ভারতনা ২০১৪দা পোলিও-ফ্রী স্তেতস ফংখিবগী মায় পাকপা অসি মালেমগী মীয়ামগী হকশেলগী লমদা খ্বায়দগী মশক থোক্না মায় পাকপশিংগী মরক্তা অমা ওইরি‍। পোলিও মুত্থৎখিপা অসি থৌদোক অমখক্তা নত্তে, ভারতনা গ্লোবেল পোলিও ইরাদিকেসন ইনিসিএতিব (GPEI)দা শরুক য়াবদগী হৌরগা দেকেদ কয়া কত্থোকপগা লোয়ননা হোৎনরকখিবা অমসুং য়ুনিভর্সেল ইম্ম্যুনাইজেসন প্রোগ্রাম (UIP) গী মখাদা অচৌবা নেস্নেল ইম্ম্যুনাইজেসনগী থৌরাংনা তেংবাংখিবশিং অদুগী লোইশিল্লকপা তাঙ্কক্নি‍। অনৌবা ভেক্সিনশিং, ইনোভেতিব ওইবা সর্ভিলেন্স সিস্তেম, অমসুং লৈঙাক্না লমজিংবা ইম্ম্যুনাইজেসসন কেম্পেনশিং লাল্লোং চানা পুনশিনখিবনা ভারতপু পোলিও লৈতবা লৈবাক অমা ওইহন্বদা মরুওইবা থৌদাং লৌখি‍। ফীভম অসি ফংবা ঙমখিবা অসি ভারত লৈঙাক্না UNICEF, ৱর্ল্দ হেল্থ ওর্গনাইজেসন (WHO), বিল এন্দ মেলিন্দা গেতস ফাউন্দেসন, রোতরী ইন্তরনেস্নেল, অমসুং সেন্তর ফোর দিজীজ কন্ত্রোল এন্দ প্রিভেন্সন (CDC) য়াওনা মরুওইবা মালেমগী লূপ কয়াগা খোঙবু ওইদুনা চোকথবা নাইদনা হোৎনখিবা অদুনা ওইহল্লকপনি‍। মখোয়না পুন্দুনা রিসোর্সশিং মোবিলাইজ তৌখি, তেক্নিকেল এক্সপর্তিজ ফংহনখি, অমদি চহি মঙাগী মখাদা লৈবা অঙাং খুদিংমক পোলিওগী ভেক্সিন পীথকপগী মরুওইবা মথৌ তাবগী মতাঙদা মীয়ামদা পাক শন্না খঙহনখি‍।

ভারত্তা ইম্ম্যুনাইজেসন তৌবা

ভারতকী ইম্ম্যুনাইজেসনগী থৌরাং অসি, এক্সপান্দেদ প্রোগ্রাম ওন ইম্ম্যুনাইজেসন (EPI) হৌদোকখিবা মতম ১৯৭৮ দগী হৌরকখিবনি‍। প্রোগ্রাম অসিনা তোঙান তোঙানবা লায়নাশিংগী মায়োক্তা অঙাংশিংবু তিকা থাদোক্নবা পান্দম থমখি‍। ১৯৮৫ দা, প্রোগ্রাম অসি য়ুনিভর্সেল ইম্ম্যুনাইজেসন প্রোগ্রাম (UIP) হায়ননা মমিং ওন্থোক্তুনা অর্বান সেন্তরশিংগী ৱাংমদা পাক শন্না য়ৌহনখি‍। মতমগী মতুং ইন্না, UIP না খুঙ্গংগী মীয়ামগী হকশেল ফগৎহন্নবা পান্দমদা ২০০৫দা হৌদোকখিবা নেস্নেল রুরেল হেল্থ মিসন (NRHM), য়াওনা নেস্নেল হেল্থ ইনিসিএতিব কয়াগী থাদোক্নবা য়াদ্রবা শরুক অমা ওইরকখি‍।

ঙসিদি, UIP অসি মালেমগী খ্বায়দগী চাউবা পব্লিক হেল্থ প্রোগ্রামশিংগী মরক্তা অমা ওইদুনা, পোকপা কুইদ্রিবা অঙাং করোর ২.৬৭ অমসুং মীরোন্বী নুপী করোর ২.৯ কোনশিন্নবা পান্দম থম্লি, অমদি ভেক্সিন্না ঙাকথোকপা য়াবা লায়না ১২ গী ভেক্সিন লেম্না ফংহল্লি‍। পোলিও অসি UIP গী মখাদা পান্দম থমখিবা অহান্বা লায়নাশিংগী মরক্তা অমনি, অদুগা মসি মুত্থৎপনা মরুওইবা মীয়ামগী হকশেলগী পন্দোল অমা ওইরকখি‍।

পোলিও মুত্থৎপদা মরুওইবা পন্দোলশিং

• পল্স পোলিও প্রোগ্রাম হৌদোকপা (১৯৯৫)

ভারতনা পোলিও থেংনবদা ১৯৯৫দা পল্স পোলিও ইম্ম্যুনাইজেসন প্রোগ্রাম হৌদোক্তুনা মশক থোকপা খাঙথাং অমা পায়খৎখি‍। দিল্লীদা ওক্তোবর ২, ১৯৯৪দা (গান্ধী জয়ন্তী) নুমিত্তা পাঙথোকখিবা অহান্বা লার্জ-স্কেল ভেক্সিনেসন কেম্পেন অদুনা নেস্নেল পল্স পোলিও কেম্পেনগী অহৌবা খোঙফম ওইখি‍। কেম্পেন অসিদা ওরেল পোলিও ভেক্সিন (OPV) গী থৌওং শীজিন্নদুনা, অঙাং মিলিয়ন ১ য়ৌবা ঙমখি অমদি চহি মঙাগী মখাদা লৈবা অঙাং খুদিংমক হিদাক পীথকপা ঙমহনখি‍। মোদেল অসি মতুং তারকপদা লৈবাক শিন্বা থুংনা পাকথোক চাউথোকহনখি‍।

“দো বুন্দ জিন্দগী কি” (মরিক অনি পুন্সিগী) হায়বা খোল্লাউনা ভারতকী পোলিও মুত্থৎনবা থৌরাংবু খঙনদুনা কেম্পেন অসি মশক নাইইবা অমা ওইখি‍।

• রুতিন ইম্ম্যুনাইজেসন অমসুং সিস্তেম মপাঙ্গল কনখৎহন্বা

পল্স পোলিও কেম্পেন অসি মীয়াম পাক শন্না ইম্ম্যুনাইজেসন তৌবদা মরুওইবগা লোয়ননা, ভারতনা মহাক্ককী রুতিন ইম্ম্যুনাইজেসনগী থৌরাং য়ুনিভর্সেল ইম্ম্যুনাইজেসন প্রোগ্রাম (UIP) গী মখাদসু মপাঙ্গল কনখৎহনখি‍। UIP অসিনা পোলিও, দিপ্থেরিয়া, পর্তুসিস, (হুপিং কফ), তিতানস, মীজল্স, হেপাতাইতিস বি, অমসুং ত্যুবরকুলোসিসকী মায়োক্তা লেম্না ভেক্সিন ফংহন্দুনা অঙাংশিংবু নেস্নেল ইম্ম্যুনাইজেসন সিদ্যুলগী মতুং ইন্না ভেক্সিন ফংহনখি‍। অসিগুম্বা চাং নাইনা পায়খৎপা থৌরাংশিংগী খুত্থাঙদা, ভারতনা ইম্ম্যুনিতীগী থাক ৱাংখৎহন্নবা অমসুং ভেক্সিন্না ঙাকথোকপা য়াবা লায়নাশিং অমুক হন্না থোরক্তনবা পান্দম থমখি‍।

ভারতনা কোল্দ চেন মেনেজমেন্ততা মশক থোকপা খোঙথাংসু থাংজিন্দুনা ভেক্সিনশিং অসি চপ চানবা তেম্পরেচরদা থম্বা অমসুং পুথোক পুশিন তৌবা য়াহনখি‍। নেস্নেল কোল চেন ত্রেনিং সেন্তর (NCCTE) অমসুং ইলেক্ত্রোনিক ভেক্সিন ইন্তলিজেন্স নেতৱর্ক (eVIN) লিংখৎখিবনা ভেক্সিন থম্বা অমসুং পুথোক পুশিন তৌবদা মরুওইবা থৌদাং লৌখি‍।

• ইনএক্তিবেতেদ পোলিও ভেক্সিন (IPV) পুথোরকপা (২০১৫)

গ্লোবেল পোলিও এন্দগেম স্ত্রেতেজীগী পরিংদা, ভারতনা ইনএক্তিবেতেদ পোলিও ভেক্সিন (IPV) ২০১৫দা পোলিও মুত্থৎনবা লেপ্লিবা ফিরেপগী মনুং চন্না হৌদোকখি‍। IPV না পোলিদগী, মরুওইনা তাইপ ২ পোলিওভাইরসতগী অহেন্বা থাক্তা ঙাকথোকই অমসুং ২০১৬ দা লৈবাক পুম্বা পাক শন্না চৎনবা হৌদ্রিঙৈ মমাঙদা তপ্না তপ্না স্তেত তরুক্তা হৌদোকখি‍। হোংলকখিবা অসি, মালেমগী ওইনা ত্রাইভেলেন্ত OPV (tOPV) দগী তাইপ ২ স্ত্রেন য়াওবা বাইভেলেন্ত OPV (bOPV)দা হোংলক্লবা মতুংদা তঙাই ফদবা অমা ওইরকখি, অমসুং IPV না মখা তানা ঙাকথোকপা ঙমহল্লি‍।

• সর্ভিলেন্স অমসুং মোনিতরিং

ভারতনা মায় পাক্না পোলিও মুত্থৎখিবা অসি এক্যুৎ ফ্লেসিদ পেরালাইসিস (AFP) সর্ভিলেন্স অমসুং এনভাইরন্মেন্তেল সর্ভিলেন্স য়াওনা অকন্বা সর্ভিলেন্স সিস্তেম্না মরম ওইরগা অয়াম্বা ওইহল্লকখিবনি‍। সর্ভিলেন্সতা মীৎয়েঙ চঙবা অসিনা ভারতকী মফমদা ওইরকপা য়াবা আউতব্রেত থুনা খঙদোকপা অমদি লাকশিন্বদা মতেঙ পাংখি‍।

• AFP সর্ভিলেন্স: সিস্তেম অসিদা চহি ১৫গী মখাদা লৈবা অঙাংশিংদা মরম ইরৈ লৈতনা পেরালাইসিস তৌরকপা য়েংশিনবসু য়াওখি, মরমদি মসি পোলিওগী হেক হেক থোক্কনবা লাইওং অমনি‍।
• এনভাইরনমেন্তেল সর্ভিলেন্স: পোলিওভাইরস স্ত্রে খঙদোক্নবা নলাগী ঈশিং য়েংশিনবনা ভাইরস অসি লৈরম্বা য়াবা মফমশিং খঙদোকপদা মতেঙ পাংখি‍।

সর্ভিলেন্সতা অৱাংবা থাক্কী সেন্সিতিবিতী অমা থমদুনা, ভারতনা চিত্থ নান্থহৌবা পোলিওভাইরস শন্দোকপগী কেসশিং থিদোকপা অমসুং লাকশিনবা ঙমখি‍।

• পোলিতিকেল ৱিল অমসুং কম্ম্যুনিতী এঙ্গেজমেন্ত

ভারতনা পোলিও মায় পাক্না মুত্থৎপদা মতেঙ ওইখিবা মরুওইবা মরম অমদি কেন্দ্র অমসুং স্তেত লৈঙাকশিংনা খোঙফম হন্দনা পোলিতিকেল ৱিল উৎখিবা অদুনি‍। থাক খুদিংদা লৈখিবা রাজনিতীগী লুচিংবশিংনা লেপ্পা নাইদবা ঙাক্লৌ পীদুনা রিসোর্সশিং মফম চানা থমখি অমদি প্রোগ্রাম অসিদা মথৌ তাবা মীৎয়েঙ ফংহনখি‍।

মসিগী মথক্তা, কম্ম্যুনিতী এঙ্গেজমেন্তনা মরুওইবা থৌদাং অমসু লৌখি‍। হেল্থ ৱরর্করশিং, ভোলুন্তিয়রশিং, অমসুং লম লমগী লুচিংবশিংনা মীয়ামদা খঙহন্বদা মতেঙ পাংখি, ভেক্সিনেসনগী মরুওইবগী ঈ-পাউ ফংহনখি অমদি খ্বায়দগী মনুং হঞ্জিনবা মফমদা লৈবা অঙাংশিং ফাওবা ইম্ম্যুনাইজ তৌনবা হোৎনখি‍। পল্স পোলিও কেম্পেন অসিনা য়ুমথোঙ খুদিং চঙদুনা হোৎনবদসু মপুং ফানা মীৎয়েঙ থমদুনা য়ৌশিন্বদা ৱাবা মফমশিংদা লৈবা অঙাংশিংসু য়ৌশিনখি‍।

সর্তিফিকেসন অমদি অরোয়বগী খোঙকাপ

ইং ২০১১দা, ভারতনা ইকোন কোন্বা ৱাইল্দ পোলিওভাইরসকী কেস হাউরা, ৱেস্ত বেঙ্গগলদা থেংনখি‍। মদুগী তুংদা, লৈবাকসিনা সর্ভিলেন্সকী থৌরাং হেনগৎহনখি অমদি মখা তাবা ৱাইল্দ পোলিওভাইরসকী কেস থেংনখিদে‍।

ভারতপু পোলিও-ফ্রী ওইরে হায়না ৱল্ল্দ হেল্থ ওর্গনাইজেসন (WHO) না সর্তিফাই তৌনবগীদমক, লৈবাক অসিনা অকন্বা ক্রাইতেরিয়াশিং য়ৌবা মথৌ তাখি‍। মসিদা চহি অহুম ৱাইল্দ পোলিওভাইরস শন্দোকপা লৈতবা, অচৌবা সর্ভিলেন্স সিস্তেম, অমসুং লেমহৌরিবা ভাইরসকী স্তোকশিং মাঙহন তাকহনখিবা য়াওরি‍। সর্তিফিকেসনগী থৌওং অসি য়াম্না চেকশিল্লি, অমদি রিজনেল পোলিও সর্তিফিকেসন কমমিসন্না মপুং ফানা চেক অমসুং ইভালুএসন তৌবা চঙই‍।

মার্চ ২৭, ২০১৫দা, ভারতবু ওফিসিএল ওইনা পোলিও-ফ্রী ওইরে হায়না লাউথোক্তুনা, লৈবাক অসিগী মরুওইবা পন্দোল অমা ওইবতা নত্তনা, মালেমগী ওইনা মায় পাক্লবা পব্লিক হেল্থ ইন্তরভেন্সনগী খুদম অমসু ওইখি‍।

সর্তিফিকেসনগী ৱাংমদা: মীৎকুপ নাহুম শিংনা অমদি শাফনা লৈব!

পোলিও-ফ্রী ওইরে হায়না লাউথোকখ্রবা মতুংদা ফাওবা, ভারতনা মাগী পোলিও-ফ্রী স্তেতস ঙাক্না থম্নবা তোঙান তোঙানবা চেকশিন থৌরাংশিং পায়খৎপা লেপত্রি:

• এনুএল পোলিও কেম্পেন: ভারতনা ইম্ম্যুনিতীগী থাক ৱাংনা থম্নবা অমদি অঙাং অমত্তা চত্থ-নান্থহৌদনবা চহিগী ওইনা নেস্নেল ইম্ম্যুনাইজেসন দেজ (NID) অমসুং সব-নেস্নেল ইম্ম্যুনাইজেসন দেজ (SNID) মখা তানা পাঙথোক্লি‍।
• সর্ভিলেন্স এন্দ বোরদর ভেক্সিনেসন: AFP অমসুং এনভাইরনমেন্তেল মোনিতরিংগী মখাদা লেপ্পা নাইদনা সর্ভিসলেন্স মখা চত্থবা মরুওইরি‍। মালেমগী ঙমখৈশিংদা ভেক্সিনেসন লেপ্তনা তৌদুনা লায়না অসি লৈরিবা মফমশিংদগী অমুক হন্না চঙলক্তনবা হোৎনরি‍।
• অনৌবা ভেক্সিনশিং অমসুং পাকথোক চাউথোকহন্বা: IPV গী মথক্তা, ভারতনা মাগী ইম্ম্যুনাইজেসন প্রোগ্রামগী মখাদা রোতাভাইরস, ন্যুমোকোকেল কঞ্জুগেত ভেক্সিন (PCV), অমসুং মীজল্স-রুবেলা (MR) ভেক্সিন য়াওনা য়াম্লবা অনৌবা ভেক্সিন কয়া অতৈ ভেক্সিন্না ঙাকথোকপা য়াবা লায়নাশিং ঙাকথোক্নবা থৌরাংগী মনুং চন্না হৌদোকখ্রে‍।
• মিসন ইন্দ্রধনুস: ইং ২০১৪দা হৌদোকখিবা, মিসন ইন্দ্রধনুস (MI) না ইম্ম্যুনাইজেসন কভরেজ ৯০% দা হেনগৎহন্নবা পান্দম থম্লি‍। ইম্ম্যুনাইজেসন রেত নেম্বা য়ৌশিন্বদা ৱাবা মফমশিংদা অখন্নবা মীৎয়েঙ চঙলি‍। মসিগী ইন্তেন্সিফাইদ মিসন ইন্দ্রধনুস ফেজতা, প্রোগ্রাম অসিনা ইম্ম্যুনাইজেসন কভরেজ মশক থোক্না হেনগৎহন্দুনা অঙাংশিং মশা মউ ফনা থম্নবা ভারতনা লেপ্লিবা খোঙফম হেন্না মপাঙ্গল কনখৎহল্লি‍।

ৱারোয়শিন

পোলিও-ফ্রী ওইরক্নবা ভারতকী খোঙচৎ অসি ফিরেপ চেৎপা, খুৎশম্ননা চৎমিন্নবা অমসুং ইনোভেসনগী মশক নাইবা ৱারী অমনি‍। লৈবাক অসিনা ফংলিবা মায় পাকপা অসি মাস ইম্ম্যুনাইজেসন কেম্পেন, অকন্বা রাজনিতীগী লুচিংবগী মতিং, মতিং লৈবা সর্ভিলেন্স সিস্তেম, অমসুং কম্ম্যুনিতী মোবিলাইজেসনগী থৌরাংশিং পুনশিন্দুনা চঙশিন্বা খোঙজঙ অমগী মহৈনি‍। মখা তানা চেকশিন্না লৈববা অমসুং লেপ্তনা ইম্ম্যুনাইজেসন তৌদুনা, ভারতনা মাগী পোলিও-ফ্রী স্তেতস অসি কায়হন্দনা থম্নবা অমসুং মালেমদগী পোলিও পুম্মুৎ মুত্থৎনবা পান্দমদা থৌদাং য়ানবা খোঙফম চেৎনা লেপ্লি‍।

পল্স পোলিও প্রোগ্রাম অমসুং য়ুনিভর্সেল ইম্ম্যুনাইজেসন প্রোগ্রাম মায় পাকপা অসিনা অতোপ্পা লৈবাকশিংগী পুক্নিং থৌগৎনফম অমসু ওইরি অমদি মতিং লৈবা সিস্তেম, অচৌবা পোলিসী, অমসুং কম্ম্যুনিতীনা শরুক য়াশিন্দুনা পায়খৎপা পব্লিক হেল্থ ইন্তরভেন্সনগী অওন্বা পুরকপদা লৈরিবা মতিংবুসু তাক্লি‍।

রিফরেন্স:

https://pib.gov.in/Pressreleaseshare.aspx?PRID=1542730

https://www.who.int/southeastasia/activities/maintaining-polio-free-status/keeping-the-polio-virus-at-bay

https://mohfw.gov.in/sites/default/files/Requirement%20of%20Polio%20Vaccination.pdf

https://www.emro.who.int/polio-eradication/news/polio-free-india-it-seemed-impossible-until-it-was-done.html

https://pib.gov.in/PressReleasePage.aspx?PRID=1588770

https://nhm.gov.in/index1.php?lang=1&level=2&sublinkid=824&lid=220

https://www.unicef.org/india/unicef-india-75#:~:text=Working%20together%20with%20the%20Government,had%20the%20right%20to%20education.

https://www.unicef.org/india/our-history

PDF পাননবা মসিদা নম্বিয়ু‍।

*****

(Release ID: 2074688) Visitor Counter : 22