دیہی ترقیات کی مرکزی وزارت (ایم او آر ڈی) اور بہت چھوٹی، چھوٹی اور درمیانہ درجے کی صنعتوں کی مرکزی وزارت  (ایم او ایم ایس ایم ای) نے مکمل حکومت کے جذبے کے تحت، ایک مفاہمت نامے پر دستخط کیے، جس کا مقصد ایم او ایم ایس ایم ای کی فلیگ شپ اسکیموں کے توسط سے سیلف ہیلپ گروپ (ایس ایچ جی) کی خواتین کے زیر قیادت دیہی صنعتوں کو باقاعدہ شکل دینا اور انہیں مضبوط بنانا ہے۔

اس مفاہمت نامے پر دیہی ترقیات کی وزارت کی جوائنٹ سکریٹری محترمہ سواتی شرما، اور بہت چھوٹی، چھوٹی اور اوسط درجے کی صنعتی اکائیوں کی وزارت کی جوائنٹ سکریٹری محترمہ مرسی ایپاؤ  کے ذریعہ دستخط کیے گئے۔ اس موقع پر کرشی بھون، نئی دہلی میں ایم او آر ڈی کے سکریٹری جناب شیلیش کمار سنگھ، ایم او ایم ایس ایم ای کے سکریٹری جناب ایس سی ایل داس، ایم او آر ڈی کے ایڈشنل سکریٹری جناب چرنجیت سنگھ کے علاوہ دونوں وزارتوں کے سینئر افسران بھی موجود تھے۔

اس موقع پر اظہار خیال کرتے ہوئے، محترمہ سواتی شرما نے زور دیتے ہوئے کہا کہ ایم او ایم ایس ایم ای اور ایم او آر ڈی کے درمیان مفاہمت نامے پر دستخط  عمل میں آنا مکمل حکومت کے نقطہ نظر کو اجاگر کرتا ہے۔ انہوں نے اس امر پر روشنی ڈالی کہ یہ اشتراک لکھ پتی دیدیوں کو بااختیار بنانے میں آسانی فراہم کرے گا، جس کا تصور وزیر اعظم جناب نریندر مودی کے ذریعہ پیش کیا گیا ہے۔

اس موقع پر اظہار خیال کرتے ہوئے محترمہ مرسی ایپاؤ نے کہا کہ یہ مفاہمت نامہ صنعت کاری میں ایس ایچ جی دیدیوں کو مدد فراہم کرنے اور انہیں اوپر اٹھانے کے لیے دونوں وزارتوں کے مابین شراکت داری کو مضبوط کرے گا۔ ساتھ ہی ایم او ایم ایس ایم ای کی اہم پہل قدمیوں جیسے یشسوِنی – اپنا اُدیَم، اپنی پہچان، اُدیَم اسسٹ، وغیرہ کو بھی  بروئے کار لایا جائے گا۔

دیہی ترقیات کی وزارت کے سکریٹری اور ایم ایس ایم ای کی وزارت کے سکریٹری نے اس اشتراک کی ستائش کی اور اس مفاہمت نامے  کے سلسلے میں مختلف مشترکہ اقدامات کرنے کے تئیں اپنی عہد بندگی کا اعادہ کیا۔

**********

 (ش ح –ا ب ن۔ م ف)

U.No:8043