مرکزی وزیر خزانہ اور کارپوریٹ امور  کی وزیرمحترمہ نرملا سیتا رمن اور مرکزی وزیر مملکت برائے خزانہ جناب پنکج چودھری نے آج نئی دہلی کے ورلڈ ٹریڈ سینٹر، نوروجی نگر میں سیکورٹی پرنٹنگ اینڈ منٹنگ کارپوریشن آف انڈیا لمیٹڈ(ایس پی ایم سی آئی ایل )کے نئے کارپوریٹ دفتر کا افتتاح کیا۔

محکمہ اقتصادی امور (ڈی ای اے) کی آفیسر آن اسپیشل ڈیوٹی(او ایس ڈی) محترمہ انورادھا ٹھاکر، وزارت خزانہ کے دیگر سینئر عہدیداران، ایس پی ایم سی آئی ایل کے بورڈ کے اراکین، ادارے کے سینئر افسران اور ملازمین کی یونینوں کے نمائندگان بھی اس موقع پر موجود تھے۔

اپنے کلیدی خطاب میں، مرکزی وزیر خزانہ نے اس اہم سنگِ میل پر  ایس پی ایم سی آئی ایل  کی ستائش کی اور اس بات پر زور دیا کہ یہ نئی سہولت کرایے کی مد میں نمایاں بچت کا باعث بنے گی، جب کہ انتظامی کارکردگی، داخلی ہم آہنگی اور ملازمین کی شمولیت میں بھی بہتری آئے گی۔

محترمہ نرملا سیتارمن نے اب تک جاری کیے گئے 210 یادگاری سکوں، جن میں سے 105 گزشتہ دہائی میں جاری کیے گئے، پر کارپوریشن کی تعریف کی اور اس بات کو اجاگر کیا کہ ایس پی ایم سی آئی ایل کے یادگاری سکے ‘‘برانڈ انڈیا’’ کی پہچان بن چکے ہیں۔ یہ سکے نہ صرف معزز اور بامعنی تحفے کے طور پر دیے جاتے ہیں بلکہ قوم کے عظیم ثقافتی ورثے کی عکاسی بھی کرتے ہیں۔ انہوں نے اس بات پر زور دیا کہ ایس پی ایم سی آئی ایل کی مصنوعات — جیسے کرنسی نوٹ، سکے، پاسپورٹ پیپر، ڈاک کے اشیاء وغیرہ — ملک کے نظام کے لیے نہایت اہمیت کی حامل ہیں۔

مرکزی وزیر خزانہ نے خاص طور پر پنچ تنتر پر مبنی یادگاری سکوں کے مجموعے کو سراہا، جسے عوام کی جانب سے مثبت پذیرائی ملی اور جو ثقافتی لحاظ سے بھی نہایت اہمیت رکھتےہیں۔ انہوں نے قومی تمغے اور میڈل تیار کرنے میں ایس پی ایم سی آئی ایل کے اہم کردار کو تسلیم کیا، جن میں بھارت رتن بھی شامل ہے، جو ملک کا سب سے اعلیٰ شہری اعزاز ہے۔

محترمہ سیتارمن نے  ایس پی ایم سی آئی ایل  کی سونے اور چاندی کو صاف کرنے کی صلاحیتوں اور اس کی شاندار مالی کارکردگی کو بھی سراہا، جس میں مالی سال 2017-2016 کے دوران تمام قرضوں کی ادائیگی شامل ہے۔ انہوں نے ایس پی ایم سی آئی ایل پر زور دیا کہ وہ اپنی سپلائی چین مینجمنٹ کو مزید مضبوط کرے۔

اپنے خطاب میں، مرکزی وزیر مملکت برائے خزانہ نے ادارے کی نمایاں کامیابیوں پر فخر کا اظہار کیا اور بھارت کے معاشی و سیکیورٹی پرنٹنگ ڈھانچے کو مضبوط بنانے میں پی ایم سی آئی ایل کے اہم کردار کی تعریف کی۔ انہوں نے جدت، خود انحصاری اور پائیداری کے لیے اس کے عزم کو سراہا۔

ایس پی ایم سی آئی ایل کی مضبوط مالی کارکردگی کو اجاگر کرتے ہوئے جناب چودھری نے اسے ایک مثالی عوامی شعبے کے ادارے کے طور پر پیش کیا، جو بینک نوٹ کی سیاہی، پاسپورٹ پیپر اور دیگر اہم سیکیورٹی مواد کی دیسی تیاری کے ذریعے خود انحصاری حاصل کر رہا ہے۔ وزیر مملکت برائے خزانہ نے ایس پی ایم سی آئی ایل کے بورڈ، انتظامیہ اور ملازمین کو ان کی کاوشوں پر مبارکباد دی اور ادارے کو اعلیٰ کارکردگی کے سفر کو جاری رکھنے اور نو رتن کا درجہ حاصل کرنے کی ترغیب دی، ساتھ ہی وزارت خزانہ کی طرف سے مکمل تعاون کا یقین دلایا۔

اس موقع پر اپنے خطاب میں محترمہ انورادھا ٹھاکر، آفیسر آن اسپیشل ڈیوٹی، محکمہ اقتصادی امور (ڈی ای اے)، نے ادارہ جاتی کارکردگی کو مؤثر بنانے اور خود انحصاری کو فروغ دینے کے لیے پی ایم سی آئی ایل کی اہم پیش رفت کو سراہا۔ انہوں نے ادارے کی مضبوط مالی کارکردگی اور بہتر طرزِ حکمرانی کو اجاگر کرتے ہوئے اس اعتماد کا اظہار کیا کہ پی ایم سی آئی ایل مستقبل میں بھی ملک کے معاشی اور تزویراتی اہداف کے حصول میں اہم کردار ادا کرتا رہے گا۔

اس موقع پر اپنے استقبالیہ خطاب میں پی ایم سی آئی ایل کے چیئرمین اور منیجنگ ڈائریکٹر جناب وجے رنجن سنگھ نے مرکزی وزیر خزانہ کا ان کی حوصلہ افزا موجودگی پر دلی شکریہ ادا کیا اور وزیر مملکت برائے خزانہ سمیت وزارتِ خزانہ کے دیگر سینئر عہدیداران کے قیمتی تعاون کو سراہا۔ جناب سنگھ نے کہا کہ نیا دفتر پی ایم سی آئی ایل کے ترقیاتی سفر میں ایک اہم سنگِ میل ہے، جو کارکردگی، جدت اور قومی تعمیر کے لیے ادارے کے عزم کی علامت ہے۔ انہوں نے تمام معزز مہمانوں کا شکریہ ادا کرتے ہوئے اس عزم کا اعادہ کیا کہ کمپنی جدت، شفافیت اور قوم کی خدمت کے اصولوں پر کاربند رہے گی۔

مرکزی وزیر خزانہ اور وزیر مملکت برائے خزانہ نے سال 2024-2023کے دوران ملازمین اور آپریشنل یونٹس کی شاندار کارکردگی کے اعتراف میں ایوارڈز بھی تقسیم کیے۔

ایس پی ایم سی آئی ایل  ایک شیڈیول ‘اے’ منی رتن کیٹیگری-I کا مرکزی عوامی شعبے کا ادارہ (سی پی ایس ای) ہے، جو وزارت خزانہ کے محکمہ اقتصادی امور کے انتظامی کنٹرول کے تحت کام کرتا ہے۔ ایس پی ایم سی آئی ایل  حکومتِ ہند کے آتم نربھر بھارت (خود انحصار بھارت) کے وژن کو آگے بڑھانے میں ایک اہم کردار ادا کر رہا ہے، جو خود انحصاری، ٹیکنالوجی میں ترقی، اور پائیدار ترقی کو فروغ دینے پر مرکوز ہے۔

********

ش ح۔ ش ت۔ رض

U-1615