محنت اور روزگار اور نوجوانوں کے امور اور کھیل کے مرکزی وزیر ڈاکٹر  منسکھ مانڈویہ نے وزارت محنت و روزگار کے تحت اہم اداروں کا جائزہ لینے کیلئے آج چنڈی گڑھ کا دورہ کیا۔ اپنے دورے کے دوران، مرکزی وزیر نے لیبر بیورو اور ایمپلائیز اسٹیٹ انشورنس کارپوریشن  (ای ایس آئی سی) ماڈل اسپتال، چنڈی گڑھ کا معائنہ کیا، جہاں انہوں نے جاری منصوبوں کا جائزہ لیا اور متعلقہ فریقین  سے بات چیت کی۔

لیبر بیورو میں، مرکزی وزیر کو لیبر بیورو کی مختلف سرگرمیوں اور اسکیموں کے بارے میں ایک تفصیلی پریزنٹیشن دی گئی۔ انہیں مختلف سرگرمیوں کے مقاصد، دائرہ کار اور موجودہ حیثیت سے آگاہ کیا گیا، جن میں قیمتوں کے اشاریے، محنت سے متعلق اعداد و شمار اور سروے شامل ہیں۔

کارکنوں کی فلاح و بہبود کے لیے حکومت کے عزم پر زور دیتے ہوئے، ڈاکٹر مانڈویہ نے اقتصادی ترقی، حکمرانی، اور خدمات کی فراہمی کو بڑھانے میں ڈیٹا پر مبنی فیصلہ سازی کے اہم کردار کو اجاگر کیا۔

مرکزی وزیر نے لیبر بیورو میں پنجاب اور ہماچل پردیش زون کے تحت ای پی ایف او (ایمپلائیز پروویڈنٹ فنڈ آرگنائزیشن) کے علاقائی دفاتر کی کارکردگی اور اقدامات کا بھی جائزہ لیا۔ محنت کشوں کی فلاح و بہبود کے لیے حکومت کے عزم پر زور دیتے ہوئے، مرکزی وزیر نے اس بات کو اجاگر کیا کہ آئی ٹی سسٹم میں اصلاحات مسلسل ای پی ایف او کے کام کے طریقہ کار میں بہتری لا رہی ہیں۔

بعد ازاں، مرکزی وزیر نے چنڈی گڑھ میں ای ایس آئی سی ماڈل اسپتال کا دورہ کیا اور اسپتال کی سہولیات کا معائنہ کیا، جن میں او پی ڈی رجسٹریشن کاؤنٹر، فارمیسی، لیبارٹری، ریڈیالوجی یونٹ، ہائی ڈپینڈنسی یونٹ (ایچ ڈی یو)، او پی ڈی اور ایمرجنسی شعبے شامل تھے۔

اپنے دورے کے دوران، ڈاکٹر مانڈویہ نے اسپتال میں زیر علاج مریضوں کے ساتھ بات چیت کی اور انہیں اس بات کا یقین دلایا کہ حکومت کارکنوں اور ان کے خاندانوں کے لیے صحت کی معیاری خدمات فراہم کرنے کے لیے پرعزم ہے۔

اسپتال کے کانفرنس ہال میں ایک پاورپوائنٹ پریزنٹیشن کا انعقاد کیا گیا جس میں مرکزی وزیر کو اسپتال کے آپریشنز، مقاصد اور وژن کے ساتھ ساتھ علاقائی دفتر کے کام کاج کے بارے میں تفصیلات بتائی گئیں۔

************

ش ح ۔   م  د ۔  م  ص

 (U :   7465   )