চহি খুদিংগী ওক্তোবর 11দা পাংথোকপা মালেমগী নুপীমচাশিংগী নুমিৎ অসি মালেম শিনবা থুংনা নুপীমচাশিংদা শক্তি পীবা অমসুং ঙাক-শেনবগী তঙাই ফদবা অদু পুক্নিং থৌগৎপা অমনি। নুপামচাশিং অমসুং নুপীমচাশিংগী মরক্তা মান্নবা, এজুকেসন অমসুং খুদোংচাবশিং ফংহনবগী মরুওইবা অদু নুমিৎ অসিনা পুক্নিং থৌগৎলি। নুমিৎ অসিনা নুপীমচাশিংনা চাউখৎপা ঙমগদবা এনভাইর্নমেন্ত অমা শেমগৎনবা নীংশিংহল্লি, মসিনা মখোয়দা মখোয়গী তুংলমচৎপু লমজিংনবা অমসুং শেমগৎনবগী খুৎলাইশিং পীনবা থাজবা পীরি।

মালেমগী নুপীমচাশিংগী নুমিৎ

1995দা, বৈজিংদা ৱার্ল্দ কনফরেন্স ওন ৱিমেননা মালেম শিনবা থুংনা নুপী অমসুং নুপীমচাশিংগী হকশিং খুমাং চাউশিলহন্নবগীদমক অহোংবা অমা পুরকখি। লৈবাকশিংনা জেন্দর ইক্বেলিতী প্রমোৎ তৌনবা হৌজিক ফাওবদা শেমখিবা খ্বাইদগী প্রোগ্রেসিভ ওইবা ফ্রেমৱার্ক ওইরিবা বৈজিং দিক্লারেসন অমসুং প্লেৎফোর্ম ফোর এক্সনবু অপুনবা ওইনা য়াখি। অহানবা ওইনা, দিক্লারেসন অসিনা নুপীমচাশিংগী অখন্নবা হকশিং অদু অখন্নবা মওংদা খঙহনখি অমসুং মখোয়গী অখন্নবা মথৌ তাবশিং অমসুং শীংনবশিং অদু কোকহন্নবগীদমক মপুংফাবা মালেমগী ওইবা থবক পায়খৎনবা হায়খি।

মালেম পুম্বগী ওইনা চৎনরিবা থৌওং অসিদা য়ুম্ফম ওইদুনা, য়ুনাইতেদ নেসন্স জেনরেল এসেমব্লীনা দিসেম্বর 19, 2011দা রিজোলুসন 66/170 পাস তৌদুনা ওক্তোবর 11বু মালেমগী নুপীমচাশিংগী নুমিৎ ওইনা পাংথোকখি। নুমিৎ অসি নুপীমচাশিংগী হকশিং খঙদোক্নবা অমসুং মালেমগী ওইনা মখোয়না থেংনরিবা অখন্নবা খুদোংচাদবশিংগী মতাংদা খঙহন্নবা থৌরাং তৌই। মালেমগী নুপীমচাশিংগী নুমিৎনা নুপীমচাশিংবু শক্তি পীনবা অমসুং মখোয়গী মীওইবগী হকশিং ঙাকথোকপগী তঙাইফদবা অদু পুক্নিং থৌগৎলি। মসিনা ইনখৎলক্লিবা নুপীমচাশিংনা মহৈ-মশিং তম্বা, সেফতী অমসুং হেল্থকেয়রগীদমক্তা নুপাশিংগুম্না চপ মান্নবা খুদোংচাবা ফংগদবনি হায়বসি নীংশিংহল্লি। করিগুম্বা নুপীমচাশিংবু মখোয়গী হৌগৎলক্লিবা চহিশিংদা মপুং ফানা মতেং পাংবরবদি, মখোয় অসি মালেম শিনবা থুংনা খুন্নাই অমসুং শেন্মিৎলোনগী অহোংবা পুরক্নবা, তুংলমচৎকী শিন্মীশিং, ইন্ত্রপ্রিনরশিং, লুচিংবশিং অমসুং অহোংবা পুরকপা মীওইশিং ওইনবগী শক্তি লৈ।

গর্ল্স ভিজন ফোর দি ফ্যুচর: থিম 2024

চহি অসিগী মালেমগী নুপীমচাশিংগী নুমিৎকী থিম অসি 'গর্ল্স' ভিশন ফোর দি ফ্যুচর'নি। UNICEFকী রিসর্চ অমনা উৎলি মদুদি নুপীমচাশিংনা অৱাবা কয়া মায়োক্নরবসু, মখোয়দা আশা লৈ অমসুং হেন্না ফবা তুংলমচৎ অমা শেমগৎনবা লেপ্পা লৈতনা হোৎনরি। নুমিৎ খুদিংগী, মালেম শিনবা থুংনা লৈরিবা নুপীমচাশিংনা মখোয়বু ঙাক-শেনবা, ইকাই খুম্নবা অমসুং শক্তি পীনবা ৱাখল্লোন অমগী মায়কৈদা থবক তৌরি।

অদুবু মখোয় মথন্তনা মসি পাংথোকপা ঙম্লোই। মখোয়না মখোয়গী মথৌ তাবশিং অদু খংবা অমসুং রেস্পোন্স তৌবা সরকারশিং, কম্ম্যুনিতীশিং অমসুং মীওইশিংবু মরী লৈনবশিং মথৌ তাই। নুপীমচাশিংদা অচুম্বা রিসোর্সশিং অমসুং খুদোংচাবশিং পীবা মতমদা, মখোয়গী পোতেন্সিএল অসি অকক্নবা লৈতে। অমসুং মখোয়না লুচিংবা মতমদা, অফবা শাফু অসি মখোয় মশামক্তা নত্তনা মখোয়গী ইমুং-মনুং, কম্ম্যুনিতি অমসুং শেন্মিৎলোনদা শন্দোকই।

নুপীমচাশিংগী হকশিংগীদমক করিগীদমক লেপ্পকদবা?

নুপীমচা অমা পোকপনা মীওই অমগী তুংলমচৎকী পান্দম অদু লেপথোকপা য়াদে। মালেম শিনবা থুংনা নুপীমচা মিলিয়ন কয়াগী ওইনা, মখোয়গী জেন্দরনা মখোয়গী অপাম্বশিংবু অথিংবা পীরি, মখোয়গী তুংলমচৎপু অথিংবা পীরি, অমসুং মখোয়গী তঙাই ফদবা হকশিং অদু ফংহনদে। মখাদা পীরিবা ইমেজ অসিদা উৎলিবগুম্না স্তেতিস্তিক্স অসিনা নুংঙাইতবা শক্তম অমা উৎলি:

অদুম ওইনমক, হায়রিবা শীংনবশিং অসি মায়োক্নবদা ঙমলোইদবা নত্তে। অচুম্বা ইনিসিএতিবশিং অমসুং পুন্না কন্না হোৎনবনা নুপীমচা খুদিংমক্তা হেল্থকেয়র, এজুকেসন অমসুং মায় পাক্নবগী মথৌ তাবা স্কিলশিং ফংহনগদবা তুংলমচৎ অমগী মায়কৈদা খোঙজেল য়াংনা চংশিনবা ঙমগনি।

ভারতকী সংবিধানদা জেন্দর ইক্বেলিতী

ভারতকী সংবিধান্না জেন্দর ইক্বেলিতীগী প্রিন্সিপল অদু ঙাক্না চৎলি। মসিনা নুপীশিংবু মান্নবগী গেরেন্তী পীবতা নত্তনা চহিচা কয়াগী সোসিও-ইকনোমিক অমসুং পোলিতিকেল দিস্ক্রিমিনেসনগী মায়োক্তা লান্থেংননবা এফর্মেতিব ওইবা পাম্বৈশিং লৌখৎনবা রাজ্যবু শক্তি পীরি। নুপীশিংদা সেক্স অমসুং জেন্দরদা য়ুম্ফম ওইবা খেৎনবা থম্বদগী ঙাকথোক্নবা ফন্দামেন্তেল রাইৎশিং পীরি। মখোয়না আইনগী মখাদা চপ মান্নবা ঙাক-শেনবগী হকসু লৈ, অমসুং নুপী খুদিংমক্না মখোয়গী ইকাই খুম্নবা অদু য়োকখৎপা, ফত্তবা থৌওংশিং চত্থবদগী ঙাকথোকপা হায়বসি নাগরিক খুদিংমক্কী থৌদাংনি।

নুপীশিংদা শক্তি পীনবা অসি পোলিসী খক্তদগী হেল্লি। মসি নুপীশিংদা ইকনোমিক, কলচরেল, সোসিএল অমসুং পোলিতিকেলগী লমদা চপ মান্নবা খুদোংচাবশিং ফংহন্নবা অয়াবা পীবা ত্রান্সফোর্মেতিব প্রোসেস অমনি। মসিদা য়ুমগী মনুং অমসুং মপান্দা ৱারেপ লৌবগী অমসুং হেন্না ফবা তুংলমচৎ অমগীদমক খুন্নাইগী অহোংবা পুরক্নবা ইথিল পীবগী তৌবা ঙম্বসু য়াওরি।

নুপীমচাগীদমক স্কিমশিং: সরকারগী ইনিসিএতিবশিং

2011গী সেন্সসকী মতুং ইন্না নুপীগী অপুনবা মীশিং অসি করোর 58.75[1] ওই হায়না রেজিস্তর তৌরে। মসিনা তুং কোইনা চৎনগদবা চাউখৎ থৌরাংগীদমক মখোয়গী শক্তি অমসুং ঙাক-শেনবগী মরুওইবা থৌদাং অদু ময়েক শেংলে। মখোয়গী হোলিস্তিক ওইবা গ্রোথ ফংহনবা অসি মখোয়গী ইন্দিভিজুএল ৱেলফিয়রগীদমক্তা মরুওইবতা নত্তনা খুন্নাইগী অপুনবা চাউখৎ-থৌরাংগীদমক্তসু মরুওই। মরুওইনা, নুপীমচাশিংগী হকশিং অমসুং খুদোংচাবশিংবু মশক খঙবা অমসুং ঙাকপা অসি হেন্না চপ মান্নবা তুংলমচৎ অমা শেমগৎনবগীদমক তঙাইফদবা অমনি।

ভারত সরকারনা নুপীমচাশিংবু শক্তি লৈহন্নবা পান্দম থমদুনা অমসুং খুন্নাইদা মখোয়গী মরুওইবা থৌদাংবু মশক খঙনা মখল কয়াগী স্কিমশিং হৌদোকখ্রে। বেতি বচাও, বেতি পরাও অমসুং সুকন্যা সমৃদ্ধি য়োজনাগুম্বা ইনিসিএতিবশিং অসিনা জেন্দর ইক্বেলিতি প্রমোৎ তৌনবা অমসুং নুপীমচাশিংগী তুংলমচৎকীদমক এজুকেসন অমসুং লুহোংবগীদমক শেল তুংশিন্নবা পুক্নিং থৌগৎতুনা হোৎনরিবশিং অদু উৎলি। 2015দা হৌদোকখিবা সুকন্যা সমৃদ্ধি য়োজনা অসিনা মমা-মপাশিংদা মখোয়গী মচানুপীশিংগী তুংলমচৎতা শেল থাদনবা অমসুং চপ মান্নবা খুদোংচাবশিং ফংহন্নবা মতেং পাংলি। মসিগী মথক্তা, এদোলসেন্ত গর্ল্সকী স্কিম (SAG) অমসুং মেনসচ্যুএল হাইজিন প্রমোসনগী স্কিম অসিনা নুপীশিংগী হকশেল অমসুং ন্যুত্রিসনগী মথৌ তাবশিং কোকহল্লি। উদান অসি 2014দা হৌদোকখিবা অনৌবা প্রোজেক্ত অমনি। মসিগী পান্দমদি মমিং লৈরবা ইঞ্জিনীয়রিং ইন্সতিত্যুসনশিংদা নুপী মহৈরোইশিং মশিং য়াম্না য়াওদবা অমসুং স্কুল এজুকেসন অমসুং ইঞ্জিনীয়রিং এন্ত্রান্স একজামিনেসনগী মরক্তা লৈরিবা খেন্নবা অদু কোকহন্নবা হোৎনবনি। মে 2008দা হৌদোকখিবা নেস্নেল স্কিম ওফ ইন্সেন্তিব তু গর্ল্স ফোর সেকেন্দরী এজুকেসন (NSIGSE) না নুপীমচাশিং, মরুওইনা সেদ্যুল কাস্ত (ST) অমসুং সেদ্যুল ত্রাইব (SC) কম্ম্যুনিতীশিংগী মহৈ তম্বগী খুদোংচাবশিং হেনগৎহন্নবা পান্দম থম্লি। অদুগা উদান অমসুং নেস্নেল স্কিম ওফ ইন্সেন্তিব তু গর্ল্স ফোর সেকেন্দরী এজুকেসনগুম্বা এজুকেস্নেল ইনিসিএতিবশিং অসি মহৈ তম্বগী খুদোংচাবশিং হেনগৎহন্নবা অমসুং স্কুল তোকপগী চাং হন্থহন্নবা শেমগৎপনি।

মখা তানা, নুপীমচাশিংবু শক্তি পীনবা অমসুং ঙাকথোক্নবগীদমক লৌখৎলিবা আইনগী ওইবা খোঙথাংশিংদা মরুওইবা খোঙথাং কয়া অমা য়াওরি। চাইল্দ মেরীয়েস প্রোবিজন এক্ত, 2006না চাইল্দ মেরীয়েস মুত্থৎনবা পান্দম থম্লি। ইমপ্লিমেন্ত তৌবা হেনগৎহন্নবগীদমক 2020দা অপদেৎ তৌরবা কাংলোনশিংগা লোয়ননা প্রোতেক্সন ওফ চিলদ্রেন ফ্রোম সেক্সুএল ওফেন্স (POCSO) এক্ত, 2012না চাইল্দ এব্যুজ কোকল্লি। জুভেনাইল জস্তিস এক্ত, 2015না অঙাংশিংগী মথৌ তাবশিং য়েংশিল্লি অমসুং প্রোতেক্সন ফংহল্লি। মিসন ভৎসল্যনা চাইল্দ হেল্পলাইন অমসুং ত্রেক চাইল্দ পোর্তেলগুম্বা সর্ভিসশিংগা লোয়ননা মাংখিবা অঙাংশিংবু মতেং পাংনবগীদমক চাইল্দ দিবেলপমেন্ত অমসুং প্রোতেক্সন্দা মীৎয়েং থম্লি। ত্রেক চাইল্দ পোর্তেল অসি 2012দগী মথৌ তৌবা হৌরকখি। পোর্তেল অসিনা পুলিস স্তেসনশিংদা রিপোর্ত তৌরিবা ‘মিসিং' অঙাংশিংগা চাইল্দ কেয়র ইন্সতিত্যুসন (CCI) দা লৈবা 'ফাউন্দ' অঙাংশিংগা চান্নহন্নবা মতেং পাংই। পি.এম. কেয়র্স ফোর চিলদ্রেন স্কিমনা কোবিদ-19না মরম ওইদুনা ওর্ফান ওইরবা অঙাংশিংদা মতেং পাংলি। মসিগী মথক্তা, NIMHANS অমসুং E-SAMPARK প্রোগ্রামগা খুৎশম্নদুনা মেন্তেল হেল্থ অমসুং মেদিকেল কেয়র ফংহল্লি।

পুন্না খোঙথাংশিং অসিনা ভারত্তা নুপীমচাশিংগী শাফবা এনভাইর্নমেন্ত অমা শেমগনি, মখোয়গী হকশিং অমসুং ৱেল-বিং প্রমোৎ তৌগনি।

অথুবা মতমদা থবক পাংথোকপা মথৌ তাবা

নুপীমচাশিংবু মতেং পীনবগীদমক অথুবা মতমদা থবক লৌখৎপগী তঙাইফদবা অসি লায়না লৌবা য়ারোই। নুপীমচাশিংগী তুংলমচৎতা শেল থাদবা হায়বসি ঐখোয়গী মালেমগী খুন্নাইগী অপুনবা তুংলমচৎতা হকথেংননা শেল থাদবনি। মালেমগী নুপীমচাগী নুমিৎ অসিদা, ঐখোয়না নুপীমচা খুদিংমক্কী হক ঙাক্নবা অমসুং মখোয়গী মপুং ফানা তৌবা ঙম্বদা মতেং পাংনবা ঐখোয়গী অচেৎপা ফিরেপ অদু অমুক হন্না শৌগৎসি। হৌজিক থবক তৌবগী মতম ওইরে, মরমদি নুপীমচাশিংনা চাউখৎলকপা মতমদা, খুন্নাইনা চাউখৎলি!

রিফরেন্সশিং :-

https://www.unicef.org/gender-equality/international-day-girl:~:text=International%20Day%20of%20the%20Girl%202024&text=Observed%20annually%20on%2011%20October,about%20girls%20and%20their%20rights.

এন্যুএল রিপোর্ত 2022-23: https://wcd.php-staging.com/documents/annual-report

https://www.un.org/en/observances/girl-child-day

https://pib.gov.in/PressNoteDetails.aspx?NoteId=153206&ModuleId=3&reg=3&lang=1

https://pib.gov.in/PressReleaseIframePage.aspx?PRID=2044607

মসিদা pdf ফাইল ফংবীগনি

*****