கொடைக்கானல் சூரிய ஆய்வகத்தில் சூரியனின் 100 ஆண்டுகால தினசரிப் பதிவுகளைப் பயன்படுத்தி, வானியலாளர்கள் முதன்முறையாக, பூமத்திய ரேகையிலிருந்து அதன் துருவப் பகுதிகள் வரை சூரியனின் நிறமண்டலத்தின் சுழற்சி வேகத்தில் ஏற்படும் மாறுபாட்டை வரைபடமாக்குவதில் வெற்றி பெற்றுள்ளனர். சூரியனின் உள் செயல்பாடுகளின் முழுமையான படத்தை வழங்க இந்த ஆராய்ச்சி உதவும்.

பூமி ஒரு திடமான பந்து போல் சுழல்கிறது. ஒவ்வொரு 24 மணி நேரத்திற்கும் அது ஒரு முழு சுழற்சியை முடிக்கிறது. பரபரப்பான பெங்களூரு  முதல் அண்டார்டிகாவின் பனிப்பாறை சமவெளிகள் வரை பூமியில் எல்லா இடங்களிலும் இந்த சுழற்சி ஒரே மாதிரியாக உள்ளது. இருப்பினும், சூரியன் சொல்வதற்கு முற்றிலும் மாறுபட்ட கதை ஒன்று உள்ளது. பிளாஸ்மாவின் ஒரு மாபெரும் பந்தாக இருப்பதால், சூரியனின் வெவ்வேறு பகுதிகள் அவற்றின் அட்சரேகையைப் பொறுத்து வெவ்வேறு வேகத்தில் சுழல்கின்றன. சூரியனின் பூமத்திய ரேகை அதன் துருவங்களை விட மிக வேகமாக சுழல்கிறது என்பது நீண்ட காலமாக அறியப்பட்டது. பூமத்திய ரேகைப் பகுதி ஒரு முறை சுற்றி முடிக்க சுமார் 25 நாட்கள் மட்டுமே ஆகும், அதே நேரத்தில் துருவங்கள் நிதானமாக சுற்றிவர 35 நாட்கள் ஆகும். சுழற்சி வேகத்தில் உள்ள இந்த வேறுபாடு வேறுபட்ட சுழற்சி என்று அழைக்கப்படுகிறது. சுழற்சி வேகத்தில் உள்ள மாறுபாட்டின் சிக்கல்களைப் புரிந்துகொள்வது, அட்சரேகை மற்றும் நேரத்தின் செயல்பாடாக, சூரியனைப் புரிந்துகொள்வதற்கு முக்கியமானது. ஏனெனில், சூரியனின் காந்தப்புலத்துடன் வேறுபட்ட சுழற்சியின் தொடர்பு சூரிய டைனமோ, 11 ஆண்டு சூரிய சுழற்சி மற்றும் பூமியில் காந்த புயல்களை உருவாக்கும் அதன் தீவிர செயல்பாட்டு காலங்களுக்குப் பின்னால் உள்ளது.

வேறுபட்ட சுழற்சியின் கண்டுபிடிப்பு 19-ம் நூற்றாண்டில் காரிங்டனுக்கு முந்தையது. அவர் சூரியனின் மேற்பரப்பில் புலப்படும்  சூரிய புள்ளிகள் அவற்றின் அட்சரேகையைப் பொறுத்து வெவ்வேறு வேகத்தில் சுழல்வதை கவனித்தார். இருப்பினும், சூரிய பூமத்திய ரேகைக்கு வடக்கு அல்லது தெற்கே சுமார் 35 டிகிரி அட்சரேகைகளுக்கு மேல்  சூரிய புள்ளிகள் தோன்றாது. துருவ அட்சரேகைகளுக்கு நெருக்கமான வேறுபட்ட சுழற்சியை அளவிட பிற முறைகள் பயன்படுத்த வேண்டியிருந்தது. இவை இந்தக் குறிப்பிட்ட நோக்கத்துக்குப் பயன்படுத்தும்  எளிதான நிறமாலை வரைவியல்களைச் சார்ந்திருந்தன அல்லது உயர் அட்சரேகைகளில் எப்போதாவது நிகழும் அரிய சூரியப் புள்ளிகளுக்காகக் காத்திருக்க வேண்டியிருந்தது. இந்த முறைகள், ஒரு சூரிய சுழற்சியில், நேரத்திற்கு ஏற்ப மாறுபடும் தன்மைகளை உறுதிப்படுத்த பொருத்தமற்றவை.

மத்திய அறிவியல் தொழில் நுட்பத்துறையின்  தன்னாட்சி நிறுவனமான இந்திய வானியற்பியல் நிறுவனத்தால் இயக்கப்படும் கொடைக்கானல் சூரிய ஆய்வகத்தால் பராமரிக்கப்படும் 100 ஆண்டுகளுக்கும் மேலான சூரியனின் தினசரிப்  பதிவுகளிலிருந்து சூரிய ஒளிப்பகுதிகள்  மற்றும் நெட்வொர்க்குகளை   வானியலாளர்கள் பயன்படுத்தினர். இந்த ஆய்வகம் இந்த ஆண்டு தனது 125 வது ஆண்டு விழாவைக் கொண்டாடுகிறது.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                 

"முழு உலகிலும்  இதுபோன்ற இரண்டு இடங்களில் ஒன்றாக இருக்கும் கொடைக்கானல் சூரிய ஆய்வகம்  நீண்ட காலத் தரவுகளைக் கொண்டுள்ளது" என்று ஐஐஏவில் பணிபுரியும், இந்த ஆய்வின் இணை ஆசிரியரான  முத்து பிரியாள்  கூறினார். "சுழற்சி வேகத்தை அளவிட சோலார் ஒளிப்பகுதிகள் மற்றும் நெட்வொர்க்குகளைப் பயன்படுத்துவதற்கான யோசனையை நாங்கள் எடுத்துக்கொண்டோம். குறிப்பிட்ட 393.3 நானோமீட்டர்  அலைநீளத்தில் பிடிக்கப்பட்ட படங்கள் (கால்சியம் கே ஸ்பெக்ட்ரல் லைன் காரணமாக) கீழ் மற்றும் நடுத்தர நிறமண்டலத்தை வெளிப்படுத்துகின்றன;  பிளேஜ்கள் (பிரகாசமான பகுதிகள்) மற்றும் நெட்வொர்க் செல்கள் (வெப்பச்சலன கட்டமைப்புகள்) போன்ற முக்கிய அம்சங்களைக் காட்டுகின்றன" என்று அவர் மேலும் தெரிவித்தார்.

இந்திய வானியற்பியல் நிறுவனப் பேராசிரியர் பி.ரவீந்திரா கூறுகையில், "பூமத்திய ரேகையிலிருந்து துருவத்திற்கு சூரியனின் சுழற்சியை வரைபடமாக்க விஞ்ஞானிகள் முதல் முறையாக நிறமண்டல  நெட்வொர்க் செல்களை வெற்றிகரமாக பயன்படுத்தியதை இந்தப் பணி குறிக்கிறது. சூரியனின் வேறுபட்ட சுழற்சியைப் புரிந்துகொள்வது அதன் காந்தப்புலம் மற்றும் செயல்பாட்டைப் புரிந்துகொள்ள முக்கியமானதாகும். நிறமண்டல அம்சங்களைப் பயன்படுத்தும் இந்த ஆராய்ச்சி சூரியனின் உள் செயல்பாடுகளைப் பற்றிய முழுமையான படத்திற்கு வழி வகுக்கிறது" என்றார்.

இந்தக் கட்டுரை வானியற்பியல் இதழில் "கொடைக்கானல் தரவிலிருந்து பெறப்பட்ட கால்சியம்-கே அம்சங்களைப் பயன்படுத்தி பூமத்திய ரேகை முதல் துருவ சூரிய நிறமண்டல  வேறுபட்ட  சுழற்சி" என்ற தலைப்பில் வெளியிடப்பட்டது.  கராயத், ஹேமா (இந்திய வானியற்பியல் நிறுவனம் மற்றும் எம்.எல்.கே.பி.ஜி கல்லூரி, பல்ராம்பூர்) மற்றும் இந்திய வானியற்பியல் நிறுவனத்தின் சிங், ஜகதேவ், பிரியல், முத்து, ரவீந்திரா. பி. ஆகியோரால் எழுதப்பட்டது.

கட்டுரைஇணைப்புக்கு: https://automatedtest.iopscience.iop.org/article/10.3847/1538-4357/ad4992 

மேலும் விவரங்களுக்கு இந்த ஆங்கில செய்திக்குறிப்பைக் காணவும்: https://pib.gov.in/PressReleasePage.aspx?PRID=2058531

***

SMB/RS/KR

(Release ID: 2058599) Visitor Counter : 87