ملک میں زراعت کے شعبے کی تیز رفتار ترقی کے مقصد کے ساتھ، زراعت اور کسانوں کی بہبود اور دیہی ترقی کے مرکزی وزیر شیوراج سنگھ چوہان نے ریاست وار بات چیت شروع کی ہے، جس کے تحت مرکزی وزیر نے اتر پردیش (یوپی) اور مدھیہ پردیش (ایم پی) کے ریاستی وزرائے زراعت کے ساتھ، آج نئی دہلی کے کرشی بھون میں میٹنگ کی۔ یوپی کے وزیر زراعت جناب سوریہ پرتاپ ساہی اور ایم پی کے وزیر زراعت جناب اَدل سنگھ کنسانا نے اپنی اپنی ریاستوں میں زرعی شعبے کے مسائل پر تبادلہ خیال کرنے کے لیے اعلیٰ سطحی وفد کی قیادت کی۔

مرکزی وزیر جناب چوہان نے کہا کہ وزیر اعظم جناب نریندر مودی کی قیادت میں کسانوں اور زراعت کے شعبے کے مفادات سب سے اہم ہیں اور مرکزی حکومت ریاستوں کو ہر ممکن مدد فراہم کرتی رہے گی۔ میٹنگ کے دوران کئی امور زیر بحث آئے جن میں فصلوں کے تنوع کو فروغ دینا، انفارمیشن ٹیکنالوجی کا استعمال، ڈیجیٹل کراپ سروے، کسانوں کی رجسٹری، ای- نام، کسانوں کی پیداواری تنظیموں کو مضبوط کرنا، پی ایم فصل بیمہ یوجنا اور زراعت کا میکانائزیشن وغیرہ شامل ہیں۔ جناب چوہان نے کہا کہ یوپی میں فصلوں کے تنوع اور قدرتی کھیتی کو فروغ دینے کے کافی مواقع ہیں۔ انہوں نے یہ بھی اعادہ کیا کہ مرکز ایم پی سمیت تمام ریاستوں میں اُڑد، ارہر اور مسور کی 100 فیصد خریداری کے لیے پرعزم ہے۔ زراعت اور کسانوں کی بہبود کے محکمہ کے سکریٹری جناب سنجیو چوپڑا کے ساتھ وزارت کے سینئر افسران بھی میٹنگ کے دوران موجود تھے۔

گزشتہ ماہ زراعت اور کسانوں کی بہبود اور دیہی ترقی کے مرکزی وزیر کا چارج سنبھالنے کے بعد سے، جناب چوہان نے ریاستی وزراء کے ساتھ ملاقاتوں کا سلسلہ شروع کیا ہے تاکہ ان کی وزارتوں سے متعلق مسائل پر تفصیل سے تبادلہ خیال کیا جا سکے اور انہیں تیزی سے حل کیا جا سکے۔ مرکزی وزیر نے گزشتہ ماہ آسام اور چھتیس گڑھ کے ریاستی وزرائے زراعت سے ملاقات کی تھی۔

 

*********

ش ح۔م م۔ م  ر

 (U: 8219)

(Release ID: 2032189)