ప్రభుత్వం అమలు చేస్తున్న ‘స్వచ్ఛ భారత్ అభియాన్’కు అనుగుణంగా, ఈరోజు అన్ని తీరప్రాంత రాష్ట్రాలు, కేంద్ర పాలిత ప్రాంతాల్లో భారత తీరరక్షక దళం (ఐసీజీ) అంతర్జాతీయ తీరప్రాంత పరిశుభ్రతా దినోత్సవం 2024 (ఐసీసీ-2024)ని నిర్వహించింది. పర్యావరణ పరిరక్షణ పట్ల భారత యువతలో పెరుగుతున్న నిబద్ధతను చాటుతూ దేశవ్యాప్తంగా ఎన్‌సిసి క్యాడెట్‌లు, ఎన్‌ఎస్‌ఎస్ వాలంటీర్లు, పాఠశాల, కళాశాల విద్యార్థులు పెద్ద సంఖ్యలో ఈ కార్యక్రమంలో పాలుపంచుకున్నారు.

కేంద్ర, రాష్ట్ర ప్రభుత్వాల సంస్థలు, మునిసిపల్ కార్పొరేషన్లు, ప్రభుత్వేతర సంస్థలు, మత్స్యకారుల సంఘాలు, ఓడరేవులు, చమురు ఏజెన్సీలు, ఇతర ప్రైవేట్ సంస్థల గణనీయ సహకారంతో ఐసీసీ-2024 ప్రచారం దేశవ్యాప్తంగా నిర్వహించారు. ఈ ఐక్య ప్రయత్నం సముద్ర సంరక్షణ, పర్యావరణ పరిరక్షణ పట్ల వారి అంకితభావాన్ని చాటింది.

ఈ కార్యక్రమంలో భాగంగా కార్యకర్తలందరూ దేశంలోని తీరప్రాంతాల్లో చెత్తను, వ్యర్థాలను తొలగించడమే కాకుండా, పరిశుభ్రమైన, ఆరోగ్యకరమైన సముద్ర పర్యావరణ వ్యవస్థ ఆవశ్యకతను ప్రచారం చేశారు. భౌతిక శుభ్రతతో పాటు, సుస్థిరమైన పద్ధతులు, సముద్ర జీవులపై కాలుష్యం వల్ల కలిగే హానికరమైన ప్రభావం గురించి ఈ కార్యక్రమం ద్వారా ప్రజలకు అవగాహన కల్పించారు.

ఐక్యరాజ్యసమితి పర్యావరణ కార్యక్రమం, దక్షిణాసియా సహకార పర్యావరణ కార్యక్రమం ఆధ్వర్యంలో ప్రపంచవ్యాప్తంగా ప్రతియేటా సెప్టెంబరు మూడో శనివారం నిర్వహించే ఐసీసీ డే ఒక కీలకమైన పర్యావరణ కార్యక్రమంగా కొనసాగుతున్నది. సమాజ భాగస్వామ్యాన్ని, పర్యావరణపరమైన నాయకత్వ భావనను పెంపొందించే లక్ష్యంతో భారత తీర రక్షక దళం ఆధ్వర్యంలో 2006 నుంచి మన దేశంలోనూ ఈ కార్యక్రమాన్ని నిర్వహిస్తున్నారు.

 

***

(Release ID: 2057645) Visitor Counter : 39