آج بھارت اور یوکرین کے درمیان ورچووَل طریقے سے زراعت سے متعلق  اولین جوائنٹ ورکنگ گروپ (جے ڈبلیو جی) میٹنگ کا اہتمام کیا گیا۔جناب اجیت کمار ساہو، جوائنٹ سکریٹری (آئی سی)، زراعت اور کاشتکاروں کی فلاح و بہبود کا محکمہ، اور محترمہ اوکسانا اوزماچکو، یوکرین کی زرعی پالیسی اور خوراک کی نائب وزیر نے اس میٹنگ کی مشترکہ صدارت کی۔دونوں ممالک کے افسران نے اس امر کو اجاگر کیا کہ یہ میٹنگ زراعت اور اس سے منسلک شعبوں میں باہمی تعاون کو مضبوطی فراہم کرنے کے معاملے میں اہم سنگ میل  ہے۔

جناب اجیت کمار ساہو نے زراعت اور اس سے منسلک شعبوں کا ایک جائزہ پیش کیا جس میں ہندوستان کی نمایاں زرعی کامیابیوں کو اجاگر کیا گیا۔ انہوں نے زرعی شعبے کو مضبوط کرنے کے لیے حکومت کی جانب سے شروع کیے گئے متعدد اختراعی اقدامات پر روشنی ڈالی، جس میں ڈیجیٹل حل کا استعمال، آب و ہوا کے لیے لچکدار زرعی طریقوں کو فروغ دینا، خطرات کو کم کرنا، اور حکومت کے قرضے کے اقدامات شامل ہیں۔ ان کے ذریعہ ذکر کردہ دیگر قابل ذکر پروگراموں میں خوردنی تیلوں کے بیجوں پر قومی مشن، نیشنل فوڈ سیکورٹی مشن پلسز، اور ای-نام شامل ہیں، جس کا مقصد زراعت کے شعبے اور دیہی ترقی میں ترقی کو فروغ دینا ہے۔

محترمہ اوکسانا اوزماچکو، نے ہندوستان کے ساتھ اپنی قابل قدر شراکت داری کو مضبوط بنانے کے لیے یوکرین کے عزم پر زور دیا۔ انہوں نے فوڈ پروسیسنگ، زرعی میکانائزیشن، ڈیجیٹل زراعت، جینوم ایڈیٹنگ، پلانٹ بریڈنگ ٹیکنالوجیز، مٹی کی زرخیزی اور مٹی کی نقشہ سازی جیسے اہم شعبوں میں تعاون کو گہرا کرنے میں یوکرین کی مضبوط دلچسپی کا اظہار کیا۔ انہوں نے مزید اس بات پر زور دیا کہ دونوں ممالک، اپنے بھرپور زرعی تجربے کے ساتھ، پیداواری صلاحیت کو بڑھانے، میکانائزیشن کو فروغ دینے اور کسانوں کی فلاح و بہبود کو بہتر بنانے میں ایک دوسرے کی تکمیل کرنے کی صلاحیت رکھتے ہیں۔

دونوں فریقوں نے باغبانی میں تعاون، تکنالوجی کی منتقلی، علم کے تبادلے، استعداد کار میں اضافے، تحقیقی تعاون اور مارکیٹ تک رسائی سے متعلق اہم امور پر تبادلہ خیال کیا۔

میٹنگ میں محکمہ زراعت اور کاشتکاروں کی فلاح و بہبود، انڈین کونسل آف ایگریکلچرل ریسرچ، محکمہ ماہی پروری، محکمہ حیوانات اور ڈیری، فوڈ پروسیسنگ انڈسٹریز، فوڈ سیفٹی اینڈ اسٹینڈرڈز اتھارٹی آف انڈیا (ایف ایس ایس اے آئی) اور وزارت خارجہ کے سینئر افسران نے بھی شرکت کی۔

**********

 

(ش ح –ا ب ن)

U.No:1881

(Release ID: 2137469)