نئی اور قابل تجدید توانائی کی وزارت (ایم این آر ای) کے سیکریٹری جناب سنتوش کمار سارنگی نے چیف سیکریٹری اڈیشہ جناب منوج آہوجا اور ریاست اڈیشہ کے دیگر سینئر افسران کے ساتھ ایک اجلاس منعقد کیا۔ اس اجلاس میں حکومتِ ہند کے دو اہم فلیگ شپ پروگراموں ، نیشنل گرین ہائیڈروجن مشن (این جی ایچ ایم) اور پی ایم سوریہ گھر: مفت بجلی یوجنا  (پی ایم ایس جی: ایم بی وائی) پر تبادلہ خیال کیا گیا۔

چیف سیکریٹری نے زور دے کر کہا کہ اڈیشہ بھارت کی گرین ہائیڈروجن منتقلی کی قیادت کرنے کے لیے ایک مضبوط پوزیشن میں ہے۔ اگرچہ انہوں نے پانی کی دستیابی، بڑی سطح پر قابل تجدید توانائی کے انضمام، اور ضروری انفراسٹرکچر کی ترقی جیسے اہم چیلنجز کو تسلیم کیا، تاہم انہوں نے کہا کہ ریاست کا ساحلی محلِ وقوع، مضبوط صنعتی ماحولیاتی نظام، اور فعال پالیسی فریم ورک ایسی سازگار صورتحال فراہم کرتے ہیں جو اڈیشہ کو گرین ہائیڈروجن کے مشتقات کی عالمی برآمد کے مرکز کے طور پر ابھرنے میں مدد دے سکتے ہیں۔سیکریٹری، وزارتِ نئی و قابل تجدید توانائی (ایم این آر ای) نے اس بات پر روشنی ڈالی کہ اڈیشہ بھارت میں گرین ہائیڈروجن کی توسیع میں ایک اہم کردار ادا کرنے کی منفرد پوزیشن رکھتا ہے، اور ریاست میں گرین ہائیڈروجن کے مشتقات جیسے گرین امونیا اور گرین میتھانول کی پیداوار کے لیے گھریلو سرمایہ کاروں کی جانب سے نمایاں دلچسپی دیکھنے کو مل رہی ہے، خاص طور پر پراڈیپ اور گوالپُور جیسے اہم بندرگاہی علاقوں میں۔

اس اجلاس میں حکومتِ اڈیشہ کے سینئر افسران، مرکزی وزارتوں کے نمائندگان، اور معروف گرین ہائیڈروجن ڈیولپرز نے شرکت کی۔ اجلاس میں گوالپور میں واقع اسپیشل اکنامک زون (ایس ای زیڈ) میں بڑے پیمانے پر گرین ہائیڈروجن اور گرین امونیا منصوبوں کی ترقی میں درپیش چیلنجز پر تفصیلی غور و خوض کیا گیا۔

یہ کوششیں بھارت کے تیزی سے ترقی پذیر گرین ہائیڈروجن نظام میں ایک جامع روڈ میپ کی تشکیل کی راہ ہموار کریں گی۔

حکومتِ اڈیشہ نے گرین ہائیڈروجن مشتقات کی پیداوار اور برآمد کے لیے ایک باہمی اشتراک پر مبنی ماحولیاتی نظام اور سرمایہ کاری کے پسندیدہ مرکز کے طور پر اپنے عزم کا اعادہ کیا ہے، اور اس ضمن میں بروقت عمل درآمد کو یقینی بنانے کا وعدہ کیا۔

پی ایم سوریہ گھر: مفت بجلی یوجنا (پی ایم ایس جی : ایم بی وائی ) حکومتِ ہند کے نمایاں فلیگ شپ اقدامات میں سے ایک ہے، جس کا مقصد ملک بھر میں روف ٹاپ سولر نظام کو فروغ دینا ہے۔ وزارتِ نئی اور قابل تجدید توانائی نے ریاست کی کارکردگی کا چیف سیکریٹری کے ساتھ جائزہ لیا۔ جائزے کے بعد ضلع کلکٹروں کو ہدایت دی گئی کہ وہ ریاست بھر میں روف ٹاپ سولر تنصیبات کی رفتار میں تیزی لائیں۔

چیف سیکریٹری نے اس بات پر زور دیا کہ ریاست میں باقاعدہ ایس ایل بی سی اجلاس منعقد کیے جائیں، وینڈرز اور بینکوں سے مؤثر رابطہ رکھا جائے، اور قرضوں کی بروقت منظوری اور اجرائی کو یقینی بنایا جائے تاکہ اسکیم پر مؤثر عملدرآمد ہو سکے۔ ساتھ ہی یہ مشورہ دیا گیا کہ یوٹیلیٹی لیڈ ایگریگیشن (یو ایل اے ) ماڈل کو اپنایا جائے، خاص طور پر ان کم آمدنی والے گھرانوں پر توجہ مرکوز کرتے ہوئے جو 1 کلو واٹ سے کم صلاحیت کے نظام نصب کر رہے ہیں۔

وزارت کی جانب سے دیگر ریاستوں میں پی ایم کسان اُرجا سرکشا ایوم اُتھان مہابھیان  (پی ایم کے یو ایس یو ایم ‘کُسم’) کے تحت زرعی سولرائزیشن کے کامیاب ماڈلز بھی پیش کیے گئے۔ ان تجربات کو مدِنظر رکھتے ہوئے، چیف سیکریٹری نے ریاستی نوڈل ایجنسی کو ہدایت دی کہ وہ ریاست میں فیڈر سطح پر سولرائزیشن کے عمل کو نافذ کرے تاکہ زرعی برادری کو صاف توانائی کے فوائد فراہم کیے جا سکیں۔

---------

ش ح ۔ اس ک۔ن ع

U-2678

(Release ID: 2144097)