زراعت اور کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے نیپال اور بھوٹان کے ساتھ دو طرفہ ملاقات کے دوران ہندوستانی وفد کی قیادت کی۔ ان کے ساتھ نیپال میں ہندوستان کے سفیر جناب  نوین سریواستو، جناب  سیموئل پروین کمار، جوائنٹ سکریٹری، ڈی اے اینڈ ایف ڈبلیو، ڈاکٹر ڈی کےیادو، ڈائرکٹر جنرل (کراپ سائنس) آئی سی اے آر اور ڈاکٹر اے کے مشرا، پرنسپل سائنسدان، آئی سی اے آر موجود تھے۔

زراعت اور کسانوں کی بہبود اور دیہی ترقی کے وزیر جناب شیوراج سنگھ چوہان اور نیپال کے زراعت اور مویشیوں کی ترقی کے وزیر جناب رام ناتھ ادھیکاری کے درمیان آج کھٹمنڈو میں دو طرفہ میٹنگ ہوئی۔ وزراء نے زراعت کے شعبے میں دوطرفہ تعاون کا جائزہ لیا اور دونوں ممالک کے باہمی فائدے کے لیے تعاون کو مزید بڑھانے کے طریقوں پر تبادلہ خیال کیا۔

زراعت کے شعبے میں تعاون پر ہندوستان اور نیپال کی حکومتوں کے درمیان مفاہمت کی ایک یادداشت پر دستخط ہوئے۔ یہ ایم او یو 6 دسمبر 1991 کو دونوں ممالک کے درمیان دستخط کئے گئے ایم او یو کی جگہ لے گا۔ یہ ایم او یو خاص طور پر فصلوں کی پیداواری صلاحیت کو بہتر بنانے، فصل کے بعد کے انتظام، زرعی تحقیق اور صلاحیت کی تعمیر، مارکیٹ تک رسائی، زرعی تجارت کے ساتھ ساتھ موسمیاتی لچکدار اور پائیدار زراعت جیسے شعبوں میں جاری تعاون کو ایک نئی تحریک دے گا۔

 

دونوں فریقوں نے نئے مفاہمت نامے کے تحت جوائنٹ ایگریکلچر ورکنگ گروپ (جے اے ڈبلیو جی) اجلاس بلانے اور انڈین کونسل فار ایگریکلچرل ریسرچ (آئی سی اے آر) اور نیپال ایگریکلچرل ریسرچ کونسل (این اے آر سی) کے درمیان تعاون پر تبادلہ خیال کیا۔ دونوں وزراء نے چتوان میں زرعی صنعتی پارک کے قیام کی ہندوستان کی تجویز پر پیش رفت کا جائزہ لیا۔ وزراء نے نیپال میں ہندوستان کے ہائی امپیکٹ کمیونٹی ڈیولپمنٹ پروجیکٹ (ایچ آئی سی ڈی پی) پروگرام کے تحت زرعی پروجیکٹوں کی پیش رفت کا بھی جائزہ لیا۔ دونوں اطراف نے مویشیوں کے شعبے میں تعاون اور دونوں ممالک کے زرعی تعلیمی اداروں کے درمیان ادارہ جاتی تعاون پر بھی تبادلہ خیال کیا۔

مرکزی وزیر جناب  چوہان نے بمسٹیک کے سکریٹری جنرل اندرامنی پانڈے سے ملاقات کی اور زراعت کے میدان میں ہندوستان اور بمسٹیک  پلیٹ فارم کے درمیان تعاون کے ممکنہ شعبوں پر تبادلہ خیال کیا۔ وزیر موصوف نے کہا کہ بمسٹیک ممالک کو مشترکہ چیلنجوں کا سامنا ہے جیسے کہ موسمیاتی تبدیلی، وسائل کی کمی، اور غذائی تحفظ اور غذائیت سے متعلق مسائل، جو علاقائی تعاون اور ایک دوسرے کے تجربات سے سیکھنے کے تبادلے پر زور دیتے ہیں۔ انہوں نے یہ بھی کہا کہ بمسٹیک  ممالک کو بمسٹیک  پلان آف ایکشن 2027-2023 کو کامیابی کے ساتھ نافذ کرنے کے لیے مل کر کام کرنے کی ضرورت ہے جسے 2022 میں 5ویں بمسٹیک سربراہی اجلاس میں اجتماعی طور پر اپنایا گیا تھا۔

وزیر موصوف نے حکومت کی طرف سے  جاری اقدامات کے ذریعے بمسٹیک زرعی تعاون کو مضبوط بنانے میں بامعنی شراکت کرنے کے ہندوستان کے عزم کا اعادہ کیا۔ ہندوستان کے مکمل طور پر فنڈڈ بمسٹیک زرعی اسکالرشپ پروگرام، اور بیج کے شعبے کی ترقی، جانوروں کی صحت اور کیڑوں کے انتظام اور نینو ٹیکنالوجی کے انتظام اور زراعت میں ریموٹ سینسنگ کے اطلاق جیسے ابھرتے ہوئے شعبوں پر تربیتی پروگرام اور ورکشاپس جو حال ہی میں منعقد کئے گئے تھے۔ وزیر  موصوف نے نئی دہلی میں زراعت میں مجوزہ بمسٹیک سنٹر آف ایکسیلنس کے قیام میں ہندوستان کے عزم کو اجاگر کیا۔

وزیرموصوف  جناب چوہان نے بھوٹان کے وزیر زراعت اور مویشی وزیر  لیونپو یونٹین پھنتشو کے ساتھ دو طرفہ میٹنگ کی۔ وزراء نے زراعت، مویشی اور اس سے منسلک شعبوں میں دوطرفہ تعاون کا جائزہ لیا جس میں آبپاشی کے طریقۂ کار  کی ترقی، میگا فارمز وغیرہ پر توجہ دی گئی۔

وزیر موصوف ؤنے بھوٹان کے ساتھ ہندوستان کے تعلقات کو آگے بڑھانے میں ہندوستان کے عزم پر زور دیا۔ بھوٹانی فریق نے وسائل کی رکاوٹوں پر زور دیا اور ہندوستانی فریق سے بھوٹانی اقدامات کے لیے اپنی مالی امداد میں اضافہ کرنے کی درخواست کی۔

وزیر موصوف جناب شیوراج سنگھ چوہان نے نیپال کے وزیراعظم  جناب کے پی شرما اولی سے ملاقات کی۔   دونوں رہنماؤں نے ہندوستان اور نیپال کے درمیان قریبی اور دوستانہ تعلقات کا اعادہ کیا اور زراعت کے شعبے میں ہندوستان-نیپال تعاون کو مزید مستحکم کرنے کے طریقوں پر تبادلہ خیال کیا۔ وزراء نے امید ظاہر کی کہ نئے دستخط شدہ مفاہمت نامے سے دونوں ممالک کے درمیان زراعت اور اس سے متعلقہ شعبوں میں تعاون میں اضافہ کی راہ ہموار ہوگی۔

وزیر موصوف  جناب شیوراج سنگھ چوہان نے چتوان میں ایک زرعی صنعتی پارک اور نیپال میں ایک کھاد پلانٹ کے قیام کے ذریعے زراعت اور اس سے منسلک شعبوں میں نیپال کی مدد کرنے کے ہندوستان کے عزم کا اعادہ کیا۔طرفین نے مارکیٹ تک رسائی کے مسائل پر بھی تبادلہ خیال کیا۔

***

ش ح۔ ک ا۔ ع ر

(Release ID: 2120844)