কেন্দ্রগী গৃহ মন্ত্রী অমসুং কোওপরেসন মন্ত্রী, শ্রী অমিত সাহনা ঙসি নই দিল্লীগী বান্সীরা পার্কতা ভগবান বির্সা মুন্দাগী অচৌবা মীতম অমা মহাক্কী ১৫০ শুবা মপোক কুমওন থৌরমদা মায়খুম হাংদোকখি‍। থৌরম অদু হাউজিং অমসুং অর্বান এফ্যার্সকী কেন্দ্র মন্ত্রী শ্রী মনোহর লাল, দিল্লীগী লেফ্তনেন্ত গভর্নর শ্রী বিনয় কুমার সক্সেনা, কেন্দ্রগী রাজ্য মন্ত্রী শ্রী হর্স মলহোত্রা, অমসুং অতৈ মীথুং কয়ানা শরুক য়াখি‍।

থৌরমদুদা ৱা ঙাংলদুনা, কেন্দ্রগী গৃহ মন্ত্রী শ্রী অমিত সাহনা, ২০২১দা প্রধান মন্ত্রী শ্রী নরেন্দ্র ম,দীনা ভগবান বির্সা মুন্দাগী মপোক নুমিৎপু (নবেম্বর ১৫) জঞ্জাতিয় গৌরব দিবস (ত্রাইবেল প্রাইদ দে) হায়বা পাঙথোক্লগনি হায়না লাউথোকখি হায়খি‍। নুমিৎ অসিদনি ভগবান বির্সা মুন্দানা ঝার্খন্দগী অপীকপা খুঙ্গং অমদা পোকখিবা হায়না মহাক্না হায়খি‍। বির্সা মুন্দাগী ১৫০ শুবা মপোক কুমওন থৌরম পাঙথোকপা ওইনা, মথঙ চহি, নবেম্বর ১৫, ২০২৫ ফাওবা, অদিবাসী গৌরব বর্স পাঙথোক্লগনি হায়না শ্রী সাহনা হায়খি‍। ভগবান বির্সা মুন্দাগী ১৫০শুবা মপোক কুমওন থৌরমসিদা, মোদী লৈঙাক্না সরাই কালে খান চৌক্কী মমিং ‘ভগবান বির্সা মুন্দা চৌক’ হায়না ওন্থোক্নবসু লেপ্লে হায়না মহাক্না ফোঙদোকখি‍।

কেন্দ্রগী গৃহ মন্ত্রী শ্রী অমিত সাহনা হায়খি মদুদি ভগবান বির্সা মুন্দানা অশেংবা ত্রাইবেল নাৎপু কল্লম্বা মীওই অমা ওইরম্বখক নত্তনা, মহাক্কী তেল্লবা চহি ২৫গী পুন্সিদা, মহাক্না তৌথোরকপা থবকশিংনা লৈবাক মীয়াম কয়াগী মফমদা মীওই অমনা করম্না পুন্সি হিংগনি অমসুং ঐখোয়গী পুন্সিগী পান্দম্না করি ওইগনি হায়বা তম্বিরম্মি‍। ভগবান বির্সা মুন্দা তশেংনম্সু নীংতম ঈহৌগী অথোইবা হিরোশিংগী মরক্তা অমনি হায়না মহাক্না হায়খি‍। ইং ১৮৭৫আ পোকখিবা ভগবন বির্সা মুন্দানা চহি নৌরিঙৈদগী হৌনা মহাক্কী সেকেন্দরী এজুকেসনগী মতমদা লাইনিং ওন্থোকহনবগী মায়োক্তা খোঞ্জেল থোক্না লাউখি‍। ভারত পুম্বা অমসুং মালেমগী শরুক অহুম থোকপগী অনি ব্রিতিশশিংনা পাল্লম্বা মতমদা, বির্সা মুন্দানা লাইনিং ওন্থোকপগী মায়োক্তা খোঙফম চেৎনা লেপখি অমসুং তুংদা মহাক্কী ফিরেপ অমসুং থৌনানা মহাকপু লৈবাক্কী লুচিংবা অমা ওইহল্লকখি‍। রাঞ্চীগী কৈশুমশঙদগী ইংলেন্দগী লৈমরেল ফাওবদা, লৈবাক্কী হিরো বির্সা মুন্দা জীনা লৈবাক মীয়ামগী খোঞ্জেল ওইরকখি হায়না মহাক্না মখা তাখি‍।

ভগবান বির্সা মুন্দানা ঈশিং, উমং, অমসুং লম হায়বসি ত্রাইবেল ইকোসিস্তেম, পুন্সি মহিং, অমসুং নাৎকী থাদোক্নবা য়াদ্রবা শরুক্নি হায়রিবা ৱাখল্লোন অসি হিঙ্গৎহনখি অমসুং মখোয় অসি ত্রাইবেলশিংগীদি পুম্নমক্নি‍। বির্সা মুন্দানা ত্রাইবেল খুন্নাইদা অতোপ্পা হীরম কয়াদসু ৱাখল তাহল্লম্মি‍। মহাক্না য়ু থকপা, জমিন্দারগী থৌওং অমসুং ব্রিতিশ লৈঙাক্কী মায়োক্তা লেপ্লম্মি‍। লৈবাকসিগী ত্রাইবেল খুন্নাইদা পুরক্লম্বা খুন্নাইগী অহোংবা, নীংতম ঈহৌ অমসুং এন্তি-কনভর্জন ঈহৌগীদমক লৈবাক পুম্বনা ভগবান বির্সা মুন্দাগী মফমদা লমন তোনশিল্লবনি হায়না শ্রী সাহনা হায়খি‍।

“ধর্তি অবা” (মালেমগী মপা) হায়নসু খঙনখিবা ভগবান বির্সা মুন্দাগী পুন্সিবু শরুক অনি থোক্না খায়দোকপা য়াই হায়না গৃহ মন্ত্রী শ্রী অমিত সাহনা হায়খি‍। অহান্বা শরুক্না ত্রাইবেলগী নাৎ ঙাকপগী লেপখিবা খোঙফমদুনি অমদি অনিশুবা শরুক্না মমা লৈবাক্কীদমক অমসুং লৈবাকপু ঙাকথোক্নবগীদমক মথৱায় কত্থোক্নবা লেপখিবা খোঙফম অদুনি‍। শুপ্নতগী চহি ২৫ শুরকপা মতমদা, ভগবান বির্সা মুন্দানা ব্রিতিশ লৈঙাক্কী মায়োক্তা য়াওল ঈহৌগী মৈরী চুখৎখি অমসুং ত্রাইবেলগী ফীভমগী মরমদা লৈবাক্কী খক্তা নত্তনা মালেম পুম্বগী মীৎয়েঙ চিংশিনখি অমসুং মহাক্না তৌরম্বশিংনা পুৱারী অমা ইরমদুনা, চহি ১৫০গী মতুংদা ফাওবা লৈবাক পুম্বনা ঙসি মহাক্কী মফমদা কোক নোল্লি হায়না মহাক্না মখা তাখি‍।

কেন্দ্রগী গৃহ মন্ত্রী অমসুং কোওপরেসন মন্ত্রীনা হায়খি মদুদি লৈবাক শিন্বা থুংনা ত্রাইবেলশিংনা ব্রিতিশকী মায়োক্তা নীংতম ঈহৌদা শরুক য়াখি, অদুবু লাইবক থিবদি হায়রিবা অথোইবা হিরোশিং অসি নীংতম্লবা মতুংদা কাউথোকপিদুনা লাকখি‍। ইং ২০১৫দা, প্রধান মন্ত্রী নরেন্দ্র মোদীনা অঙাংশিংনা অথোইবা হিরোশিংসিগী পুন্সিগী মরমদা খঙজহৌনবা লুপা করোর ২০০ চঙনা লৈবাক্কী অথোইবা ত্রাইবেল হিরো ২০গী ম্যুজিয়ম শানবা ফিরেপ লৌখি‍ হায়না মহাক্না হায়খি‍। হৌজিক ফাওবদা ম্যুজিয়ম অহুম শাখ্রে‍। পি.এম. মোদীনা রাঞ্চীদা ভগবান বির্সা মুন্দা ম্যুজিয়ম, জবলপুরদা শঙ্কর সাহ অমসুং রঘুনাধ সাহ ম্যুজিয়ম, অমসুং ছিন্দ্বারাদা ত্রাইবেল ফ্রীদম ফাইতর ম্যুজিয়ম শঙ্গাখ্রে‍। লেমহৌরিবা ম্যুজিয়মশিংসু ২০২৬ ফাওবদা পুম্নমক লোইরগনি‍।

প্রধান মন্ত্রী শ্রী নরেন্দ্র মোদীগী লৈঙাক্না ত্রাইবেলগী ইকায়খুম্নবা ঙাক্নবগীদমক থবক কয়া পায়খৎলি হায়না শ্রী অমিত সাহন হায়খি‍। নীংতম্লবা মতুং চহি ৭৫গী মতুংদা অহান্বা ওইনা, মোদী লৈঙাক্না ত্রাইবেল অমদা ভারতকী রাস্ত্রপতী ওইননবা খুদোংচাবা পীরি‍। শ্রীমতী দ্রৌপদী মুরমু লায়রবা ত্রাইবেল ইমুং অমগী মচানুপীনি অমসুং ঙসি মহাক্না লৈবাকসিগী ফর্স্ত সিতিজনগী ফম পুরি‍। হৌখিবা চহি ১০সিদা, শ্রী নরেন্দ্র মোদীগী লৈঙাক্না ত্রাইবেলগী মফমশিংদা চাওখৎ থৌরাংগী থবক্তা অপন্বা পীরম্বা অমসুং অঙাংশিংগী লান্না লমজিংলম্বা নক্সলিজম মপুং ফানা মুত্থৎপগী ফীভমদা লাকখ্রে হায়না শ্রী সাহনা হায়খি‍।

কেন্দ্রগী গৃহ মন্ত্রী অমসুং কোওপরেসন মন্ত্রী শ্রী অমিত সাহনা হায়খি মদুদি ওপোজিসন পার্তীগী লৈঙাক্না ত্রাইবেলশিংগী চাওখৎ থৌরাংগীদমক লুপা করোর ২৮,০০০গী বজেত কাইথোক্লম্মি, অদুগা মোদী লৈঙাক্না ২০২৪-২৫কী বজেত্তা ত্রাইবেলগী চাওখৎ থৌরাংগী লুপা করোর ১,৩৩,০০০ কাইথোক্লি‍। প্রধান মন্ত্রী আদর্স গ্রাম য়োজনাগী মখাদা মচং ওইবা ফেসিলিতী পুম্বা ত্রাইবেল খুঙ্গং ২৬,৪২৮দা ফংহনখ্রে‍। দিস্ত্রিক্ত মিনরেল ফাউন্দেসন স্কীমগী মখাদা, ত্রাইবেল এরিয়াশিংদা লুপা করোর লিশিং ৯৭ য়েন্থোকখ্রে, এক্লব্যা মোদেল রেসিদেন্সিএল স্কুল ৭০৮ লিংখৎখ্রে, খুঙ্গং ৬৩,০০০ মপুং ফাবা শেমগৎ শাগৎনবা প্রধান মন্ত্রী PVTG দিভেলপমেন্ত মিসনগী মখাদা লুপা করোর ১৫,০০০ অমসুং প্রধান মন্ত্রী জঞ্জাতিয় উন্নত গ্রাম অভিয়ানগী মখাদা লুপা করোর ২৪,০০০ ফংহনখ্রে‍ হায়না মহাক্না মখা তানা ফোঙদোকখি‍।

*****