ہندوستان کے سرکاری چیف سائنسی مشیر (پی ایس اے) کے دفتر نے آج "سرکاری فنڈ سے چلنے والی آر اینڈ ڈی تنظیموں کے اختراعی بہتری کے اشاریوں کی تشخیص" کے (راؤنڈ 2) مطالعاتی رپورٹ کا آغاز کیا، جس کا مقصد ہندوستان کے سرکاری فنڈ سے چلنے والے تحقیقی ماحولیاتی نظام میں اختراعی کارکردگی کو معیاری بنانا اور بہتر بنانا ہے۔ کنفیڈریشن آف انڈین انڈسٹری (سی آئی آئی) اور سینٹر فار ٹیکنالوجی، انوویشن اینڈ ایکنامک ریسرچ (سی ٹی آئی ای آر) نے اس مطالعہ کے لیے معلومات کے شراکت دار کے طور پر خدمات انجام دیں، اور اپنی مہارت کے ذریعے تشخیص کے لائحہء عمل کو مضبوط کیا۔

رپورٹ کو پروفیسر اجے کمار سود، ہندوستان کے سرکاری چیف سائنسی مشیر نے آج نئی دہلی میں منعقدہ 15ویں سی آئی آئی عالمی اختراعی اور آئی پی سمٹ 2025 کے دوران پیش کیا۔ اس تقریب میں ڈاکٹر پرویندر مینی، سائنسی سیکریٹری، پی ایس اے آفس، شری بی این ستی پتھی، پی ایس اے فیلو؛ ڈاکٹر راکیش کور، مشیر/سائنٹسٹ ’جی‘؛ محترمہ رمیا ہریداسن، سائنٹسٹ ’ڈی‘ اور حفصہ احمد، سائنٹسٹ ’ڈی‘ پی ایس اے آفس سے، اور سینئر صنعتی رہنما، محققین، اور تعلیمی و صنعتی نمائندے بھی موجود تھے۔

یہ مطالعہ اختراعی صلاحیت اور اثر کی تشخیص کے لیے ایک جدید لائحہء عمل پیش کرتا ہے، جو متعلقہ فریقوں کے ساتھ وسیع مشاورت اور مضبوط ڈیٹا تجزیہ کے ذریعے تیار کیا گیا ہے۔

لانچ کے موقع پر خطاب کرتے ہوئے، پروفیسر سود نے قومی ریسرچ اور ترقی کی کوششوں کو سماجی-اقتصادی ترجیحات کے ساتھ ہم آہنگ کرنے میں مضبوط تشخیص کے طریقہ کار کی اہمیت پر زور دیا۔ انہوں نے کہا، "یہ رپورٹ ادارہ جاتی بہتری اور پالیسی سازی کے لیے ایک اسٹریٹجک آلہ کے طور پر کام کرتی ہے۔ یہ ہندوستانی سائنس اور تحقیق کو عالمی سطح پر مسابقتی اور سماجی طور پر اثر انگیز بنانے کی ہماری اجتماعی خواہش کی عکاسی کرتی ہے۔" انہوں نے مزید کہا کہ یہ رپورٹ صرف ایک تشخیصی آلہ نہیں بلکہ ڈیٹا پر مبنی بصیرت اور اسٹریٹجک بینچ مارکنگ کے ذریعے ہندوستان کی اختراعی صلاحیتوں کو مضبوط کرنے کا ایک روڈ میپ ہے۔

اپنے خصوصی خطاب میں، ڈاکٹر مینی نے سرکاری فنڈ سے چلنے والے آر اینڈ ڈی اداروں کی قومی ترجیحات کو تبدیلی لانے والے حل میں ترجمہ کرنے کے اہم کردار پر زور دیا۔ انہوں نے کہا کہ یہ اختراعی عمدگی کے اشاریے آر اینڈ ڈی اداروں کی تشخیص اور بینچ مارکنگ کے لیے ایک قیمتی میٹرک پیش کرتے ہیں، جو بالآخر ایک مضبوط اور بااختیار اختراعی ماحولیاتی نظام کو فروغ دیتے ہیں۔

اپنے استقبالیہ کلمات میں، ڈاکٹر ادینت ملہوترا، چیئرمین، سی آئی آئی نیشنل کمیٹی آن ڈیزائن انوویشن اور سی ای او اینڈ منیجنگ ڈائریکٹر، ڈائنامک ٹیکنالوجیز لمیٹڈ نے کہا کہ ہندوستان کا آر اینڈ ڈی ماحولیاتی نظام ڈیزائن پر مبنی اختراع سے تیزی سے چل رہا ہے، جو تعاون اور تخلیقی صلاحیتوں کے ذریعے عالمی مسابقت کو فروغ دے رہا ہے۔

مسٹر مسعود ملک، چیئرمین، سی آئی آئی کباڑ کو کارآمد بنانے والی ٹیکنالوجیز کی نیشنل کمیٹی اور منیجنگ ڈائریکٹر اینڈ گروپ سی ای او، آر ای سسٹین ایبلٹی لمیٹڈ نے کہا کہ ویسٹ ٹو ورتھ ٹیکنالوجیز میں ریسرچ اور ترقّی کے پائیدار حل اور سرکلر اکانومی ماڈلز کو کھول رہا ہے جو ایک صاف مستقبل کے لیے ہیں۔

اظہارِ تشکر کی تقریر میں، جناب شاہین مجید، وائس چیئرمین، سی آئی آئی نیشنل کمیٹی آن انٹلیکچوئل پراپرٹی اور گلوبل سی ای او اینڈ منیجنگ ڈائریکٹر، سامی-سبینسا گروپ نے کہا کہ ایک مضبوط آئی پی لائحہء عمل ہندوستان کی آر اینڈ ڈی ترقی کے لیے ناگزیر ہے، جو سائنس اور صنعت میں اختراع کو بااختیار بناتا ہے۔

یہ مشق ہندوستان کی حکومت کی سرکاری فنڈ سے چلنے والے تحقیقی و ترقیاتی اداروں میں عمدگی، احتساب، اور اختراع کو فروغ دینے کی مسلسل وابستگی کی عکاسی کرتی ہے۔ اس مطالعہ میں 21 وزارتوں سے تعلق رکھنے والی 240 سے زائد آر اینڈ ڈی تنظیموں نے حصہ لیا۔

تشخیصی لائحہءعمل نے چھ کلیدی جہتوں پر توجہ دی—تحقیقی نتائج اور معیار، ٹیکنالوجی کی منتقلی اور کمرشلائزیشن، تعاون اور صنعتی شمولیت، دانشورانہ املاک کی تخلیق، سماجی اور پالیسی اثر، اور انسانی وسائل کی ترقی اور صلاحیت سازی۔ یہ اشاریے اداروں کی اختراعی کارکردگی کا ایک جامع نظریہ فراہم کرنے کے لیے ڈیزائن کیے گئے تھے۔

رپورٹ کے اجرا کے بعد، سمٹ میں ایک سیشن منعقد ہوا جس میں تکنیکی ترقی کے لیے موثر مشترکہ اختراعی ماحولیاتی نظام بنانے میں آر اینڈ ڈی شراکت داری کے اہم کردار پر تبادلہ خیال کیا گیا۔ ماہرین کے ایک پینل، جن میں پروفیسر کمل کشور پنت (ڈائریکٹر، آئی آئی ٹی روڑکی)، ڈاکٹر ویبھا ملهوترا ساہنی (سائنٹسٹ ایچ، سی ایس آئی آر ہیڈکوارٹرز)، ڈاکٹر ناگاہنومایا (ڈائریکٹر، سینٹرل مینوفیکچرنگ ٹیکنالوجی انسٹی ٹیوٹ)، مسٹر پی ایس جین (کارپوریٹ ٹیکنالوجی آفیسر، کاربورنڈم یونیورسل)، اور ڈاکٹر امیش سریواستو (ایگزیکٹو ڈائریکٹر، ٹیکنالوجی پروموشن اینڈ فورکاسٹنگ، انڈین آئل کارپوریشن لمیٹڈ) شامل تھے، نے تحقیقی تنظیموں، تعلیمی اداروں، حکومت، اور صنعت کے درمیان کامیاب تعاون کے لیے حکمت عملیوں اور ماڈلز پر تبادلہ خیال کیا۔ پینل کی میزبانی ڈاکٹر حفصہ احمد (سائنٹسٹ ڈی، پی ایس اے آفس) نے کی۔

رپورٹ تک رسائی: <پی ایس اے ویب سائٹ لنک> سے حاصل کی جا سکتی ہے

************

ش ح ۔   م د۔  م  ص

 (U : 368    )

(Release ID: 2125285) Visitor Counter : 10