وزیر اعظم جناب نریندر مودی نے آج کانپور نگر ضلع، اتر پردیش میں گھاٹم پور تھرمل پاور پروجیکٹ (3x660 میگاواٹ) کے یونٹ-1 (660 میگاواٹ) کو ملک کے نام وقف کیا، جو ہندوستان کے توانائی کے شعبے میں ایک تاریخی کامیابی ہے۔ یہ اہم پاور پروجیکٹ نیویلی اتر پردیش پاور لمیٹڈ (این یو پی پی ایل) کی طرف سے ایک اہم پہل ہے جو این ایل سی انڈیا لمیٹڈ (51 فیصد) اور اتر پردیش راجیہ ودیوت اُتپادن نگم لمیٹڈ (یو پی آر وی یو این ایل) (49 فیصد) کے اشتراک سے ہے۔ پروجیکٹ میں 660 میگا واٹ کے تین سپرکریٹیکل تھرمل پاور یونٹ شامل ہیں، جس سے 1,980 میگا واٹ کی نصب صلاحیت کا اضافہ ہوتا ہے۔ اس اقدام کا مقصد اتر پردیش اور دیگر ریاستوں میں بجلی کی بڑھتی ہوئی طلب کو پورا کرنا ہے اور پائیدار اور قابل بھروسہ بجلی کی پیداوار کے لیے ملک کے عزم کے مطابق توانائی کے تحفظ کو بڑھانا ہے۔

21,780.94 کروڑ روپے کی کل پروجیکٹ لاگت کے ساتھ، گھاٹم پور تھرمل پاور پروجیکٹ کے باقی دو یونٹ مالی سال 2025-26 تک شروع ہونے کی امید ہے۔ اس کی ترقی کے لیے کل 998.81 ہیکٹر اراضی حاصل کی گئی تھی۔ اتر پردیش کے ساتھ 1487.28 میگاواٹ یعنی پیدا ہونے والی بجلی کا 75.12 فیصد اور آسام کے ساتھ 492.72 میگاواٹ یعنی 24.88 فیصد پاور پرچیز ایگریمنٹ (پی پی اے) کیا گیا ہے جو آسام حکومت کے حق میں این یو پی پی ایل میں یو پی آر وی یو این ایل کے 20 فیصد ایکویٹی شیئر کی اصل منتقلی سے مشروط ہے۔

گھاٹم پور تھرمل پاور پروجیکٹ نے بالترتیب NOx اور (SOx) کے اخراج کو کم کرنے کے لیے سلیکٹیو کیٹلیٹک ریڈکشن (ایس سی آر) اور فلو گیس ڈی سلفرائزیشن (ایف جی ڈی) ٹیکنالوجی سمیت جدید ماحولیاتی ٹیکنالوجیز کو اپنایا ہے۔ اس کے علاوہ، اس منصوبے میں زیرو لیکوڈ ڈسچارج (زیڈ ایل ڈی) سسٹم ہوگا تاکہ یہ یقینی بنایا جا سکے کہ پلانٹ سے پانی خارج نہ ہو۔ 195 ایم ایل ڈی پانی کو محفوظ کرنے کے لیے کل 288 کلومیٹر طویل نہر کی لائننگ کا کام کیا جا رہا ہے۔

پلانٹ میں کوئلے پر مبنی سپر کریٹیکل بوائلر کی کارکردگی 88.81 فیصد ہے جو توانائی کی مؤثر پیداوار کو یقینی بناتی ہے۔ کول اسٹاک یارڈ کی گنجائش کو تینوں یونٹوں کے لیے مکمل لوڈ پر 30 دن کے آپریشن کے لیے 10.165 ایل ایم ٹی کوئلہ ذخیرہ کرنے کے لیے ڈیزائن کیا گیا ہے۔ پلانٹ کے خام پانی کے ذخائر کی مجموعی گنجائش تقریباً 46 لاکھ مکعب میٹر ہے جسے دو حصوں میں تقسیم کیا گیا ہے۔ پلانٹ میں ایک جدید سب سٹیشن آٹومیشن سسٹم اور 765 کے وی جی آئی ایس سسٹم کے ذریعے بجلی کے مؤثر انخلا کی خصوصیات موجود ہیں۔ اس میں 9 ایم ٹی پی اے کی پیداواری صلاحیت کے ساتھ کیپٹو کول بلاک بھی شامل ہے، جو طویل مدتی آپریشن کے لیے بلاتعطل ایندھن کی فراہمی کو یقینی بناتا ہے۔

یہ جدید ترین تھرمل پاور اسٹیشن بجلی کی دستیابی کو بڑھانے، پائیدار ترقی کو فروغ دینے اور آتم نربھر بھارت کے وژن کو آگے بڑھانے کے لیے وزارت کی غیر متزلزل عزم کی عکاسی کرتا ہے۔ جدید ٹیکنالوجی اور ماحولیاتی تحفظات سے آراستہ اس منصوبے سے بڑے پیمانے پر براہ راست/ بالواسطہ روزگار پیدا کرنے اور خطے میں سماجی و اقتصادی ترقی کی حوصلہ افزائی کی توقع ہے۔

وزیر اعظم جناب نریندر مودی کے ذریعہ گھاٹم پور تھرمل پاور پروجیکٹ کا افتتاح توانائی کے شعبے کے لیے خاص طور پر اتر پردیش اور دیگر ریاستوں کے لیے ایک تبدیلی کا لمحہ ہے۔ اپنے مضبوط ڈیزائن، اعلیٰ درجے کے اخراج پر قابو پانے کے نظام اور کول لنکیج کی یقین دہانی کے ساتھ، یہ منصوبہ آنے والے برسوں میں قابل اعتماد اور کفایتی بجلی فراہم کرنے کے لیے تیار ہے۔ کوئلہ کی وزارت اس طرح کے اقدامات کے لیے پرعزم ہے جو ملک کے لیے خود انحصار اور ماحول کے لحاظ سے ذمہ دار مستقبل کی تعمیر کے لیے حکومت ہند کے عزم کی تصدیق کرتی ہے۔

*********

ش ح۔ ف ش ع

U: 1310

 

(Release ID: 2132907)