مہاکمبھ 2025 کے مہمانوں کو پریاگ راج میں 16 سے 18 فروری تک منعقد ہونے والے تین روزہ بین الاقوامی برڈ فیسٹیول میں ہجرت کرنے والے اور مقامی پرندوں کی 200 سے زیادہ اقسام کے اجتماع کا مشاہدہ کرنے کا موقع ملے گا۔ ماحولیاتی تحفظ اور حیاتیاتی تنوع کو فروغ دینے کے مقصد سے، یہ تقریب فطرت سے محبت کرنے والوں، ماہرین حیوانات، اور عقیدت مندوں کو نایاب پرندوں کی انواع کا مشاہدہ کرنے اور ان کے تحفظ کی اہمیت کو سمجھنے کا ایک منفرد موقع فراہم کرے گی۔

بین الاقوامی برڈ فیسٹیول نہ صرف پرندوں کو دیکھنے کا موقع فراہم کرے گا بلکہ مختلف مقابلوں اور تعلیمی سرگرمیوں کے ذریعہ پرندوں کے تحفظ کے بارے میں بیداری بھی پیدا کرے گا۔ فیسٹیول میں فوٹو گرافی، پینٹنگ، سلوگن رائٹنگ، مباحثے اور کوئز مقابلے شامل ہوں گے۔ مزید برآں، قومی اور بین الاقوامی ماہرین حیوانات، ماہرین ماحولیات، اور تحفظ کے ماہرین تکنیکی سیشن اور پینل مباحثوں میں اپنے خیالات  کا اشتراک کریں گے۔

محکمہ جنگلات کے آئی ٹی سربراہ آلوک کمار پانڈے نے بتایا کہ میلے کے بارے میں مزید تفصیلات کے لیے لوگ واٹس ایپ نمبر 9319277004 پر رابطہ کر سکتے ہیں۔ اس پہل کا بنیادی مقصد نوجوانوں، فطرت سے محبت کرنے والے افراد اور عقیدت مندوں کو پرندوں کے تحفظ اور ان کے قدرتی رہائش گاہوں کے تحفظ پر توجہ مرکوز کرنے کی ترغیب دینا ہے۔ اس ایونٹ کو مزید پرکشش بناتے ہوئے حکومت مختلف مقابلوں کے جیتنے والوں کو کل 21 لاکھ روپے کے انعامات سے نوازے گی، جن میں  10,000 سے 5 لاکھ روپے  تک شامل ہیں۔

بین الاقوامی برڈ فیسٹیول کے دوران، عقیدت مندوں کو نایاب پرندوں کا مشاہدہ کرنے کا موقع ملے گا جیسے خطرے سے دوچار انڈین اسکیمر، فلیمنگو اور سائبیرین کرین وغیرہ۔ یہ تقریب زائرین کو قدرتی خوبصورتی اور حیاتیاتی تنوع کی اہمیت کو سمجھنے کا موقع بھی فراہم کرے گی۔ سائبیریا، منگولیا اور افغانستان سمیت 10 سے زیادہ ممالک سے ہزاروں نقل مکانی کرنے والے پرندے پریاگ راج میں گنگا-یمنا کے کنارے پہنچے ہیں، جو سیاحوں کو اپنی منفرد پروازوں اور گروپ ہجرت کے انداز سے اپنی طرف متوجہ کر رہے ہیں۔

اروند کمار یادو، ڈی ایف او پریاگ راج نے کہا کہ یہ تہوار صرف تفریح ​​کے لیے نہیں ہوگا بلکہ ماحولیاتی توازن اور حیاتیاتی تنوع کے تحفظ کی مہم میں بھی اہم کردار ادا کرے گا۔ انہوں نے اس بات پر زور دیا کہ پرندوں کے تحفظ سے قدرتی آفات سے نمٹنے اور ماحولیاتی توازن کو برقرار رکھنے میں مدد ملتی ہے اور اس طرح کے واقعات لوگوں کو فطرت کے تئیں بیدار کرنے میں مدد دیتے ہیں۔

پریاگ راج میلہ انتظامیہ کی ہدایت کے مطابق، عقیدت مندوں کے لیے ایک خصوصی ماحولیاتی سیاحت کا منصوبہ تیار کیا گیا ہے۔ وہ پرندوں کو دیکھنے کا تجربہ کر سکیں گے اور قدرتی رہائش گاہوں کی اہمیت کے بارے میں جان سکیں گے۔ ماہرین کے ساتھ برڈ واک اور نیچر واک کے ذریعہ، عقیدت مندوں کو پرندوں کے رویے، نقل مکانی کے سفر، اور ماحولیاتی نظام میں ان کے کردار کو قریب سے سمجھنے کا موقع ملے گا۔

اس کے علاوہ مہاکمبھ کے دوران ثقافتی پروگرام، اسٹریٹ ڈرامے، آرٹ کی نمائشیں اور دیگر سرگرمیاں پرندوں کے تحفظ اور ماحولیاتی توازن کے بارے میں بیداری پیدا کریں گی۔ اس تقریب کا مقصد صرف عقیدت مندوں میں بیداری پیدا کرنا نہیں ہے بلکہ آنے والی نسلوں کے لیے قدرتی وسائل کے تحفظ کے لیے اقدامات کرنا بھی ہے۔ پرندوں کے شوقین، محققین، سائنس دان اور طلباء بین الاقوامی برڈ فیسٹیول میں آرنیتھولوجی اور تحفظ کے بارے میں نیا علم حاصل کریں گے۔ مختلف سیشن میں پرندوں کی نقل مکانی، رہائش کے تحفظ، موسمیاتی تبدیلی کے اثرات اور ان کی بقا کے بارے میں سائنسی حقائق پر تبادلہ خیال کیا جائے گا۔

یہ فیسٹیول ہندوستان اور بین الاقوامی سطح پر حیاتیاتی تنوع اور ماحولیاتی پائیداری کے بارے میں ایک مضبوط پیغام بھیجے گا۔ پرندوں کے تحفظ کی سرگرمیوں میں طلباء کی شرکت انہیں فطرت سے جڑنے اور اپنی ذمہ داریوں کو سمجھنے کا موقع فراہم کرے گی۔ مہا کمبھ 2025 کے دوران منعقد ہونے والا بین الاقوامی برڈ فیسٹیول ہندوستانی ثقافت، فطرت کی  توضیح اور سائنسی نقطہ نظر کا ایک انوکھا امتزاج ہوگا۔ یہ عقیدت مندوں اور سیاحوں کو قدرتی دولت کی اہمیت کو سمجھنے، حیاتیاتی تنوع کو بچانے اور پائیدار ترقی کی ترغیب دینے کے لیے کام کرے گا۔

۔۔۔۔۔۔۔۔۔۔۔۔۔۔۔۔۔۔۔۔۔

(ش ح ۔ رض۔ ن م  (

6297