నావికాదళానికి సంబంధించిన నవకల్పన, స్వదేశీకరణ మూడో ఎడిషన్ లో భాగంగా ‘స్వావలంబన్ 2024 సదస్సును ఈ నెల 28, 29 తేదీల్లో న్యూఢిల్లీ లోని భారత్ మండపమ్ లో నిర్వహించనున్నారు.

ఇంతవరకు నిర్వహించిన స్వావలంబన్ రెండు ఎడిషన్లలో భారత పారిశ్రామిక రంగం వద్ద నుంచి 2000 కు పైగా ప్రతిపాదనలు భారతీయ నౌకా దళానికి అందాయి. తొలి నమూనాలను (ప్రోటోటైప్స్)ను అభివృద్ధి పరచడానికి వీలుగా వాటిని155 సవాళ్లకు కుదించారు. ఐడీఈఎక్స్ (iDEX) పథకంలో 200 సూక్ష్మ, లఘు, మధ్యతరహా, వాణిజ్య వ్యవస్థలు (ఎమ్ఎస్ఎమ్ఈస్), అంకుర సంస్థల (స్టార్ట్-అప్స్)తో సమన్వయాన్ని నెలకొల్పుకోవడానికి ఈ కార్యక్రమం తోడ్పడింది.

ఇది వరకు నిర్వహించిన సదస్సుల్లో గడించిన అనుభవం స్వావలంబన్ 2024 కు దోహద పడుతుందని ఆశిస్తున్నారు. నవకల్పన, స్వదేశీ కరణల దిశలో సరికొత్త ఉత్తేజం కూడా లభిస్తుందన్న భావన ఉంది. ఈ కార్యక్రమంలో వైమానిక, (సముద్ర) ఉపరితల నిఘా, ఉపరితల, వైమానిక, జలగర్భ రంగాల్లో స్వతంత్ర ప్రతిపత్తితో పనిచేయగల వ్యవస్థలు, కృత్రిమ మేధ (ఏఐ), ఇంకా క్వాంటమ్ టెక్నాలజీ ల వంటి విశిష్ట సాంకేతికతల ఆలంబనగా రూపొందిన ఉత్పాదనలను ప్రగతి మైదాన్ లోని పద్నాలుగో పెద్ద గదిలో ఈ నెల 28 వ, 29 వ తేదీలలో ప్రదర్శించనున్నారు. ఆయా రంగాలకు సంబంధించిన ఇష్టాగోష్ఠిలను భారత్ మండపంలో ఈ నెల 29న నిర్వహించనున్నారు. ఈ సందర్భంగా కొత్తగా ఉనికిలోకి వస్తున్న సాంకేతికతలు, రాబోయే కాలంలో యుద్ధం  ఎలాంటి రూపురేఖలను సంతరించుకొంటుంది, స్వదేశీకరణ, నవకల్పనలకు ప్రోత్సాహాన్ని ఇవ్వడం, నవకల్పనల సంస్కృతిని పెంపొందింప చేయడం వంటి అంశాలపై విధాన రూపకర్తలు, నూతన ఆవిష్కర్తలు, అంకుర సంస్థలు, ఎమ్ఎస్ఎమ్ఈ స్, ఆర్థిక సహాయ సంస్థలు, పెట్టుబడిదారులు చర్చోపచర్చలు చేయనున్నారు.  మరింత సమాచారాన్ని తెలుసుకోవడానికి niio-tdac@navy.gov.in, mprcnavy.321[at]gmail[dot]com అన్న వెబ్ చిరునామాలో సంప్రదించవచ్చు.

 

****

(Release ID: 2064185) Visitor Counter : 96