மத்திய உள்துறை அமைச்சரும் கூட்டுறவுத் துறை  அமைச்சருமான திரு  அமித் ஷா இன்று கர்நாடகாவின் பெங்களூருவில் உள்ள ஆதிச்சுஞ்சனகிரி பல்கலைக்கழகத்தின்  பெங்களூரு வளாகத்தைத் திறந்து வைத்தார்.

இந்த நிகழ்ச்சியில் உரையாற்றிய  மத்திய உள்துறை அமைச்சர் திரு அமித் ஷா, நமது கலாச்சாரத்தின் முக்கிய கொள்கை, தன்னைப் பற்றி மட்டுமல்லாமல், அனைவரின் நலன் மற்றும் மகிழ்ச்சியைப் பற்றியும் சிந்திப்பது என்று கூறினார். ஸ்ரீ ஆதிச்சுஞ்சனகிரி மடம் கிராமங்களில் சுகாதார மையங்களை நடத்துவதன் மூலமும், ஏழைகளுக்கு இலவச சிகிச்சை அளிப்பதன் மூலமும், குழந்தைகளுக்கான கல்வி மையங்களை நிறுவுவதன் மூலமும் சிறந்த பணிகளைச் செய்து வருவதாக அவர் கூறினார்.

4,000 மாணவர்களுக்கு கல்வி வழங்குவதற்காக, ரூ 200 கோடி செலவில், 16 ஏக்கர் நிலத்தில் 20 லட்சம் சதுர அடி பரப்பளவில் ஒரு வளாகம் கட்டப்பட்டுள்ளதாக திரு அமித் ஷா கூறினார். 1,000 படுக்கைகள் கொண்ட இந்த நவீன மருத்துவமனை, அனைத்து சுகாதார வசதிகளையும் கொண்டுள்ளது. இது ஏழைகளுக்கு கல்வியுடன் இலவச மற்றும் மலிவு விலையில் சிகிச்சையை வழங்குவதன் மூலம் உண்மையிலேயே ஒரு சிறந்த சேவை ஊடகமாக மாறும் என்று அவர் குறிப்பிட்டார். ஜகத்குரு ஸ்ரீ டாக்டர் பாலகங்காதரநாத சுவாமிஜி, ஆதிசுஞ்சனகிரியின் புனித மலைகளின் 1,800 ஆண்டுகள் பழமையான ஆன்மீக பாரம்பரியத்தை சேவை, கல்வி மற்றும் அர்ப்பணிப்புடன் ஒருங்கிணைப்பதன் மூலம் பாதுகாத்து மேலும் வளப்படுத்தியுள்ளார் என்றும் அவர் கூறினார். டாக்டர் நிர்மலானந்தநாத மகாஸ்வாமிஜியும் இந்த மரபை முன்னோக்கி கொண்டு செல்கிறார்.

இந்த மடம் (துறவற நிறுவனம்) பல ஏழை மற்றும் நடுத்தர குடும்பங்களை சேவை மூலம் ஆன்மீகம் மற்றும் கர்ம யோகாவுடன் இணைத்துள்ளது என்று மத்திய உள்துறை அமைச்சர் கூறினார். அன்னம் (உணவு), அக்ஷரா (கல்வி), ஆரோக்கியம் (சுகாதாரம்), ஆத்யாத்மிகா (ஆன்மீகம்), ஆஷ்ரயா (சுற்றுச்சூழல்), ஆகாளு (பேரிடர் நிவாரணம்), அனுகம்பம் (இரக்கம்) மற்றும் அனுபந்த் (இணைப்பு) ஆகிய ஒன்பது தூண்களின் அடிப்படையில் சமூகத்தின் அனைத்து பிரிவுகளிலிருந்தும் மக்களை மடம் வெற்றிகரமாக ஒன்றிணைத்துள்ளது என்று அவர் கூறினார். இது, சமூகத்திற்குள் ஆன்மீகம், மதம் மற்றும் கலாச்சாரத்தை வலுப்படுத்துவது மட்டுமல்லாமல், சமூக ஒற்றுமையையும் வலுப்படுத்தியுள்ளது, இது மற்ற மத நிறுவனங்களுக்கு ஒரு குறிப்பிடத்தக்க முன்மாதிரியாக அமைந்துள்ளது என்று அவர் கூறினார். பாரம்பரியத்துடன் புதுமைகளைக் கலப்பதன் மூலம் இந்த மடம் முன்னேறி வருவதாக திரு அமித் ஷா கூறினார். ஒருபுறம், இது குழந்தைகள் மற்றும் இளைஞர்களை நமது மரபுகள் மற்றும் கலாச்சாரத்துடன் இணைக்கிறது, மறுபுறம், இது அவர்களுக்கு மிகவும் நவீன கல்வியை வழங்குகிறது, சமூகத்தில் ஒரு மரியாதைக்குரிய இடத்தைப் பெற உதவுகிறது என அவர் குறிப்பிட்டார்.

ஸ்ரீ ஆதிசுஞ்சனகிரி மடம் ஒரு தனிநபரின் ஆன்மாவை மேம்படுத்துவதற்கு மட்டுமல்லாமல், சமூகத்தின் ஆன்மாவை எழுப்புவதற்கும் அர்ப்பணிப்புடன் உள்ளது என்று திரு அமித் ஷா கூறினார். மகாசுவாமி ஜி மாணவர்களுக்கு இலவச தங்குமிடத்துடன் கல்வியை வழங்கியுள்ளார். இதனால் அவர்கள் சமூகத்தில் ஒரு மரியாதைக்குரிய இடத்தைப் பெற முடியும் என்று அவர் குறிப்பிட்டார். கூடுதலாக, அனாதைகள், முதியவர்கள் மற்றும் மனநலம் பாதிக்கப்பட்டவர்களின் நலனுக்காக மகாசுவாமி ஜி பல முயற்சிகளை மேற்கொண்டுள்ளார், மேலும் டாக்டர் நிர்மலானந்தநாத ஜி இந்த மரபை முன்னெடுத்துச் சென்றுள்ளார். இந்த பல்கலைக்கழகம் மாணவர்களுக்கு புதிய திசையை வழங்குவது மட்டுமல்லாமல், இந்தியாவின் முதன்மையான பல்கலைக்கழகங்களில் ஒன்றாகவும் மாறியுள்ளது என்று திரு அமித் ஷா கூறினார். இங்குள்ள 1,500 படுக்கைகள் கொண்ட மருத்துவமனை, ஆராய்ச்சி மையங்கள், இருதயவியல், நரம்பியல் அறுவை சிகிச்சை, புற்றுநோயியல், சிறுநீரகம், கல்லீரல் மற்றும் கார்னியா மாற்று அறுவை சிகிச்சைகள் உட்பட ஏழைகளுக்கு மிகக் குறைந்த விலையில் உயர்தர சுகாதார சேவைகளை இலவசமாக வழங்குகிறது என்று அவர் கூறினார்.

வறுமைக்கு வழிவகுக்கும் மிகப்பெரிய பிரச்சனை நோய் என்றும், தொடர்ந்து நோய்வாய்ப்படுவதற்கு மிகப்பெரிய காரணம் சிகிச்சை செலவு என்றும் பிரதமர் திரு. நரேந்திர மோடி ஒருமுறை கூறியதாக மத்திய உள்துறை அமைச்சர் தெரிவித்தார். ஏழைகளுக்கான சிகிச்சைக்கான ஏற்பாடுகளை அரசு செய்ய வேண்டும் என்று பிரதமர் மோடி கூறியிருந்தார். பிரதமரான பிறகு, திரு. நரேந்திர மோடி அந்த உறுதிமொழியை நிறைவேற்றினார் என்றும், இன்று இந்திய அரசு 60 கோடி ஏழை மக்களுக்கு ரூ 5 லட்சம் வரை இலவச சிகிச்சை அளித்து வருவதாகவும் திரு அமித் ஷா கூறினார். பிரதமர் மோடி ஒரு முழுமையான அணுகுமுறையுடன் நாட்டின் சுகாதாரப் பிரச்சினைகளை நிவர்த்தி செய்துள்ளார் என்றும் அவர் கூறினார். வீடுகளில் கிட்டத்தட்ட 12 கோடி கழிப்பறைகள் கட்டப்பட்டுள்ளன, ஃபிட் இந்தியா இயக்கம் தொடங்கப்பட்டது, சர்வதேச யோகா தினம் தொடங்கப்பட்டது, மேலும் இந்திரதனுஷ் திட்டத்தின் கீழ், பிறப்பு முதல் 15 வயது வரையிலான குழந்தைகளுக்கு இலவச தடுப்பூசி ஏற்பாடு செய்யப்பட்டுள்ளது. ஊட்டச்சத்து இயக்கம் மூலம், தாய்மார்கள் மற்றும் குழந்தைகளின் ஊட்டச்சத்து குறித்த பிரச்சினை கவனிக்கப்பட்டு, ஆரோக்கியமான குடிமகனை உருவாக்க வழி வகுத்தது என்று அவர் பட்டியலிட்டார்.

மேலும், பிரதமரின் மக்கள் மருந்தக திட்டத்தின்  கீழ், அனைத்து மருந்துகளும் 15,000 இடங்களில் சந்தை விலையில் 20% விலையில் கிடைக்கின்றன. நாட்டில் மருத்துவர்களின் எண்ணிக்கையை அதிகரிக்க பிரதமர் மோடி பல நடவடிக்கைகளை எடுத்துள்ளதாகவும் திரு  ஷா கூறினார். 2014 ஆம் ஆண்டில், நாட்டில் 7 எய்ம்ஸ் மருத்துவமனைகள் இருந்தன - இன்று 23 உள்ளன. மருத்துவக் கல்லூரிகளின் எண்ணிக்கை 387-ல் இருந்து 780 ஆக அதிகரித்துள்ளது; எம்பிபிஎஸ் இடங்கள் 51,000-ல் இருந்து 1,18,000 ஆக அதிகரித்துள்ளது; மேலும் முதுநிலை மருத்துவ இடங்களின் எண்ணிக்கை 31,000-ல் இருந்து 74,000 ஆக உயர்ந்துள்ளது.

***

(Release ID: 2137978)

AD/PKV/SG/DL