ତ୍ରଣାଳୟ ପିଏମ କୁସୁମ ଅଧୀନରେ କୃଷି କ୍ଷେତ୍ରରେ ସୌର ଶକ୍ତିର ଉପଯୋଗ ବୃଦ୍ଧି କରିବା ପାଇଁ ଅନ୍ୟ ରାଜ୍ୟଗୁଡ଼ିକ ଦ୍ୱାରା ଗ୍ରହଣ କରାଯାଇଥିବା ସର୍ବୋତ୍ତମ ଅଭ୍ୟାସଗୁଡ଼ିକ ଉପସ୍ଥାପନ କରିଥିଲା। ଏଗୁଡ଼ିକୁ ଧ୍ୟାନ ଦେଇ, ମୁଖ୍ୟ ଶାସନ ସଚିବ ରାଜ୍ୟ ନୋଡାଲ ଏଜେନ୍ସିକୁ ରାଜ୍ୟରେ ଫିଡର ସ୍ତରରେ ସୌର ଶକ୍ତି ବିକାଶ କାର୍ଯ୍ୟକୁ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଥିଲେ। ଏହା ଦ୍ୱାରା ଚାଷୀ ସମାଜକୁ ସ୍ୱଚ୍ଛ ଶକ୍ତିର ଲାଭ ମିଳିବ।

********

PS/Swadhin

(Release ID: 2144120)