لوک سبھا کے اسپیکر جناب اوم برلا نے آج اس بات پر زور دیا کہ مالیاتی قوانین میں سادگی اور شفافیت کے حالیہ اقدامات نے ہندوستان میں سرمایہ کاری کے لیے ایک سازگار ماحول فراہم کیا ہے۔ انہوں نے کہا کہ گہرے جمہوری جذبے، مستحکم حکومت اور دور اندیش قیادت کے ساتھ آج کا ہندوستان سرمایہ کاروں کے لیے بے پناہ مواقع کی سرزمین ہے۔ انہوں نے مزید کہا کہ دنیا میں سب سے تیزی سے ترقی کرنے والی معیشت دنیا بھر میں سرمایہ کاری کے لیے ایک پسندیدہ مقام ہے۔

جناب برلا نے یہ بات نئی ​​دہلی میں انسٹی ٹیوٹ آف کاسٹ اکاؤنٹنٹس آف انڈیا (آئی سی اے آئی) کے شمالی بھارت کے علاقائی مرکز  میں   ‘‘ میرا وکست بھارت- 2047 : بدلتے منظر نامے  کو  اپنانا’’ کے عنوان کے تحت منعقدہ دو روزہ سمپوزیم کے افتتاحی اجلاس سے خطاب کے دوران کہی۔ اس  دوران جناب فگن سنگھ کلستے، محترمہ بنسوری سوراج، دونوں ممبران پارلیمنٹ اور دیگر معززین موجود تھے ۔

ہندوستان میں قانونی اصلاحات کا ذکر کرتے ہوئے، جناب برلا نے نوٹ کیا کہ ہندوستان میں پہلی بار نوآبادیاتی قوانین کو تبدیل کرنے، فرسودہ قوانین کو منسوخ کرنے اور نئے قوانین بنانے کی کوشش کی گئی ہے ،جو نئے ہندوستان کے لوگوں کی امیدوں اور امنگوں سے ہم آہنگ ہیں۔ جی ایس ٹی، مجوزہ انکم ٹیکس قانون سازی، لیبر قوانین اور کمپنی قوانین میں تبدیلیوں کا ذکر کرتے ہوئے، جناب برلا نے زور دیا کہ یہ اقدامات ملک کو ترقی اور خوشحالی کی راہ پر گامزن کرنے کے قیادت کے وژن کی عکاسی کرتے ہیں۔ انہوں نے کہا کہ نئے قوانین نہ صرف سادہ، شفاف اور ترقی پسند ہیں بلکہ معاشرے  میں صف  آخر کے فرد کی زندگی کو بہتر  بناتے  ہیں۔ انہوں نے مزید کہا کہ ترقی پسند قوانین ہمیشہ ملک اور معاشرے کی بدلتی ہوئی ضروریات اور بدلتے ہوئے بین الاقوامی منظر نامے کو ملحوظ  خاطر  رکھتے ہیں۔

بنیادی  ڈھانچے ، روڈ کنیکٹیویٹی، ریل کنیکٹیویٹی، ہوائی رابطہ کے شعبوں میں ہونے والی ترقیوں کا ذکر کرتے ہوئے انہوں  کہا کہ ملک میں مزید سرمایہ کاری لانے کی صلاحیت کو بڑھایا  گیا ہے، جناب برلا نے مشاہدہ کیا کہ ان سرمایہ کاری سے بالآخر سماج کو بڑے پیمانے پر فائدہ ہوگا۔ انہوں نے بہتر مستقبل کے لیے پائیدار زندگی گزارنے کے  وزیر اعظم کی  اپیل  کا بھی ذکر کیا۔ انہوں نے مزید کہا کہ ہندوستان لوگوں کو پائیدار زندگی کے راستے پر چلنے کی ترغیب دینے میں دنیا کی قیادت کر رہا ہے۔

ہندوستان کے مالیاتی اداروں کو  اس کی طاقت  قرار دیتے ہوئے جناب برلا نے نوٹ کیا کہ ہمارے مالیاتی ادارے پوری دنیا میں احترام  حاصل کرتے  ہیں۔ آئی سی اے آئی کے تعاون کو سراہتے ہوئے، جناب  برلا نے رائے دی کہ یہ ادارہ نہ صرف مالیاتی نظام میں شفافیت کو یقینی بنانے میں اہم کردار ادا کررہا   ہے، بلکہ کم سے کم لاگت کے ساتھ بڑے پیمانے پر پیداوار حاصل  کرنے میں ملک کی رہنمائی بھی کرر  ہا ہے۔ ملک کی اقتصادی صلاحیت کو مضبوط بنانے میں اہم کردار ادا کرتے ہوئے، آئی سی اے آئی ، اپنی  منیجمنٹ صلاحیتوں کے ساتھ، لوگوں کی زندگیوں کو بہتر بنا رہا ہے۔ انہوں نے امید ظاہر کی کہ دو روزہ سمپوزیم، سال 2047 تک ہندوستان کو ایک ترقی یافتہ ملک بنانے کے وزیر اعظم کے عزم کو پورا کرنے کے لئے آئی سی اے آئی کے تعاون کے بارے میں نقشہ  راہ  فراہم کرے گا۔

لوک سبھا کے اسپکرI نے  انسٹی ٹیوٹ آف  کاسٹ  اکاؤنٹنٹس آف انڈیا  کی جانب سے ‘‘ میرا وکست بھارت- 2047 : بدلتے منظر نامے  کو  اپنانا’’ کے عنوان کے تحت منعقدہ دو روزہ سمپوزیم کے افتتاحی اجلاس سے خطاب کا۔

************

U.No:7794

ش ح۔ضر۔ق ر