ملک کے دفاعی اہلکاروں کی ذہنی تندرستی کو بہتر بنانے کی سمت میں ایک اہم قدم اٹھاتے ہوئے ، آرمڈ فورسز میڈیکل سروسز اور نیشنل انسٹی ٹیوٹ آف مینٹل ہیلتھ اینڈ نیورو سائنسز(این آئی ایم ایچ اے این ایس) نے باہمی تعاون پر مبنی تحقیق اور تربیت کے لیے ایک مفاہمت نامے پر دستخط کیے ہیں جس کا مقصد مسلح افواج کے لیے ذہنی صحت کے واسطے  مدد اور دیکھ بھال فراہم کرنا ہے ۔

اس مفاہمت نامے پر سرجن وائس ایڈمرل آرتی سرین ، اے وی ایس ایم ، وی ایس ایم ، ڈائریکٹر جنرل آرمڈ فورسز میڈیکل سروسز اور ڈاکٹر پرتیما مورتی، ڈائریکٹر این آئی ایم ایچ اے این ایس( نیم ہنس) نے ایک تقریب میں دستخط کیے جس میں دونوں اداروں کے سینئر عہدیداروں نے شرکت کی۔  اے ایف ایم ایس اور نیم ہنس کے درمیان تعاون ذہنی صحت کی خدمات کو مضبوط بنانے ، طبی عملے کے لیے خصوصی تربیت کے انعقاد اور فوجیوں ، بحریہ اورفضائیہ کے اہلکاروں،  ان کے اہل خانہ اور ان کے زیر کفالت افراد کو درپیش ذہنی صحت کے مسائل کو حل کرنے کے لیے اختراعی پروگرام تیار کرنے پر مرکوز ہوگا ۔

مفاہمت نامے کے کلیدی مقاصد میں باہمی تعاون پر مبنی تحقیق ، اساتذہ کا تبادلہ اور تعلیمی سرگرمیاں شامل ہیں ۔ نیم ہنس ، نیورو سائیکاٹری میں اپنی مہارت کے ساتھ ، اعلی درجے کی نفسیاتی نگہداشت پر تحقیق کرنے اور فوجی اہلکاروں کو مدد فراہم کرنے ، پوسٹ ٹرامیٹک اسٹریس ڈس آرڈر (پی ٹی ایس ڈی) بے چینی اور تنا ؤ جیسے عام مسائل کو حل کرنے میں مدد فراہم کرے گا ۔

سرجن  وائس ایڈمرل آرتی سرین نے ایک بیان میں کہا کہ ہمارے فوجیوں کی ذہنی صحت اتنی ہی اہم ہے جتنی ان کی جسمانی صحت ۔ نیم ہنس کے ساتھ یہ شراکت داری اس بات کو یقینی بنائے گی کہ ہمارے اہلکاروں کو ہمارے ملک کی خدمت کرتے ہوئے درپیش چیلنجوں سے نمٹنے کے لیے بہترین ممکنہ مدد ملے ۔

نیم ہنس کی ڈائریکٹر ڈاکٹر پرتیما مورتی نے کہا کہ ذہنی صحت کی دیکھ بھال میں انسٹی ٹیوٹ کی مہارت کو دفاعی شعبے میں لانے کے لیے آرمڈ فورسز میڈیکل سروسز کے ساتھ تعاون کرنا اعزاز کی بات ہے ۔ اس کا مقصد ان لوگوں کو عالمی معیار کی مدد فراہم کرنا ہوگا جو ہماری قوم کی خدمت کرتے ہیں ، اس بات کو یقینی بناتے ہوئے کہ انہیں ذہنی صحت کی دیکھ بھال ملے جس کے وہ حقدار ہیں ۔

یہ باہمی تعاون کا منصوبہ مسلح افواج کے اہلکاروں کے لیے ذہنی صحت کی اہمیت کو تسلیم کرنے کے لیے ایک اہم قدم ہے اور توقع ہے کہ یہ ملک بھر میں اسی طرح کے اقدامات کے لیے ایک معیار قائم کرے گا ۔ دونوں تنظیمیں جامع ذہنی صحت کی خدمات فراہم کرنے کے لیے پرعزم ہیں جو مسلح افواج کی مجموعی فلاح و بہبود میں معاون ہیں ۔

-----------------------

ش ح۔م ش ۔ ع ن

U NO: 8562