మైనింగ్ రంగంలో ఇరు దేశాల మధ్య సహకారాన్ని పెంపొందించే లక్ష్యంతో భారత్-చిలీ మైనింగ్ పరిశ్రమల రౌండ్ టేబుల్ సమావేశంలో కీలక చర్చలు జరిగాయి. భారత ఉన్నత స్థాయి ప్రతినిధి బృందానికి బొగ్గు, గనుల శాఖ మంత్రి శ్రీ జీ.కిషన్ రెడ్డి నేతృత్వం వహించారు. గనుల మంత్రిత్వ శాఖ కార్యదర్శి శ్రీ వీ.ఎల్.కాంతారావు, మంత్రిత్వ శాఖకు చెందిన సీనియర్ అధికారులు, కోల్ ఇండియా లిమిటెడ్ (సీఐఎల్), హిందుస్థాన్ కాపర్ లిమిటెడ్ (హెచ్‌సీఎల్), హిందాల్కో, వేదాంత, అదానీ, జేఎస్‌డబ్ల్యూ, జేఎస్పీఎల్ వంటి ప్రముఖ భారతీయ కంపెనీల సీఎండీలు, సీఈఓలు భారత ప్రతినిధి బృందంలో ఉన్నారు. చిలీ ప్రతినిధి బృందానికి చిలీ గనుల శాఖ మంత్రి హెచ్.ఈ.అరోరా విలియమ్స్ నేతృత్వం వహించారు.

రాగి, లిథియం, ఇతర కీలక ఖనిజాలకు సంబంధించి చిలీతో సహకారాన్ని బలోపేతం చేయడానికి భారత్‌ కట్టుబడి ఉందని శ్రీ జీ.కిషన్ రెడ్డి ప్రధానంగా తెలియజేశారు. దేశ పారిశ్రామిక వృద్ధి, సుస్థిర ఇంధనానికి పరివర్తనలో ఈ ఖనిజాలకు పెరుగుతున్న ప్రాముఖ్యతను ముఖ్యంగా ప్రస్తావించారు. 

చిలీ గనుల మంత్రి అరోరా విలియమ్స్ మాట్లాడుతూ.. ప్రపంచ మైనింగ్ రంగంలో ముఖ్యంగా రాగి, లిథియంలో చిలీ నాయకత్వం గురించి మాట్లాడారు. రెండు దేశాల ఖనిజ అవసరాలను తీర్చడానికి, హరిత సాంకేతికతలకు పరివర్తన చెందడానికి సహాయపడేందుకు భారత్‌తో సహకారాన్ని పెంచుకోవటంపై ఉత్సాహంగా ఉన్నట్లు తెలియజేశారు. 

ఈ రౌండ్ టేబుల్ సమావేశాన్ని ఇంటర్నేషనల్ కాపర్ అసోసియేషన్ నిర్వహించింది. ఖనిజ అన్వేషణ, సుస్థిర మైనింగ్ పద్ధతులు, విలువ ఆధారిత ఖనిజ ప్రాసెసింగ్‌తో సహా మైనింగ్ రంగంలోని వివిధ కీలక విభాగాలల్లో ద్వైపాక్షిక సహకారాన్ని పెంచుకోవటంపై భారత్ దృష్టి సారించింది. భూగర్భ శాస్త్రం, ఖనిజ వనరులపై ప్రస్తుతం ఉన్న భారత్-చిలీ అవగాహన ఒప్పందాన్ని పునరుద్ధరించడం, కీలకమైన ఖనిజాలకు సంబంధించి సహకారం కోసం మరింత దృఢమైన, భవిష్యత్తుకు సిద్ధంగా ఉన్న ఫ్రేమ్‌వర్క్ ఉండేలా చూసుకోవటంపై కూడా చర్చలు జరిగాయి.

కీలకమైన ఖనిజాలైన రాగి, లిథియంతో పాటు భూమిలో దొరికే అరుదైన మూలకాలకు భారత్‌లో డిమాండ్ పెరుగుతూనే ఉన్నందున ఎలక్ట్రిక్ రవాణా, పునరుత్పాదక శక్తి, ఎలక్ట్రానిక్స్ తయారీ వంటి రంగాల్లో ఈ ఖనిజాల వ్యూహాత్మక ప్రాముఖ్యతను ఈ సమావేశం ప్రధానంగా తెలియజేసింది. ఈ సహకారంతో ఉమ్మడి సంస్థలు, దీర్ఘకాలిక సరఫరా ఒప్పందాలు, సీమాంతర పెట్టుబడులకు కొత్త అవకాశాలను అందిపుచ్చుకోవాలని ఇరు దేశాలు లక్ష్యంగా పెట్టుకున్నాయి.

రాగి, లిథియం ఉత్పత్తిలో ప్రపంచ అగ్రగామిగా ఉన్న చిలీ గ్రీన్ ఫీల్డ్, బ్రౌన్ ఫీల్డ్ మైనింగ్ ప్రాజెక్టుల ద్వారా ఈ ఖనిజాలను పొందాలనుకునే భారత కంపెనీలకు మంచి అవకాశాలను అందిస్తుంది. సాంకేతిక పరిజ్ఞానం బదిలీ, సుస్థిర మైనింగ్‌లో ఉత్తమ పద్ధతులు, ప్రపంచ ఖనిజ సరఫరా గొలుసును బలోపేతం చేయడంపై ఈ సమావేశంలో చర్చించారు.

ఈ సరికొత్త సహకారం భారత్, చిలీ మధ్య ఆర్థిక సంబంధాలను పెంపొందించమే కాకుండా రెండు దేశాల దీర్ఘకాలిక ఇంధన, ఆర్థిక లక్ష్యాలకు మద్దతు ఇచ్చే ధృడమైన, స్థిరమైన మైనింగ్ సరఫరా వ్యవస్థను తయారు చేయాలని లక్ష్యంగా పెట్టుకుంది. పరస్పర వృద్ధి, సాంకేతికత బదిలీ, మైనింగ్ విషయంలో సుస్థిర భవిష్యత్తును పెంపొందించడంలో ఈ రౌండ్ టేబుల్ సమావేశం కీలకమైన పరిణామంగా చెప్పుకోవచ్చు. 

 

***

(Release ID: 2117639) Visitor Counter : 15