కేంద్ర కమ్యూనికేషన్లు-గ్రామీణాభివృద్ధి శాఖ సహాయ మంత్రి డాక్టర్ పెమ్మసాని చంద్రశేఖర్ ఈ రోజు ‘సెంటర్‌ ఫర్‌ డెవలప్‌మెంట్‌ ఆఫ్‌ టెలిమాటిక్స్‌’ (సి-డాట్‌) ప్రాంగణంలో సెకనుకు 25.6 టెరా బిట్ల సమాచారాన్ని పంపే అత్యున్నత సామర్థ్యంగల ‘సక్షం-3000 స్విచ్ కమ్ రౌటర్‌’ సదుపాయాన్ని ప్రారంభించారు. స్వావలంబన, ప్రపంచ పోటీతత్వంలో భారత్‌ గణనీయ పురోగమనం లక్ష్యంగా తదుపరి తరం డిజిటల్ మౌలిక సదుపాయాల కోసం ‘సి-డాట్‌’ ఈ అత్యాధునిక డేటా సెంటర్ స్విచ్-కమ్-రౌటర్ ను రూపొందించింది. దీన్ని ప్రారంభించిన అనంతరం ‘సి-డాట్‌’ ఢిల్లీ ప్రాంగణాన్ని సందర్శించిన మంత్రి, అక్కడి ప్రయోగశాలలను పరిశీలించారు. అలాగే వివిధ అత్యాధునిక సాంకేతిక రంగాల్లో పరిశోధనలు చేస్తున్న ఇంజినీర్లు, శాస్త్రవేత్తలతో ఆయన మాట్లాడారు.

ఈ  సందర్భంగా మంత్రి మాట్లాడుతూ- తొలుత ‘సి-డాట్‌’ ఇంజినీర్ల ప్రతిభాపాటవాలను ప్రశంసించారు. వారి కృషి “సాంకేతిక పరిజ్ఞానాభివృద్ధికి పరిమితం కాదు... దేశ పురోగమనం కోసం అవిశ్రాంత తపస్సు” అంటూ అభివర్ణించారు. ‘స్వదేశీ 4జి/5జి (ఎన్‌ఎస్‌ఏ) కోర్, అత్యాధునిక విపత్తు నిర్వహణ వ్యవస్థలు, సైబర్ భద్రత మార్గాలు, క్వాంటం కమ్యూనికేషన్‌’  సహా భారత్‌ ఇటీవల సాధించిన ప్రగతిని మంత్రి ప్రముఖంగా ప్రస్తావించారు. “ఈ విధంగా ‘సి-డాట్‌’ తన పరిశోధనలు, విస్తరణ ద్వారా అంతర్జాతీయ స్థాయికి ఎదిగే దశను చేరుకుంది“ అని ప్రశంసించారు.

ఇంజినీర్లు రోజువారీ లక్ష్యాల సాధనకు అతీతంగా ఆలోచించాలని, మరో ఐదేళ్లకు లేదా ఆ తదుపరి దేశానికి ఏది అవసరమో ఊహించగలగాలని డాక్టర్‌ శేఖర్‌ సూచించారు. ఈ మేరకు “సంకల్పం అంతరాంతరాల్లోంచి రగలాలి” అని పిలుపునిచ్చారు. “ఒక ప్రాజెక్టులో భాగస్వాములు కావడం... భవిష్యత్తుకు రూపమివ్వడం మధ్య వ్యత్యాసం ఇదే”నని ఉద్బోధించారు. “విజయం నుంచి ప్రాధాన్యాల దిశగా పయనిద్దాం. స్వదేశంలోనే కాకుండా ప్రపంచవ్యాప్త విశ్వసనీయత గల ‘సి-డాట్‌’ను రూపుదిద్దుదాం... ఈ కృషిలో దేశం మీ వెంటే నడుస్తుంది” అంటూ స్ఫూర్తిదాయక సందేశమిచ్చారు.

భారత్‌ కేవలం తయారీకి పరిమితం కాకుండా ప్రపంచానికి మార్గదర్శకత్వం వహించే స్థాయికి ఎదగాల్సిన అవసరాన్ని స్పష్టం చేస్తూ- “2047 నాటికి ప్రపంచ దిగ్గజాలైన నోకియా, ఎరిక్సన్, హువావే వంటి సంస్థలకు దీటుగా ‘సి-డాట్’ ఎదగాలి” అని ఆయన ఆకాంక్షించారు. ఈ లక్ష్య సాధనలో స్వయంప్రతిపత్తి, నిధులు, భాగస్వామ్యాల రీత్యా ప్రభుత్వం తనవంతు మద్దతిస్తుందని హామీ ఇచ్చారు. అలాగే “3జీపీపీ, ఐటీయూ, ఈటీఎస్‌ఐ” వంటి అంతర్జాతీయ ప్రమాణాల సంస్థలలో మరింత భాగస్వామ్యం కోసం కృషి చేయాలని కూడా పిలుపునిచ్చారు.

సక్షం-3000 గురించి:

ఇది ఆధునిక డేటా సెంటర్ల కోసం అత్యున్నత సామర్థ్యం, సెకనుకు 25.6 ‘టీబీపీఎస్‌’ సమాచారం పంపగల శక్తితో రూపొందించిన స్విచ్-కమ్‌-రౌటర్. భారీ కంప్యూటింగ్ సముదాయాలు, క్లౌడ్ ఇన్‌ఫ్రాస్ట్రక్చర్, 5జి/6జి నెట్‌వర్కులు, ఏఐ వర్క్‌ లోడ్‌లను శక్తిమంతం చేయడం లక్ష్యంగా ఈ పరికరం తయారైంది. ఇది 32 పోర్టులతో సెకనుకు 1 గిగాబిట్‌ నుంచి 400 గిగాబిట్ల వరకూ ఈథర్నెట్ వేగానికి వీలు కల్పించగల పరికరం. “అల్ట్రా-లో లేటెన్సీ, వైర్-స్పీడ్ ప్రాసెసింగ్, మాడ్యులర్ సిఆర్‌ఓఎస్‌” (సి-డాట్‌ రూటర్ ఆపరేటింగ్ సిస్టమ్) వ్యవస్థలుగల ఈ పరికరం ‘సీఎల్‌ఓఎస్‌’ నెట్‌వర్క్‌లో ‘లీఫ్ నుంచి సూపర్-స్పైన్ నోడ్‌’ల వరకూగల వివిధ మార్గాల్లో పనిచేయగల బహుముఖ పరిష్కారంగా రూపొందింది.

కంప్యూటింగ్‌ రంగంలో లెగసీ-క్లౌడ్‌ నేటివ్‌ నెట్‌వర్కులు రెండింటికీ “భవిష్యత్ సంసిద్ధ వేదిక”గా ‘సక్షం-3000’ రూపుదిద్దుకుంది. ఇది లేయర్-2, ఐపీ, ఎంపీఎల్‌ఎస్‌ ప్రోటోకాల్‌లకు మద్దతిస్తుంది. అంతేకాకుండా విద్యుత్‌ వినియోగంలో పొదుపుతోపాటు పీటీపీ, సింక్-ఈ ద్వారా సమయానుగుణ అప్లికేషన్లకు తగినట్లు తయరయింది. ఇందులో “సరళ లైసెన్సింగ్, హాట్-స్వాప్ అనుగుణ పవర్-ఫ్యాన్ యూనిట్ల అధిక విశ్వసనీయత, డబ్ల్యూఆర్‌ఆర్‌ (వెయిటెడ్ రౌండ్ రాబిన్), డబ్ల్యూఆర్‌ఈడీ వంటి అత్యాధునిక ‘క్యూఓఎస్‌’ విశిష్టతలున్నాయి. భారీ పరిశ్రమలు, టెలికాం ఆపరేటర్లు, హైపర్‌స్కేల్ డేటా సెంటర్ల కార్యకలాపాల్లో పెరిగే అవసరాలు తీర్చడం లక్ష్యంగా ఈ పరికరాన్ని తీర్చిదిద్దారు.

ఈ కార్యక్రమం అనంతరం ‘సి-డాట్’ సీఈవో డాక్టర్ రాజ్‌కుమార్ ఉపాధ్యాయ్ మాట్లాడుతూ- గౌరవ మంత్రి డాక్టర్‌ చంద్రశేఖర్‌ ప్రయోగశాలలను సందర్శించిన సందర్భంగా ఇంజినీర్లకు మార్గనిర్దేశక, స్ఫూర్తిదాయక సందేశమిచ్చారంటూ కృతజ్ఞతలు తెలిపారు. తమ కృషికి అమూల్య మద్దతుపై ప్రభుత్వం తరఫున హామీ ఇచ్చినందుకు ధన్యవాదాలు తెలియజేశారు. చివరగా- గౌరవ ప్రధానమంత్రి పిలుపునిచ్చిన స్వయం సమృద్ధ భారత్‌ దృక్కోణానికి అనుగుణంగా ‘సి-డాట్’ నిర్నిబంధ నిబద్ధతతో కర్తవ్య నిర్వహణకు సదా సిద్ధంగా ఉంటుందని ఉపాధ్యాయ్‌ ప్రకటించారు.

 

***

(Release ID: 2142062)