مرکزی وزیر داخلہ اور امداد باہمی کے وزیر جناب امت شاہ نے گاندھی نگر، گجرات میں ’نمو لکشمی‘ اور ’نمو سرسوتی سائنس سادھنا پروجیکٹ‘ کے تحت تقسیم اسکالرشپ پروگرام میں بطور مہمان خصوصی شرکت کی۔ اس موقع پر گجرات کے وزیر اعلیٰ بھوپیندر پٹیل سمیت کئی معززین موجود تھے۔

اسکالرشپ تقسیم پروگرام سے خطاب کرتے ہوئے مرکزی وزیر داخلہ نے کہا کہ ’نمو لکشمی‘ اور ’نمو سرسوتی سائنس سادھنا یوجنا‘ کے تحت تقریباً 116 کروڑ روپے کے اسکالرشپ تقریباً 10.85 لاکھ طلبہ کے بینک کھاتوں میں براہ راست منتقل کیے گئے ہیں۔ مستفیدین میں زیادہ تر خاتون طالبات ہیں۔ انہوں نے مزید کہا کہ یہ دونوں اسکیمیں آنے والے دنوں میں گجرات کے تعلیمی شعبے میں ایک اہم تبدیلی لائیں گی۔

جناب امت شاہ نے کہا کہ وزیر اعظم جناب نریندر مودی نے سرکاری مشینری کی مدد سے گجرات میں طلباء کی زندگیوں میں ایک اہم تبدیلی لانے کا کام کیا ہے۔ وزیر اعظم مودی جی نے گجرات کے بیٹوں اور بیٹیوں کو مکمل طور پر خواندہ بنانے کے لیے ایک مہم شروع کی، ان کے لیے ایک سرپرست کے طور پر کام کیا۔ ’نمو لکشمی‘ اور ’نمو سرسوتی‘ اسکیمیں ترغیب پر مبنی پروگرام ہیں جو نہ صرف پانچویں جماعت تک تعلیم کو یقینی بنانے کے لیے بنائی گئی ہیں بلکہ طلبہ کو 12ویں جماعت تک اپنی تعلیم مکمل کرنے میں بھی مدد فراہم کرتی ہیں۔

مرکزی وزیر داخلہ اور امداد باہمی کے وزیر نے کہا کہ کچھ سال پہلے تک، گجرات میں ڈراپ آؤٹ کی شرح تقریباً 37 فیصد تھی۔ تاہم، وزیر اعظم جناب نریندر مودی کی ’بیٹی بچاؤ، بیٹی پڑھاؤ‘ پہل کی وجہ سے، لڑکوں اور لڑکیوں دونوں کو اسکول میں داخل کرنے کے لیے ایک مہم شروع کی گئی۔ وزیر اعظم جناب نریندر مودی نے گجرات میں اسکولوں میں داخلہ کے تناسب کو 67فیصد سے بڑھا کر 99.8فیصد کر کے نوجوانوں کی زندگیوں میں نمایاں تبدیلی کی ہے۔ ڈراپ آؤٹ کی شرح، جو پہلے 37فیصد تھی، اب کم ہو کر صرف 2فیصد رہ گئی ہے۔

جناب امت شاہ نے کہا کہ وزیر اعظم جناب نریندر مودی کی طرف سے متعارف کرائی گئی نئی تعلیمی پالیسی نے طلباء کے لیے متعدد مواقع پیدا کیے ہیں۔ اس پالیسی کے ذریعے، موسیقی میں دلچسپی رکھنے والا سائنس کا طالب علم موسیقی کی تعلیم حاصل کر سکتا ہے، اور اسی طرح، سائنس میں دلچسپی رکھنے والا سائنس کا طالب علم سائنس کی تعلیم حاصل کر سکتا ہے۔ انہوں نے مزید کہا کہ چونکہ سائنس کا روزگار کے مواقع سے زیادہ گہرا تعلق ہے، اس لیے ’نریندر مودی سائنس سادھنا یوجنا‘ متعارف کرائی گئی تاکہ سائنس کے مضامین لینے والے طلباء کی حوصلہ افزائی اور مدد کی جا سکے۔

مرکزی وزیر داخلہ نے کہا کہ نئی تعلیمی پالیسی کو اس طرح سے وضع کیا گیا ہے کہ پورے ملک کے ساتھ ساتھ گجرات کے نوجوان بھی ایک ہی پلیٹ فارم پر کھڑے ہو کر دنیا کے نوجوانوں کا مقابلہ کر سکیں۔ انہوں نے مزید کہا کہ وزیر اعظم مودی نے ایک کثیر جہتی اور ہمہ جہتی جامع نقطہ نظر کے ساتھ تعلیمی پالیسی بنانے کے لیے کام کیا ہے، جس سے طلبہ کی جامع ترقی کو یقینی بنایا جا سکے۔

جناب امت شاہ نے کہا کہ وزیر اعظم جناب نریندر مودی نے سال 2047 تک ہندوستان کو ایک مکمل ترقی یافتہ ملک بنانے کا ہدف مقرر کیا ہے۔ یہ ہدف صرف اس وقت حاصل کیا جا سکتا ہے جب ملک کے نوجوان ہندوستان کو دنیا کے سب سے خوشحال ملک اور تعلیم یافتہ قوم میں تبدیل کرنے کو اپنی زندگی کا مشن بنائیں۔

************

ش ح۔ش ت۔ ع د

(U: 1720)