15ನೇ ಆವೃತ್ತಿಯ ದ್ವೈವಾರ್ಷಿಕ ಏರೋ-ಇಂಡಿಯಾ ಅಂತಾರಾಷ್ಟ್ರೀಯ ವಿಚಾರಸಂಕಿರಣ ಕರ್ನಾಟಕದ  ಬೆಂಗಳೂರಿನಲ್ಲಿ 2025ರ ಫೆಬ್ರವರಿ 8ರಂದು ಆರಂಭವಾಯಿತು. 2025ರ ಫೆಬ್ರವರಿ 10 ರಿಂದ 14 ರವರೆಗೆ ನಡೆಯಲಿರುವ ಏರೋ ಇಂಡಿಯಾ 2025ಕ್ಕೆ ಪೂರ್ವಭಾವಿಯಾಗಿ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್ ಡಿಒ)ದ ಮಿಲಿಟರಿ ವಾಯುಯೋಗ್ಯತೆ ಮತ್ತು ಪ್ರಮಾಣೀಕರಣ ಕೇಂದ್ರ (CEMILAC) ಮತ್ತು ಏರೋನಾಟಿಕಲ್ ಸೊಸೈಟಿ ಆಫ್ ಇಂಡಿಯಾ (AeSI) ಸಹಯೋಗದೊಂದಿಗೆ ಎರಡು ದಿನಗಳ ಈ ವಿಚಾರ ಸಂಕಿರಣವನ್ನು ಬೆಂಗಳೂರಿನಲ್ಲಿ ಆಯೋಜಿಸಲಾಗಿದೆ.

ಈ ವಿಚಾರ ಸಂಕಿರಣವು ಜಾಗತಿಕ ವೈಮಾನಿಕ ವಲಯದಲ್ಲಿ ಒಂದು ಪ್ರಮುಖ ಕಾರ್ಯಕ್ರಮವಾಗಿದೆ. ಈ ವರ್ಷದ ವಿಷಯ 'ಭವಿಷ್ಯದ ಬಾಹ್ಯಾಕಾಶ ತಂತ್ರಜ್ಞಾನಗಳು: ವಿನ್ಯಾಸ ಮೌಲ್ಯೀಕರಣದಲ್ಲಿ ಸವಾಲುಗಳು' ಎಂಬುದಾಗಿದ್ದು,  ಭವಿಷ್ಯದ ಬಾಹ್ಯಾಕಾಶ ತಂತ್ರಜ್ಞಾನಗಳಲ್ಲಿ ಕಂಡುಬರುತ್ತಿರುವ ಹೊಸ ಹೊಸ ಪ್ರವೃತ್ತಿಗಳು ಮತ್ತು ಮಿಲಿಟರಿ ವಾಯು ಯೋಗ್ಯತೆ ಮತ್ತು ಪ್ರಮಾಣೀಕರಣ: ವಿನ್ಯಾಸ ಮತ್ತು ಪರೀಕ್ಷೆಯಲ್ಲಿ ಸವಾಲುಗಳು ಕುರಿತು ಚರ್ಚೆಗಳು ಮತ್ತು ಸಂವಾದಗಳನ್ನು ಪ್ರಮುಖವಾಗಿ ಪ್ರಸ್ತಾಪಿಸಲಾಗುತ್ತದೆ.

ಈ ಕಾರ್ಯಕ್ರಮದಲ್ಲಿ ಭಾಗವಹಿಸುವ ಅಂತಾರಾಷ್ಟ್ರೀಯ ಪ್ರತಿನಿಧಿಗಳು ಸ್ಪೇನ್‌ನ ಏರ್‌ಬಸ್ ಡಿಫೆನ್ಸ್ ಮತ್ತು ಸ್ಪೇಸ್; ಯುಕೆಯ ಕಾಲಿನ್ಸ್ ಏರೋಸ್ಪೇಸ್, ​​ಜಿಇ ಏರೋಸ್ಪೇಸ್, ​​ಮಾರ್ಟಿನ್-ಬೇಕರ್, ಎಂಬಿಡಿಎ ಮತ್ತು ರೋಲ್ಸ್ ರಾಯ್ಸ್, ಇಸ್ರೇಲ್‌ನ ರಾಫೆಲ್ ಅಡ್ವಾನ್ಸ್ಡ್ ಡಿಫೆನ್ಸ್ ಸಿಸ್ಟಮ್ಸ್ ಮತ್ತು ಸಫ್ರಾನ್ ಫ್ರಾನ್ಸ್‌ನಂತಹ ಪ್ರಮುಖ ವಿದೇಶಿ ಕಂಪನಿಗಳಿಂದ ಬಂದಿದ್ದಾರೆ. ವಿಚಾರಸಂಕಿರಣದಲ್ಲಿ ಭಾಗವಹಿಸುವ ಭಾರತೀಯ ಉದ್ಯಮಗಳಲ್ಲಿ ಅಬೆಯಾಂಟ್ರಿಕ್ಸ್ ಸೊಲ್ಯೂಷನ್ಸ್, ಅನ್ಸಿಸ್ ಇಂಕ್., ಗ್ಲೋಬಲ್ಸ್ ಇಂಕ್., ಜೆಎಸ್ಆರ್ ಡೈನಾಮಿಕ್ಸ್ ಪ್ರೈ. ಲಿಮಿಟೆಡ್, ರಾಫೆ ಎಮ್‌ಪಿಬಿಆರ್ ಮತ್ತು ಟಿಎಕ್ಯೂಬಿಟ್ ಲ್ಯಾಬ್ಸ್ ಪ್ರೈವೇಟ್ ಲಿಮಿಟೆಡ್ ಮತ್ತಿತರವುಗಳು ಸೇರಿವೆ.

ಈ ವಿಚಾರ ಸಂಕಿರಣವು ಅಂತರಿಕ್ಷಯಾನ ಮತ್ತು ರಕ್ಷಣಾ ತಂತ್ರಜ್ಞಾನಗಳ ಭವಿಷ್ಯವನ್ನು ಮುನ್ನಡೆಸುವ ಮೂಲಕ ಸಹಯೋಗದ ಸಂಶೋಧನಾ ಅವಕಾಶಗಳನ್ನು ಅನ್ವೇಷಿಸಲು ಮತ್ತು ಕಾರ್ಯತಂತ್ರ ಪಾಲುದಾರಿಕೆಗಳನ್ನು ರೂಪಿಸಲು ಒಂದು ವೇದಿಕೆಯನ್ನು ಒದಗಿಸುತ್ತದೆ. ಭವಿಷ್ಯದ ಅಂತರಿಕ್ಷಯಾನ ತಂತ್ರಜ್ಞಾನಗಳ ವಿನ್ಯಾಸ ಮೌಲ್ಯೀಕರಣದಲ್ಲಿನ ಸವಾಲುಗಳ ಕುರಿತು ವಿವಿಧ ವಿಷಯಗಳನ್ನು ಒಳಗೊಂಡ ಒಟ್ಟು 12 ತಾಂತ್ರಿಕ ಗೋಷ್ಠಿಗಳನ್ನು ನಿಗದಿಪಡಿಸಲಾಗಿದೆ. 'ಭವಿಷ್ಯದ ಅಂತರಿಕ್ಷಯಾನ ತಂತ್ರಜ್ಞಾನಗಳು: ವಿನ್ಯಾಸ ಮೌಲ್ಯೀಕರಣದಲ್ಲಿನ ಸವಾಲುಗಳು' ಕುರಿತಾದ ವಿಚಾರ ಸಂಕಿರಣವು ವ್ಯವಸ್ಥೆ ವಿನ್ಯಾಸ ಮತ್ತು ಮೌಲ್ಯೀಕರಣಕ್ಕಾಗಿ ಅತ್ಯಾಧುನಿಕ ತಂತ್ರಜ್ಞಾನಗಳು, ವಾಯು ಯೋಗ್ಯತೆ ಮತ್ತು ಪ್ರಮಾಣೀಕರಣಕ್ಕಾಗಿ ನವೀನ ವಿಧಾನಗಳು, ವಾಯುಯಾನದ ಭವಿಷ್ಯವನ್ನು ಹೆಚ್ಚಿಸಲು ಕೃತಕ ಬುದ್ಧಿಮತ್ತೆಯನ್ನು ಬಳಸಿಕೊಳ್ಳುವುದು, ಎಲೆಕ್ಟ್ರಾನಿಕ್ಸ್ ಮತ್ತು ಸಂವೇದನಾ ತಂತ್ರಜ್ಞಾನದಲ್ಲಿ ಪ್ರವರ್ತಕ ಪ್ರಗತಿಗಳು, ಮುಂದಿನ ಪೀಳಿಗೆಯ ಪ್ರೊಪಲ್ಷನ್ ವ್ಯವಸ್ಥೆಗಳ ಬಗ್ಗೆ ಜಾಗತಿಕ ಒಳನೋಟಗಳು, ಮಿಲಿಟರಿ ವೈಮಾನಿಕ ಉದಯೋನ್ಮುಖ ಪ್ರವೃತ್ತಿಗಳು, ಭೂಮಿಯಾಚೆಗೆ ಮಾನವ ಕಾರ್ಯಾಚರಣೆಗಳನ್ನು ಮುನ್ನಡೆಸುವ ನಾವೀನ್ಯತೆಗಳಂತಹ ವಿವಿಧ ವಿಷಯಗಳ ಮೇಲೆ ಕೇಂದ್ರೀಕರಿಸುತ್ತದೆ.

ಬಾಹ್ಯಾಕಾಶ ಇಲಾಖೆಯ ಕಾರ್ಯದರ್ಶಿ ಮತ್ತು ಇಸ್ರೋ ಅಧ್ಯಕ್ಷ ಡಾ.ವಿ.ನಾರಾಯಣನ್ ಅವರು ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿದ್ದರೆ, ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಇಲಾಖೆಯ ಕಾರ್ಯದರ್ಶಿ ಮತ್ತು ಡಿಆರ್‌ಡಿಒ ಅಧ್ಯಕ್ಷ ಡಾ. ಸಮೀರ್ ವಿ. ಕಾಮತ್ ಅವರು ಗೌರವಾನ್ವಿತ ಅತಿಥಿಯಾಗಿದ್ದರು. ಎಇಎಸ್‌ಐ ಅಧ್ಯಕ್ಷ ಡಾ. ಜಿ. ಸತೀಶ್ ರೆಡ್ಡಿ ಕೂಡ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು. ಡಿಆರ್‌ಡಿಒ, ರಕ್ಷಣಾ ಸಾರ್ವಜನಿಕ ವಲಯದ ಉದ್ದಿಮೆಗಳು (ಪಿಎಸ್‌ಯುಗಳು), ಸಶಸ್ತ್ರ ಪಡೆಗಳು ಮತ್ತು ಖಾಸಗಿ ಕೈಗಾರಿಕೆಗಳು, ಎಂಎಸ್‌ಎಂಇಗಳು ಸೇರಿ ಸುಮಾರು 1,100 ಪ್ರತಿನಿಧಿಗಳು ಭಾಗವಹಿಸುತ್ತಿದ್ದಾರೆ. ಅಲ್ಲದೆ ಭಾರತ ಮತ್ತು ವಿದೇಶಗಳಿಂದ 33 ಭಾಷಣಕಾರರು ಈ ಕ್ಷೇತ್ರದ ವಿವಿಧ ವಿಷಯಗಳ ಕುರಿತು ತಾಂತ್ರಿಕ ಉಪನ್ಯಾಸಗಳನ್ನು ನೀಡಲಿದ್ದಾರೆ.

*****