وائس ایڈمرل کے کے نیر یادگاری خطبے کا 2025 ایڈیشن 14 فروری 2025کو نیشنل میری ٹائم فاؤنڈیشن (این ایم ایف) کے 20 ویں یوم تاسیس کے موقع پر منعقد ہوا۔ یہ پروقار تقریب وائس ایڈمرل کے کے نیر کی پائیدار وراثت کی یاد دلاتی ہے، جن کے وژن اور دانشورانہ محنت نے نیشنل میری ٹائم فاؤنڈیشن کو سمندری فکر اور پالیسی کی وکالت کے اہم ادارے کے طور پر مستحکم کیا۔

وائس ایڈمرل نیر نہ صرف ایک ماہر بحریہ کے افسر تھے بلکہ بے مثال دور اندیشی کے حامل اسٹریٹجک مفکر بھی تھے۔ انھوں نے بھارت کے سمندری کورنظری کو دور کرنے اور ایک مضبوط سمندری شعور کو فروغ دینے کی کوششوں میں اہم کردار ادا کیا۔ این ایم ایف کے بانی چیئرمین کی حیثیت سے اور وویکانند انٹرنیشنل فاؤنڈیشن (وی آئی ایف) کے قیام میں اہم کردار ادا کرنے کے بعد، ایڈمرل نیر کی خدمات بھارت میں میری ٹائم اور اسٹریٹجک فکر کے لیے تحریک کا منبع بنی ہوئی ہیں۔

مذکورہ تقریب کا آغاز سابق چیف آف دی نیول اسٹاف اور چیئرمین این ایم ایف ایڈمرل کرم بیر سنگھ (ریٹائرڈ) نے افتتاحی کلمات سے کیا۔ اس کے بعد چیف آف دی نیول اسٹاف ایڈمرل دنیش کے ترپاٹھی نے ایک بصیرت افروز تقریر کی جس میں وائس ایڈمرل کے کے نیر کی وراثت کی اہمیت اور ملک کی ترقی کے راستے میں بحری شعور کی اہمیت کو اجاگر کیا ۔ سی این ایس نے بھارت کے اہم میری ٹائم تھنک ٹینک کے طور پر نیشنل میری ٹائم فاؤنڈیشن کے کردار کو اجاگر کیا ، جو ملک کی ترقی اور سلامتی کے لیے اہم سمندری امور کے مطالعہ اور وکالت کے لیے وقف ہے ، جو اپنی تحقیق ، اشاعتوں اور پالیسی سفارشات کے ذریعہ بھارت کے سمندری مستقبل کو قوم کی امنگوں کے مطابق تشکیل دینا جاری رکھے ہوئے ہے۔ انھوں نے مستحکم اور محفوظ سمندری ماحول کو یقینی بنانے میں بھارتی بحریہ کے بڑھتے ہوئے کردار پر زور دیا ، جس کی مثال اس کے جاری میری ٹائم سیکورٹی مشن اور بڑھتے ہوئے علاقائی تعاون سے ملتی ہے۔ سی این ایس نے وہاں موجود لوگوں پر زور دیا کہ وہ وائس ایڈمرل نیر کی وراثت کا احترام کرتے ہوئے بھارت کی بحری صلاحیتوں اور اسٹریٹجک وژن کو مستحکم کرنا جاری رکھیں۔

سی این ایس کے خطاب کے بعد جمہوریہ ہند کے سابق صدر جناب رام ناتھ کووند نے ’وائس ایڈمرل کے کے نیر میموریل لیکچر‘ پیش کیا۔ اپنی حکمت عملی اور دور اندیشانہ قیادت کے لیے مشہور جناب کووند کے لیکچر کا موضوع ’’بھارت میں سمندری شعور میں اضافہ: قومی خوشحالی اور سلامتی کے لیے ایک اسٹریٹجک لازمہ‘‘ تھا۔ ان کے خطاب میں 2047 تک وکست بھارت بننے کی ملک کی امنگوں کو پورا کرنے میں سمندری شعبے کے رول کو اجاگر کیا گیا۔

اپنی گفتگو میں جناب کووند نے عالمی جغرافیائی سیاسی منظر نامے میں بھارت کے بحری وسائل، تجارتی راستوں اور اسٹریٹجک پوزیشننگ کی اہم اہمیت پر زور دیا۔ انھوں نے اقتصادی ترقی کو بڑھانے ، قومی سلامتی کو مضبوط بنانے اور بحر ہند و بحرالکاہل کے خطے میں ایک اہم طاقت کے طور پر بھارت کے قد کو مستحکم کرنے کے لیے ایک مضبوط بحری ثقافت کو فروغ دینے پر زور دیا۔

اس تقریب میں بھارتی دفاعی افواج کے سینئر حاضر سروس اور ریٹائرڈ افسران، سفارتی برادری کے ارکان، ممتاز ماہرین تعلیم، اسٹریٹجک ماہرین اور آنجہانی  وائس ایڈمرل کے کے نیر کے قریبی دوستوں اور اہل خانہ نے شرکت کی۔

نیشنل میری ٹائم فاؤنڈیشن بحری بیداری کو فروغ دینے، باخبر پالیسی سازی کو فروغ دینے اور بھارت کے سمندری شعبے میں پائیدار ترقی کی وکالت کرکے ایڈمرل نیر کی وراثت کو آگے بڑھانا جاری رکھے ہوئے ہے۔

***

(ش ح – ع ا)

U. No. 7081

(रिलीज़ आईडी: 2103389) आगंतुक पटल : 46