Ka prokram kaba lai jong ka thain hapoh ka jingrakhe kaba shi snem lynter ia ka, ‘Hamara Samvidhan Hamara Samman’ da ka tnad Justice hapoh ka tnad Law and Justice, Sorkar India ka dei kaba la pynlong ha IIT Guwahati Auditorium mynta ka sngi. Kane ka campaign ka dei kaba pynlong ban rakhe ia ka lyngkhuh dap 75 snem ka jingpdiang ia ka Riti Synshar bad ka jingsdang ia ka India kum ka Republic.

U Arjun Ram Meghwal, Myntri Khynnah ka tnad Law and Justice bad Myntri Khynnah ka tnad Parliamentary Affairs u la wan iashim bynta kum u kongsan. Ha ka jingai jingkren, u Myntri u la ong ba ka Riri Synshar jong ka India ka ai jingiada ia ki briew jong ka India. Ka daw ban pynlong ia kane ka prokram ka dei ban ai jingtip ia ki briew jong ka ri shaphang ka Riti Synshar bad ki briew kiba la thaw ia ka. U la kren shaphang ka bynta bad ka jingnoh synniang jong u Dr. B.R. Ambedkar ha ka jingthaw ia ka Riti Synshar.

Shuh shuh, u la batai shaphang ki nongrim jong ka Riti Synshar da kaba phaikhmat sha ka jingryntih kyrdan, ka jinglaitluid bad ka jinglong shi para bad u la pynshlur ia kiba wan iashim bynta ha kane ka sngi ba kin sngewthuh ia la ki hok bad pyndep ia la ki kamram kum ki nongshong shnong jong ka India.

Ha ka jingkdew ia ka jingkongsan jong ka Hamara Samvidhan Hamara Samman campaign, u Chief Justice ka Gauhati High Court, Vijay Bishnoi u la ong ba ka Riti Synshar jong ka India ka dei ka ain kaba kongsan jong ka ri kaba pyni ia ki jingngeit,, ki nongrim bad ki mat treikam jong ka Sorkar ha ka ri. Baroh ki bynta jong ka ri ki mih bad ki ioh ia ka bor na ka Riti Synshar bad ki pyndep ia ki kamram katkum ki jingbatai ha ka Riti Synshar. U la ong ruh ba ka Riti Synshar jong ka India ka dei ka bor jong ka ain kaba halor tam kaba tehsong ia ki bynta ka legislative, executive, bad judicial jong ka ri, bad kaba ialam lynti ha ki mat treikam jong ka ri, bad ka pynthikna ruh ia ki hok bad ki kamram jong ki nongshong shnong.

Ka porkram ka la sdang da ka jingthung tynrai dieng ban pynkup burom ia ki 15 ngut ki longkmie kiba long dkhot jong ka Constituent Assembly, kiba la don ka bynta kaba heh ha ka jingthaw ia ka Riti Synshar jong ka India. Kane ka jingai jingsngewnguh hapoh ka kam ‘Ek Ped Maa Ke Nam’ ka dei ka jingpyrshang ban pyni ia ka bynta kaba khraw jong ki longkmie ha ka jingtei ia ka nongrim jong ka synshar paidbah ha ka ri.

Ha kane ka sngi, u Myntri Sorkar Pdeng, Arjun Ram Meghwal ha ryngkat kiwei kiwei ki kynrem ki lyndan ki la pyllait ia ka Samvidhan Katta magazine, kaba don 75 tylli ki khana kiba pyni ia ka jingkongsan jong ka Riti Synshar ha ka jingim kaba man ka sngi. Kine ki khana, kiba la wanrah da kito kiba iadon bynta bad ki nongtrei ha ka Tele Law bad Nyaya Bandhu prokram, ki pyni kumno ka Riti Synshar ka bteng ban iada ia ki hok jong ki nongshong shnong ka India. Shuh shuh, la pyllait paidbah phra tylli ki podcast kiba pyni ia ka bynta jong ka prokram Tele Law bad Nyaya Bandhu ha ka jingai jingiarap ia ki briew ba kin iada ia ka hok. Kine ki podcast, kiba thmu ban poi sha ki briew kiba kham bun, ki pyni ia ka jingkongsan jong ka Riti Synshar bad kumno lah ban pyndonkam ia ka ban iada ia ki hok.

La pyllait paidbah ruh ia ka kot Comic ha kane ka sngi kaba don ki khana ba jia shisha jong 10 ngut ki nongioh jingmyntoi kiba la pyndonkam ia ka prokram Tele Law bad Nyaya Bandhu ban iada ia ki hok. Kane ka comic ka thmu ban plie lad shuh shuh ia ki briew ba kin ioh ia ka hok.

Ki Nongbishar jong ka Gauhati High Court, ki ophisar na ka High Court Registry, ki ophisar na ka Assam State Legal Services Authority, ki nongiasaid ain na ka Guwahati Bar Association, ki ophisar judicial, ki Village-Level Entrepreneur (VLE) na ki Common Service Center (CSC), ki samla pule bad ki nonghikai na ka National Law University, Guwahati, bad ki ophisar na ka IIT Guwahati, ha ryngkat ki nongmihkhmat na ka Sorkar Pdeng bad ka Sorkar Assam ki la wan iashim bynta lang ha kane ka sngi.

Ka nongrim:

Ka ‘Hamara Samvidhan Hamara Samman’ campaign, kaba la plie padibah da u Vice President ka India ha ka 24 tarik u Kyllalyngkot 2024 ha ka Dr. B.R. Ambedkar International Centre ha New Delhi, ka thmu ban kyntiew ia ka jingsngewthuh ia ka Riti Synshar jong ka India bad ai jingtip ia ki briew shaphang ki hok. Kum shi bynta ki jingpyrshang, la pynlong ia ki prokram ha ki thain ha kylleng ka ri ha kaba la pynlong prokram ruh ha Bikaner bad Prayagraj ha u snem ba la dep. Ka prokram ha Guwahati ka dei ka sienjam ba heh ban pynurlong ia ka thong jong kane ka kam da kaba poi sha ki paid ba iar jong ka thain shatei lammihngi.

********************

(Release ID: 2075025) Visitor Counter : 23