#IFFIWood, 26 नोव्हेंबर 2024
म्हान गायक मोहम्मद रफीच्या शतमानी उत्सवाचो एक भाग म्हूण 55व्या आंतरराष्ट्रीय चित्रपट महोत्सवांत दिग्गज गायक रफीचो पूत शाहिद रफी, अणभवी चित्रपट निर्मातो सुभाष घई, नामनेची संगीतकार अनुराधा पौडवाल आनी सोनू निगम हांचो आस्पाव आशिल्ल्या खाशेल्या सत्रांत ह्या व्हड मनशाक श्रद्धांजली दिली.
‘आसमान से आया फरिश्ता’: मोहम्मद रफी- द किंग ऑफ मेलडी ह्या सत्रांत ह्या प्रतिकात्मक गायकाच्या जिवित, वावर आनी दायजाचो उगडास जालो.
आपल्या म्हान बापायच्या प्रभावाचो उगडास करून शाहिद रफीन म्हणलें, आमचे खातीर तो आमचो बापूय, आमचो मार्गदर्शक, आमचो खांब आशिल्लो. तो एक नामनेचो व्यक्तीमत्व अशें आमकां जिवितांत खूब उसरां कळ्ळें. तो म्हजे खातीर आनी म्हज्या भावांक सदांच एक मोगाळ बापूय आशिल्लो.” भारतीय संगीत मळार इतलें व्हडलें नांव आसून लेगीत बापूय सदांच सगळ्यां कडेन मोगान वागतालो अशें रफीन सांगलें.
पद्मश्री पुरस्कार विजेतो मोहम्मद रफीन देशांतल्या वेगवेगळ्या बोलींनी आनी भाशांनी हजारां परस चड गितां गायल्यात.
रफीन गायिल्ल्या जायत्या गितांचो उल्लेख करून गायक सोनू निगमान म्हणलें, म्हजे खातीर मोहम्मद रफी म्हजो गुरू आनी म्हजो संगीत देव. रफीचो गीत संग्रह ही एक संस्था. दर खेपे तांचें संगीत आयकता तेन्ना कितें तरी नवें शिकता. संगीताची भास आनी स्वर हांचेर ताची व्हडली सत्ता आशिल्ली.”
प्लेबॅक गायनांत आमी आमची कारकीर्द सुरू केली तेन्ना आमचे कडेन जायते संदर्भ मुद्दे आशिल्ले, पूण तांकां एकूय संदर्भ मुद्दो नाशिल्लो . जायत्या प्रयोगां वरवीं ताणें आपलो स्वताचो संगीत ब्रँड कसो तयार केलो हो पिळग्यांनी अभ्यासपाचो विशय”, अशें तांणी मुखार म्हळें.
आपल्या प्रतिभे विशीं आनी दायजा विशीं उलयतना सोनू निगमान म्हणलें, मोहम्मद रफीन गायले ते गीतूच गायक जाले. ताणें प्लेबॅकांत कांय बारीकसाणी हाडल्यो. तो प्लेबॅक गायनाचो आजो. गीताची भास कळना जाल्यार लेगीत मोहम्मद रफीन गायिल्लें गीत सुखी, दुख्खी वा चपखल हें तुमकां कळटलें”
“फिल्मांत प्लेबॅक करताले तेन्ना कलाकार गीत गायता अशें दिसतालें. गायनाचेर ताची अशीच सत्ता आशिल्ली अशें नामनेची गायिका अनुराधा पौडवाल हांणी सांगलें.
ताच्या मृदुभाषी स्वभावाचेर उलयतना तिणें सांगलें की , रफी साहबा वांगडा पयलेच खेपे गायतना हांव सामके सान पिरायेचे आशिल्ले . तो खूब सादो आनी शांत आनी म्हज्या सारकिल्या नव्या कलाकाराक खूब आदार दिवपी आनी सहकारी आशिल्लो. म्हज्या करिअराच्या सुरवातीच्या काळांत इतल्या व्हडल्या अभिनेत्या वांगडा काम करून म्हाका खूब कितें शिकपाची संद मेळ्ळी” अशेंय तिणें सांगलें.
संगीत उस्तादा वांगडा काम करपाच्या अणभवाचेर उलयतना फिल्म निर्मातो सुभाष घईन सांगलें की, रफी साहेबान म्हज्या कर्ज फिल्मांतलें दर्द-ए-दिल हें गीत गावचें अशें म्हाका दिसतालें. ताणें म्हजी विनंती मान्य करून तें गीत गायलें. ताणें ह्या गीताची पयली ओळ गायली आनी म्हज्या फिल्मा खातीर म्हाका एक हिट गीत आसा अशें दिसलें." पूण, फिल्मा उपरांत रोखडोच हो व्हड गायक संवसाराक अंतरलो. घईन मुखार सांगले की, कर्ज उपरांत म्हज्या दर एका फिल्मांत मोहम्मद रफीक हांवेन सोदलो. पूण फिल्म इंडस्ट्रींत प्लेबॅक गायनांत मोहम्मद रफीच्या योगदानाची बरोबरी कोणूच करूंक शकना.”
“गायकांक आवडटा तशें गावंक मेळटा, पूण प्लेबॅक गायकांक फिल्माच्या मूड आनी टोनाक आनी गीतांतल्या अभिनेत्याच्या आवाजाक अनुरूप अशीं गितां गावची पडटात. मोहम्मद रफी हातूंत निष्णात आशिल्लो, चित्रपटाच्या मांडणीकडेन तो उत्तमरित्या जुळोवन घेतालो ” अशेंय घई हांणी सांगलें.
प्रस्न-जाप सत्रांत मोहम्मद रफीचेर बरयल्ल्या बायोपिका विशीं उलयतना शाहिद रफी हांणी सांगलें, फामाद फिल्म निर्मातो उमेश शुक्ला बेगीनूच ह्या म्हान गायकाचेर बायोपिक जाहीर करतलो.
भारतीय सिनेमाच्या जायत्या आंगांक आकार दिवपी चार दिग्गज कलाकारांक 55व्या इफ्फींत श्रद्धांजली दितात: राज कपूर, तपन सिन्हा, अक्किनेनी नागेश्वर राव (एएनआर), आनी मोहम्मद रफी. अंदूंचो इफ्फीं ह्या दिग्गज कलाकारांच्या असामान्य योगदानाचो उत्सव फिल्म प्रदर्शन आनी परस्पर संवादात्मक कार्यावळींच्या माळे वरवीं मनयता.
* * *
PIB IFFI CAST AND CREW | Subhash/Utkarsha/Darshana | IFFI 55