جنوبی آسٹریلیا کے گورنر فرانسس ایڈمسن اے سی، جو اس وقت ہندوستان کے دورے پر ہیں، نے مرکزی وزیر ڈاکٹر جتیندر سنگھ، وزیر مملکت برائے سائنس و ٹیکنالوجی، ارضیاتی سائنس اور وزیر مملکت برائے پی ایم او، خلا، جوہری توانائی اور وزیر مملکت برائے عملہ، پنشن اور عوامی شکایات سے آج یہاں ملاقات کی ۔ جس کا مقصد دونوں ممالک کے درمیان خلائی ٹیکنالوجی کے گہرے تعاون پر تبادلہ خیال کرنا تھا۔

محترمہ فرانسس ایڈمسن بھی ڈاکٹر جتیندر سنگھ کے ساتھ ایکزیوم-4 مشن کی لانچنگ کی خصوصی اسکریننگ دیکھنے میں شامل ہوئیں ، جو ہندوستان کے لیے ایک تاریخی لمحے کی نشاندہی کرتا ہے، کیونکہ مشن پائلٹ گروپ کیپٹن شبھانشو شکلا بین الاقوامی خلائی اسٹیشن کے راستے میں عالمی خلائی عملے میں شامل ہونے والے تازہ ترین ہندوستانی خلاباز بن گئے ۔

 ڈاکٹر جتیندر سنگھ نے کہا ، ’’یہ ہندوستان کے لیے ایک قابل فخر اور فیصلہ کن لمحہ ہے  اور ہمیں اعزاز حاصل ہے کہ عزت مآب فرانسیس ایڈمسن نے اس سنگ میل کو صفحہ اوّل کی ٹیکنالوجیز میں بڑھتی ہوئی ہندوستان-آسٹریلیا شراکت داری کی عکاسی کے طور پر مشاہدہ کیا‘‘۔

ڈاکٹر جتیندر سنگھ نے اکتوبر 2012 میں دستخط کیے گئے بین حکومتی معاہدے (آئی جی اے) کو یاد کرتے ہوئے ہندوستان-آسٹریلیا خلائی تعاون کے ارتقاء پر روشنی ڈالی اور بتایا کہ کس طرح 2018 میں آسٹریلیائی خلائی ایجنسی (اے ایس اے) کی تشکیل ہوئی، اس کے بعد 2021 میں ایک ترمیم شدہ معاہدے نے خلائی شعبے میں دو طرفہ تعلقات کو نمایاں طور پر آگے بڑھایا ۔

ڈاکٹر سنگھ نے کہا ، ’’ہندوستان آسٹریلیا کی طرف سے دی گئی مسلسل حمایت کی دل کی گہرائیوں سے تعریف کرتا ہے، خاص طور پر اسرو کے فلیگ شپ گگن یان انسانی خلائی پرواز مشن کو آگے بڑھانے میں‘‘ ۔

انہوں نے کریو ماڈیول ریکوری آپریشنز پر بات چیت کے لیے ہندوستانی تکنیکی ٹیموں کے حالیہ اپریل 2025 کے کینبرا کے دورے کا حوالہ دیا ۔ انہوں نے کہا کہ آسٹریلیا کی متعدد وزارتوں اور ایجنسیوں کے ساتھ ان آمنے سامنے بات چیت نے ہمارے بڑھتے ہوئے تعاون میں نئی رفتار کا اضافہ کیا ہے ۔

خلائی بائیوٹیکنالوجی میں ہندوستان کی پیش رفت پر روشنی ڈالتے ہوئے ڈاکٹر جتیندر سنگھ نے گورنر کو بتایا کہ ایک باضابطہ مفاہمت نامے کے تحت محکمہ بائیوٹیکنالوجی (ڈی بی ٹی) اور اسرو کے درمیان تعاون کے ذریعے تیار کردہ مقامی بائیوٹیک کٹس کا اب آئی ایس ایس پر تجربہ کیا جا رہا ہے۔ خلاباز شکلا کے ذریعے لے جانے والی یہ کٹس مائیکرو گریویٹی میں مائیکرو ایلگی کی نشوونما کا جائزہ لینے کے لیے ڈیزائن کی گئی ہیں-جو طویل مدتی خلائی مشنوں میں زندگی کو برقرار رکھنے کے لیے اہم ہے۔

ڈاکٹر سنگھ نے زور دے کر کہا کہ ’’خلائی حیاتیات اور خلائی طب کا باہمی تعلق ایک تبدیلی کے محاذ کے طور پر ابھر رہا ہے  اور ہندوستان پہلے ہی ان شعبوں میں اہم پیش رفت حاصل کر چکا ہے‘‘ ۔

ڈاکٹر جتیندر سنگھ نے مضبوط خلائی ماحولیاتی نظام کی تعمیر میں پبلک پرائیویٹ پارٹنرشپ (پی پی پی) کی بڑھتی ہوئی اہمیت پر زور دیا اور ہندوستانی اسٹارٹ اپس اور صنعتوں کے ساتھ شراکت میں آسٹریلیا کی دلچسپی کا خیرمقدم کیا ۔ انہوں نے منظم تعاون کی ایک مثبت مثال کے طور پر اے ایس اے کی بین الاقوامی خلائی سرمایہ کاری-انڈیا اسٹریم کے کردار کو تسلیم کیا ۔

وزیر موصوف نے کہا کہ ہندوستان کا خلائی سفر تیزی سے تمام ممالک اور شعبوں میں باہمی تعاون کے جذبے سے چل رہا ہے اور ہم آسٹریلیا کو ایک کلیدی اور قابل اعتماد شراکت دار کے طور پر دیکھتے ہیں ۔

دونوں ممالک کے وسیع سمندری وسائل کو تسلیم کرتے ہوئے، دونوں فریقوں نے ہندوستان-آسٹریلیا سمندری تعاون کا ایک توسیعی فریم ورک شروع کرنے پر بھی غور کیا ، جس کا مقصد سمندری علوم میں پائیدار تلاش ، تحفظ اور  اختراع ہے ۔

گورنر فرانسس ایڈمسن اے سی نے ہندوستان کی خلائی کامیابیوں کے لیے عمیق ستائش کا اظہار کیا اور گگن یان مشن اور دیگر آنے والے سنگ میل کے لیے نیک خواہشات کا اظہار کیا۔ انہوں نے اس بات پر زور دیا کہ ثقافتی روابط اور سائنسی تعاون باہمی تعلقات کو مستحکم کرنے میں ایک طویل سفر طے کریں گے۔

انہوں نے مزید کہا کہ آسٹریلیا ہندوستان کے ساتھ اپنی سائنسی اور اسٹریٹجک شراکت داری کو بہت اہمیت دیتا ہے اور خلا ، سمندری تحقیق اور اختراع میں مشترکہ اقدامات کو آگے بڑھانے کے لیے پر امید ہے۔

ان کے ساتھ بھارت میں آسٹریلیا کے ہائی کمشنر جناب فلپ گرین بھی موجود تھے ۔

***************

) ش ح –   اک  -  ش ہ ب )

U.No. 2152

 

(Release ID: 2139665)