நிரந்தர கணக்கு எண் (பான்) என்பது நீண்ட காலமாக இந்தியாவின் நிதி மற்றும் நிர்வாக அமைப்புகளில் முக்கிய பங்கு வகிக்கிறது. இது தனிநபர்களையும் வணிகங்களையும் பொருளாதார நடவடிக்கைகளுடன் இணைக்கிறது. அதே நேரத்தில் நிதி வெளிப்படைத்தன்மையையும்  இணக்கத்தையும்  ஊக்குவிக்கிறது. டிஜிட்டல் பொருளாதாரத்தில்  அத்தியாவசிய சேவைகளுக்கான நுழைவாயிலாக பான் மாறியுள்ளது.  இது அன்றாட வாழ்க்கையில் இன்றியமையாததாக உள்ளது. பயன்படுத்துவோருக்கு எளிதாக இருப்பதற்கும்  தொழில்நுட்ப முன்னேற்றங்களுடன் சீரமைப்பதற்கும் பான் 2.0 க்கு அமைச்சரவை சமீபத்தில் ஒப்புதல் அளித்துள்ளது.

பான் 2.0 திட்டம் மேம்பட்ட மின்-ஆளுமை மூலம் வரி செலுத்துவோர் பதிவை நவீனப்படுத்துவதற்கான ஒரு  முயற்சியாகும். ரூ. 1,435 கோடி செலவில், தடையற்ற டிஜிட்டல் அனுபவங்களை வழங்க பான்/டான் சேவைகள் மீண்டும் வடிவமைக்கப்படுகின்றன. இந்தத் திட்டம் பான்/டான் வழங்கும் மற்றும் நிர்வகிக்கும் செயல்முறையை ஒழுங்குபடுத்துவதையும் நவீனப்படுத்துவதையும் நோக்கமாகக் கொண்டுள்ளது. இந்தத் திட்டம் வரி செலுத்துவோரின் தேவைகளை பூர்த்தி செய்கிறது. பல தளங்கள்/போர்ட்டல்களை ஒருங்கிணைப்பதில் கவனம் செலுத்துகிறது. பான் / டான் வைத்திருப்பவர்களுக்கு திறமையான சேவைகளை வழங்குகிறது.

பான் 2.0 அனைத்து பான் / டான் சேவைகளையும் ஒரு போர்ட்டலில் ஒருங்கிணைப்பதன் மூலம் தற்போதுள்ள அமைப்பில் புரட்சியை ஏற்படுத்துவதை நோக்கமாகக் கொண்டுள்ளது. இது தடையற்ற, காகிதமற்ற நடைமுறையை உறுதி செய்கிறது. இலவச இ-பான் சேவைகள் மற்றும் எளிமைப்படுத்தப்பட்ட புதுப்பிப்புகள் வரி செலுத்துவோரின் வசதியை மேம்படுத்துகின்றன.

பான் ஒதுக்கீடு / புதுப்பித்தல் / திருத்தம் இலவசமாக செய்யப்படும்.  இ-பான் ஏற்கனவே பதிவு செய்யப்பட்ட மின்னஞ்சல் முகவரிக்கு அனுப்பப்படும். பான் அட்டை வேண்டும் என்றால் விண்ணப்பதாரர் பரிந்துரைக்கப்பட்ட கட்டணமான ரூ .50 (உள்நாட்டு) செலுத்தவேண்டும் . இந்தியாவுக்கு வெளியே அட்டையைக் கொண்டுசேர்க்க , விண்ணப்பதாரரிடம் ரூ.15 + இந்தியா போஸ்ட் கட்டணம் வசூலிக்கப்படும்.

பழைய பான் அட்டைதாரர்கள் கவலைப்படத் தேவையில்லை - தற்போதுள்ள பான் அட்டைதாரர்கள் மேம்படுத்தப்பட்ட முறையின் கீழ் புதிய பான் அட்டைக்கு விண்ணப்பிக்க தேவையில்லை. தற்போதைய செல்லுபடியாகும் பான் அட்டைகள்  பான் 2.0-ன் கீழ் முழுமையாக செயல்படும். அட்டை  வைத்திருப்பவர்கள் புதுப்பித்தல் அல்லது திருத்தத்தைக் கோராவிட்டால் புதிய பான் அட்டை  வழங்கப்படாது.

க்யூஆர் குறியீடு புதிதல்ல; இது 2017-18 முதல் பான் அட்டைகளின்  ஒரு பகுதியாக உள்ளது. பான் 2.0-ன் கீழ், பான் தரவுத்தளத்திலிருந்து சமீபத்திய தரவைக் காண்பிக்கும் டைனமிக் க்யூஆர் குறியீட்டுடன் இது மேம்படுத்தப்படும்.

க்யூஆர் குறியீடு இல்லாத பழைய அட்டைகளைக் கொண்டிருப்பவர்கள் தற்போதைய பான் 1.0 அமைப்பு மற்றும் மேம்படுத்தப்பட்ட பான் 2.0 இரண்டின் கீழ் க்யூஆர் குறியீட்டுடன் புதிய அட்டைக்கு  விண்ணப்பிக்கலாம்.

க்யூஆர் குறியீடு பான் விவரங்களை சரிபார்க்க உதவுகிறது, நம்பகத்தன்மையை உறுதி செய்கிறது.

ஸ்கேன் செய்யும் போது, அது வைத்திருப்பவரின் புகைப்படம், கையொப்பம், பெயர், பெற்றோரின் பெயர்கள் மற்றும் பிறந்த தேதியைக் காட்டுகிறது.

பான் 2.0 திட்டம் என்பது மேம்பட்ட டிஜிட்டல் செயல்முறைகள், பாதுகாப்பு, அதிக அணுகல் ஆகியவற்றுடன் இந்தியாவின் வரி முறையை நவீனமயமாக்குவதை நோக்கி ஒரு குறிப்பிடத்தக்க பாய்ச்சலைக் குறிக்கிறது. உலகளாவிய சிறந்த நடைமுறைகளை ஒருங்கிணைப்பதன் மூலமும், டிஜிட்டல் இந்தியா என்ற அரசின் பார்வையுடன் இணைந்து, வரி செலுத்துவோருக்கு மிகவும் நெறிப்படுத்தப்பட்ட மற்றும் திறமையான அனுபவத்தை இது உறுதியளிக்கிறது. இந்த முயற்சி சேவைகளை எளிமைப்படுத்துவது மட்டுமின்றி, தரவு பாதுகாப்பு மற்றும் வெளிப்படைத்தன்மையை உறுதி செய்கிறது. சிறந்த வரி இணக்கம் மற்றும் நிர்வாகத்தை ஊக்குவிக்கிறது.

மேலும் விவரங்களுக்கு இந்த ஆங்கில செய்திக்குறிப்பைக் காணவும்: https://pib.gov.in/PressReleasePage.aspx?PRID=2077922

*****

SMB/KV/DL

(Release ID: 2078061) Visitor Counter : 16