ਸੰਚਾਰ, ਇਲੈਕਟ੍ਰਾਨਿਕਸ ਅਤੇ ਡਿਜੀਟਲ ਟੈਕਨੋਲੋਜੀਆਂ 'ਤੇ ਤੀਜੀ ਐੱਨਆਈਈਐੱਲਆਈਟੀ ਅੰਤਰਰਾਸ਼ਟਰੀ ਕਾਨਫਰੰਸ (ਐੱਨਆਈਸੀਈਡੀਟੀ 2025) ਦਾ ਉਦਘਾਟਨ ਅੱਜ, 14 ਫਰਵਰੀ, 2025 ਨੂੰ ਨੈਸ਼ਨਲ ਇੰਸਟੀਚਿਊਟ ਆਫ਼ ਇਲੈਕਟ੍ਰਾਨਿਕਸ ਐਂਡ ਇਨਫਰਮੇਸ਼ਨ ਟੈਕਨੋਲੋਜੀ (ਐੱਨਆਈਈਐੱਲਆਈਟੀ) ਰੋਪੜ, ਪੰਜਾਬ ਵਿਖੇ ਕੀਤਾ ਗਿਆ। ਦੋ ਦਿਨਾਂ ਤੱਕ ਚੱਲਣ ਵਾਲੀ ਇਹ ਕਾਨਫਰੰਸ, ਦੁਨੀਆ ਭਰ ਦੇ ਖੋਜਕਰਤਾਵਾਂ, ਸਿੱਖਿਆ ਸ਼ਾਸਤਰੀਆਂ, ਉਦਯੋਗ ਪੇਸ਼ੇਵਰਾਂ ਅਤੇ ਵਿਦਿਆਰਥੀਆਂ ਦੇ ਇੱਕ ਵਿਭਿੰਨ ਸਮੂਹ ਨੂੰ ਇੱਕ ਮੰਚ ਇਕੱਠਾ ਕਰਦੀ ਹੈ ਤਾਂ ਜੋ ਅਤਿ-ਆਧੁਨਿਕ ਸੂਚਨਾ, ਇਲੈਕਟ੍ਰਾਨਿਕਸ ਅਤੇ ਸੰਚਾਰ ਟੈਕਨੋਲੋਜੀ (ਆਈਈਸੀਟੀ) ਖੇਤਰਾਂ ਵਿੱਚ ਗਿਆਨ ਦੇ ਆਦਾਨ-ਪ੍ਰਦਾਨ ਅਤੇ ਸਹਿਯੋਗ ਨੂੰ ਉਤਸ਼ਾਹਿਤ ਕੀਤਾ ਜਾ ਸਕੇ।

ਇਸ ਕਾਨਫਰੰਸ ਦਾ ਉਦਘਾਟਨ ਮੁੱਖ ਮਹਿਮਾਨ ਡਾ. ਅਨਿਲ ਕੁਮਾਰ ਤ੍ਰਿਪਾਠੀ, ਡਾਇਰੈਕਟਰ, ਇੰਡੀਅਨ ਇੰਸਟੀਚਿਊਟ ਆਫ਼ ਸਾਇੰਸ ਐਜੂਕੇਸ਼ਨ ਐਂਡ ਰਿਸਰਚ (ਆਈਆਈਐੱਸਈਆਰ) ਮੋਹਾਲੀ ਨੇ ਕੀਤਾ, ਜਿਨ੍ਹਾਂ ਨੇ ਆਪਣੇ ਮੁੱਖ ਭਾਸ਼ਣ ਵਿੱਚ ਸਮਾਜਿਕ ਵਿਕਾਸ ਲਈ ਤਕਨੀਕੀ ਨਵੀਨਤਾ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਅਜਿਹੀਆਂ ਕਾਨਫਰੰਸਾਂ, ਮੀਟਿੰਗਾਂ ਜਾਂ ਵਿਚਾਰਕ ਚਰਚਾਵਾਂ ਨਾਲ, ਅਸੀਂ ਹਰੇਕ ਵਿਅਕਤੀ ਨੂੰ ਸਸ਼ਕਤ ਬਣਾਉਣ ਦੇ ਟੀਚੇ ਨੂੰ ਪ੍ਰਾਪਤ ਕਰਨ ਦੀ ਕੋਸ਼ਿਸ਼ ਕਰਦੇ ਹਾਂ।

ਐੱਨਆਈਈਐੱਲਆਈਟੀ ਡੀਮਡ ਟੂ ਬੀ ਯੂਨੀਵਰਸਿਟੀ ਦੇ ਪਹਿਲੇ ਵਾਈਸ-ਚਾਂਸਲਰ ਅਤੇ ਐੱਨਆਈਈਐੱਲਆਈਟੀ ਦੇ ਡੀਜੀ ਡਾ. ਮਦਨ ਮੋਹਨ ਤ੍ਰਿਪਾਠੀ ਨੇ ਟੈਕਨੋਲੋਜੀ ਦੇ ਦ੍ਰਿਸ਼ ਵਿੱਚ ਉੱਭਰ ਰਹੇ ਮੌਕਿਆਂ ਅਤੇ ਚੁਣੌਤੀਆਂ ਅਤੇ ਐੱਨਆਈਈਐੱਲਆਈਟੀ ਦੀ ਮਹੱਤਵਪੂਰਨ ਭੂਮਿਕਾ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਦੱਸਿਆ ਕਿ ਐੱਨਆਈਈਐੱਲਆਈਟੀ ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਆਪਣੀ ਅੰਡਰ ਗ੍ਰੈਜੂਏਟ ਪੜ੍ਹਾਈ ਦੌਰਾਨ ਉਤਪਾਦ ਬਣਾਉਣਾ ਸ਼ੁਰੂ ਕਰਨਾ ਹੈ ਅਤੇ ਐੱਨਆਈਈਐੱਲਆਈਟੀ ਨੇ ਪਹਿਲਾਂ ਹੀ ਇਸ 'ਤੇ ਕੰਮ ਕੀਤਾ ਹੈ ਅਤੇ ਇੰਟਲ ਨਾਲ ਸਹਿਯੋਗ ਕੀਤਾ ਹੈ ਅਤੇ ਨੋਇਡਾ ਵਿੱਚ ਇੱਕ ਇੰਡੀਆ ਏਆਈ ਲੈਬ ਸਥਾਪਤ ਕੀਤੀ ਹੈ। “ਆਪਣੀ ਸ਼ਾਨਦਾਰ ਸਫਲਤਾ ਤੋਂ ਬਾਅਦ, ਐੱਨਆਈਈਐੱਲਆਈਟੀ ਸਮੁੱਚੇ ਭਾਰਤ ਵਿੱਚ ਅਜਿਹੀਆਂ 27 ਹੋਰ ਇੰਡੀਆ ਏਆਈ ਲੈਬਾਂ ਸਥਾਪਤ ਕਰਨ ਜਾ ਰਿਹਾ ਹੈ, ਜੋ ਦੇਸ਼ ਵਿੱਚ ਏਆਈ ਸਿਖਲਾਈ ਲਈ ਇੱਕ ਕੇਂਦਰ ਹੋਣਗੇ। ਐੱਨਆਈਈਐੱਲਆਈਟੀ ਅਗਲੇ ਸਾਲ ਏਆਈ ਵਿੱਚ ਇੰਟਲ ਦੇ ਨਾਲ ਇੱਕ ਵਿਸ਼ੇਸ਼ ਤੌਰ 'ਤੇ ਤਿਆਰ ਕੀਤਾ ਗਿਆ ਬੀ ਟੈੱਕ ਪ੍ਰੋਗਰਾਮ ਵੀ ਸ਼ੁਰੂ ਕਰਨ ਜਾ ਰਿਹਾ ਹੈ। ਇਲੈਕਟ੍ਰਾਨਿਕਸ ਦੇ ਖੇਤਰ ਵਿੱਚ, ਐੱਨਆਈਈਐੱਲਆਈਟੀ ਨੇ ਪਹਿਲਾਂ ਹੀ ਟਾਟਾ ਇਲੈਕਟ੍ਰਾਨਿਕਸ ਨਾਲ ਇੱਕ ਸਮਝੌਤਾ ਪੱਤਰ 'ਤੇ ਹਸਤਾਖਰ ਕੀਤੇ ਹਨ ਅਤੇ ਗੁਹਾਟੀ ਵਿੱਚ ਉਨ੍ਹਾਂ ਦੀ ਓਐੱਸਏਟੀ ਸਹੂਲਤ ਲਈ ਇੱਕ ਪ੍ਰੋਗਰਾਮ ਤਿਆਰ ਕੀਤਾ ਹੈ। ਐੱਨਆਈਈਐੱਲਆਈਟੀ ਵਿਦਿਆਰਥੀਆਂ ਨੂੰ ਨੌਕਰੀ 'ਤੇ ਉਦਯੋਗਿਕ ਸਿਖਲਾਈ ਦੀ ਸਹੂਲਤ ਦੇਣ ਲਈ ਉਦਯੋਗ ਦੇ ਨਾਲ-ਨਾਲ ਆਪਣਾ ਯੂਨੀਵਰਸਿਟੀ ਕੈਂਪਸ ਸਥਾਪਤ ਕਰ ਰਿਹਾ ਹੈ। ਐੱਨਆਈਈਐੱਲਆਈਟੀ ਗੁਹਾਟੀ, ਤਿਰੂਪਤੀ ਅਤੇ ਭੁਵਨੇਸ਼ਵਰ ਵਿੱਚ ਉਦਯੋਗ ਹੱਬਾਂ ਦੇ ਨੇੜੇ ਆਪਣਾ ਕੈਂਪਸ ਖੋਲ੍ਹ ਰਿਹਾ ਹੈ। ਐੱਨਆਈਈਐੱਲਆਈਟੀ ਨੇ ਸਕਾਈਯੂਟ ਏਅਰੋਸਪੇਸ ਪ੍ਰਾਈਵੇਟ ਲਿਮਟਿਡ ਨਾਲ ਵੀ ਇੱਕ ਸਮਝੌਤਾ ਪੱਤਰ 'ਤੇ ਹਸਤਾਖਰ ਕੀਤੇ ਹਨ ਅਤੇ ਏਅਰੋਸਪੇਸ ਦੇ ਖੇਤਰ ਵਿੱਚ ਉਨ੍ਹਾਂ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਨ ਲਈ ਹੁਨਰਮੰਦ ਮਨੁੱਖੀ ਸ਼ਕਤੀ ਪ੍ਰਦਾਨ ਕਰਨ ਜਾ ਰਿਹਾ ਹੈ।"

ਰੋਪੜ ਦੇ ਡੀਸੀ ਸ਼੍ਰੀ ਹਿਮਾਂਸ਼ੂ ਜੈਨ ਨੇ ਜ਼ੋਰ ਦੇ ਕੇ ਕਿਹਾ ਕਿ ਅਜਿਹੀਆਂ ਕਾਨਫਰੰਸਾਂ ਰਾਹੀਂ ਸਾਨੂੰ ਵਿਦਿਆਰਥੀਆਂ, ਲੇਖਕਾਂ ਅਤੇ ਖੋਜਕਰਤਾਵਾਂ ਵਲੋਂ ਵਿਅਕਤੀਆਂ ਦੀਆਂ ਸਮਰੱਥਾਵਾਂ ਨੂੰ ਬਿਹਤਰ ਬਣਾਉਣ ਲਈ ਵੱਖ-ਵੱਖ ਤਕਨਾਲੋਜੀਆਂ ਦੀ ਵਰਤੋਂ ਕਰਕੇ ਵਿਕਸਤ ਕੀਤੇ ਗਏ ਨਵੀਨਤਮ ਸਾਧਨਾਂ ਬਾਰੇ ਪਤਾ ਲੱਗਦਾ ਹੈ। ਉਨ੍ਹਾਂ ਦੱਸਿਆ ਕਿ ਅਜਿਹੀਆਂ ਕਾਨਫਰੰਸਾਂ ਵਿੱਚ ਸ਼ਾਮਲ ਹੋਣਾ ਹਮੇਸ਼ਾ ਖੁਸ਼ੀ ਦੀ ਗੱਲ ਹੁੰਦੀ ਹੈ ਕਿਉਂਕਿ ਉਹ ਡਿਜੀਟਲ ਖੇਤਰ ਵਿੱਚ ਨਵੀਨਤਮ ਘਟਨਾਵਾਂ ਬਾਰੇ ਜਾਣਕਾਰੀ ਪ੍ਰਦਾਨ ਕਰਦੇ ਹਨ। ਉਨ੍ਹਾਂ ਜ਼ਿਕਰ ਕੀਤਾ ਕਿ ਉਹ ਖੁਦ ਸਿਹਤ, ਸਿੱਖਿਆ, ਆਂਗਣਵਾੜੀ ਆਦਿ ਸਮੇਤ ਵੱਖ-ਵੱਖ ਡੋਮੇਨਾਂ ਜਾਂ ਵਿਭਾਗਾਂ ਵਲੋਂ ਤਿਆਰ ਕੀਤੇ ਗਏ ਡੇਟਾ 'ਤੇ ਡੇਟਾ ਵਿਜ਼ੂਅਲਾਈਜ਼ੇਸ਼ਨ ਟੂਲਸ ਦੀ ਵਰਤੋਂ ਕਰਦੇ ਹਨ।

ਕਾਨਫਰੰਸ ਵਿੱਚ ਸ਼੍ਰੀ ਆਨੰਦ ਕੁਲਕਰਨੀ, ਚੀਫ਼ ਪ੍ਰੀਸੇਲਜ਼ ਸਲਿਊਸ਼ਨ ਆਰਕੀਟੈਕਟ, ਇੰਟਲ; ਵੀ. ਰਾਮਕ੍ਰਿਸ਼ਨਨ, ਸਾਬਕਾ ਡਾਇਰੈਕਟਰ, ਗਲੋਬਲ ਫਾਊਂਡਰੀਜ਼, ਸਿੰਗਾਪੁਰ; ਡਾ. ਕਮਲਜੀਤ ਸਿੰਘ, ਡਾਇਰੈਕਟਰ ਜਨਰਲ, ਸੈਮੀ-ਕੰਡਕਟਰ ਲਿਮਟਿਡ; ਅਤੇ ਸ਼੍ਰੀ ਵੀ ਕੇ ਸ਼ਰਮਾ, ਡਾਇਰੈਕਟਰ ਸੀ-ਡੀਏਸੀ ਮੋਹਾਲੀ ਵਲੋਂ ਪੈਨਲ ਸੈਸ਼ਨ ਨੂੰ ਸੰਬੋਧਨ ਕੀਤਾ ਗਿਆ।

ਜਨਤਕ-ਨਿੱਜੀ ਭਾਈਵਾਲੀ 'ਤੇ ਚਰਚਾ: "ਡਿਜੀਟਲ ਸਮਾਵੇਸ਼ ਵਿੱਚ ਜਨਤਕ-ਨਿੱਜੀ ਭਾਈਵਾਲੀ ਦੀ ਭੂਮਿਕਾ" 'ਤੇ ਇੱਕ ਵਿਚਾਰਕ ਸੈਸ਼ਨ ਨੇ ਅਰਥਪੂਰਨ ਸੰਵਾਦ ਨੂੰ ਉਤਸ਼ਾਹਿਤ ਕੀਤਾ ਅਤੇ ਡਿਜੀਟਲ ਸਮਾਵੇਸ਼ ਲਈ ਸਹਿਯੋਗੀ ਰਣਨੀਤੀਆਂ ਦਾ ਪ੍ਰਸਤਾਵ ਦਿੱਤਾ।

ਖੋਜ ਪੇਸ਼ਕਾਰੀਆਂ: ਦੋ-ਰੋਜ਼ਾ ਕਾਨਫਰੰਸ ਦੌਰਾਨ 120 ਤੋਂ ਵੱਧ ਖੋਜ ਪੱਤਰ ਪੇਸ਼ ਕੀਤੇ ਜਾ ਰਹੇ ਹਨ। ਪਹਿਲੇ ਦਿਨ ਵੱਖ-ਵੱਖ ਤਕਨੀਕੀ ਟਰੈਕਾਂ ਵਿੱਚ 60 ਤੋਂ ਵੱਧ ਖੋਜ ਪੱਤਰ ਪੇਸ਼ ਕੀਤੇ ਗਏ, ਜਿਨ੍ਹਾਂ ਵਿੱਚ ਸ਼ਾਮਲ ਹਨ:

o ਆਰਟੀਫੀਸ਼ੀਅਲ ਇੰਟੈਲੀਜੈਂਸ, ਮਸ਼ੀਨ ਲਰਨਿੰਗ, ਬਿਗ ਡੇਟਾ ਐਨਾਲਿਟਿਕਸ

o ਸਾਈਬਰ ਸੁਰੱਖਿਆ, ਫੋਰੈਂਸਿਕਸ, ਨੈੱਟਵਰਕ ਅਤੇ ਮੋਬਾਈਲ ਸੁਰੱਖਿਆ

o ਐਡਵਾਂਸਡ ਕੰਪਿਊਟਿੰਗ—ਕਲਾਊਡ ਕੰਪਿਊਟਿੰਗ, ਐੱਜ ਕੰਪਿਊਟਿੰਗ ਅਤੇ ਕੁਆਂਟਮ ਕੰਪਿਊਟਿੰਗ

o ਬਲਾਕਚੇਨ ਅਤੇ ਵੈੱਬ ਟੈਕਨੋਲੋਜੀਆਂ

o ਵੀਐੱਲਐੱਸਆਈ, ਸੈਮੀਕੰਡਕਟਰ, ਇਲੈਕਟ੍ਰਾਨਿਕ ਸਿਸਟਮ, ਆਈਓਟੀ, ਮਾਈਕ੍ਰੋਵੇਵ, ਐਂਟੀਨਾ ਅਤੇ ਸੰਚਾਰ

o ਭਵਿੱਖ ਦੀਆਂ ਐਪਲੀਕੇਸ਼ਨਾਂ ਲਈ ਡਿਜੀਟਲ ਟੈਕਨੋਲੋਜੀਆਂ

o ਦਿਵਯਾਂਗਜਨਾਂ ਲਈ ਸਹਾਇਕ ਟੈਕਨੋਲੋਜੀ

o ਇੱਕ ਆਲਮੀ ਭਵਿੱਖ-ਤਿਆਰ ਕਾਰਜਬਲ ਬਣਾਉਣ ਲਈ ਡਿਜੀਟਲ ਹੁਨਰ ਲਈ ਰਣਨੀਤੀ

ਇੰਟਰਐਕਟਿਵ ਸੈਸ਼ਨ ਅਤੇ ਨੈੱਟਵਰਕਿੰਗ ਮੌਕੇ: ਭਾਗੀਦਾਰਾਂ ਨੇ ਚਰਚਾਵਾਂ ਵਿੱਚ ਸਰਗਰਮੀ ਨਾਲ ਹਿੱਸਾ ਲਿਆ ਅਤੇ ਭਵਿੱਖ ਦੇ ਖੋਜ ਸਹਿਯੋਗ ਲਈ ਸੰਪਰਕ ਸਥਾਪਤ ਕੀਤੇ।

ਉਦਯੋਗ ਅਤੇ ਐੱਨਆਈਈਐੱਲਆਈਟੀ ਪ੍ਰਦਰਸ਼ਨੀਆਂ: ਵੱਖ-ਵੱਖ ਉਦਯੋਗਾਂ, ਖੇਤਰੀ ਪ੍ਰਯੋਜਕਾਂ ਅਤੇ ਐੱਨਆਈਈਐੱਲਆਈਟੀ ਕੇਂਦਰਾਂ ਤੋਂ ਅਤਿ-ਆਧੁਨਿਕ ਟੈਕਨੋਲੋਜੀਆਂ ਨੂੰ ਪ੍ਰਦਰਸ਼ਿਤ ਕਰਨ ਵਾਲੇ ਸਟਾਲ ਪ੍ਰਦਰਸ਼ਿਤ ਕੀਤੇ ਗਏ, ਜੋ ਧਿਆਨ ਖਿੱਚਦੇ ਹਨ।

ਐੱਨਆਈਸੀਈਡੀਟੀ-2025 ਦਾ ਦੂਜਾ ਦਿਨ "ਕਾਰਜਬਲ ਤਬਦੀਲੀ: ਨੌਕਰੀਆਂ 'ਤੇ ਏਆਈ ਦਾ ਪ੍ਰਭਾਵ" 'ਤੇ ਪੈਨਲ ਚਰਚਾ ਅਤੇ ਵਾਧੂ ਖੋਜ ਪੇਸ਼ਕਾਰੀਆਂ ਸਮੇਤ ਹੋਰ ਦਿਲਚਸਪ ਸੈਸ਼ਨਾਂ ਦਾ ਵਾਅਦਾ ਕਰਦਾ ਹੈ। ਇਹ ਕਾਨਫਰੰਸ ਆਈਈਸੀਟੀ ਦੇ ਭਵਿੱਖ ਨੂੰ ਆਕਾਰ ਦੇਣ ਵਿੱਚ ਡਿਜੀਟਲ ਨਵੀਨਤਾ, ਟਿਕਾਊ ਟੈਕਨੋਲੋਜੀ ਅਤੇ ਅੰਤਰ-ਅਨੁਸ਼ਾਸਨੀ ਸਹਿਯੋਗ ਦੀ ਮਹੱਤਤਾ 'ਤੇ ਜ਼ੋਰ ਦਿੰਦੀ ਹੈ।

************

ਪੀਆਈਬੀ ਚੰਡੀਗੜ੍ਹ | ਡੀਜੇਐੱਮ

(Release ID: 2103283) Visitor Counter : 17