ਨਵੀਂ ਅਤੇ ਅਖੁੱਟ ਊਰਜਾ ਮੰਤਰਾਲੇ (ਐੱਮਐੱਨਆਰਈ), ਨੇ ਭਾਰਤੀ ਅਖੁੱਟ ਊਰਜਾ ਵਿਕਾਸ ਏਜੰਸੀ ਲਿਮਟਿਡ (ਆਈਆਰਈਡੀਏ) ਦੇ ਸਹਿਯੋਗ ਨਾਲ ਅੱਜ ਭੁਵਨੇਸ਼ਵਰ ਵਿੱਚ ਵੈਲਕਮ ਹੋਟਲ ਵਿੱਚ ਗਲੋਬਲ ਵਿੰਡ ਡੇਅ ਲਈ ਇੱਕ ਪ੍ਰੀ-ਇਵੈਂਟ ਕਾਨਫਰੰਸ ਦਾ ਆਯੋਜਨ ਕੀਤਾ।

ਸ਼੍ਰੀ ਲਲਿਤ ਬੋਹਰਾ, ਸੰਯੁਕਤ ਸਕੱਤਰ* (ਐੱਮਐੱਨਆਰਈ) ਦਾ ਭਾਸ਼ਣ ਡਾ. ਬੀ. ਕੇ. ਮੋਹੰਤੀ, ਡਾਇਰੈਕਟਰ (ਵਿੱਤ), ਆਈਆਰਈਡੀਏ ਵਲੋਂ ਪੜ੍ਹਿਆ ਗਿਆ, ਜਿਸ ਵਿੱਚ ਉਨ੍ਹਾਂ ਨੇ ਪੂਰੇ ਭਾਰਤ ਵਿੱਚ ਅਖੁੱਟ ਊਰਜਾ ਦੇ ਤੇਜ਼ੀ ਨਾਲ ਵਿਕਾਸ 'ਤੇ ਜ਼ੋਰ ਦਿੱਤਾ ਅਤੇ ਓਡੀਸ਼ਾ ਰਾਜ ਸਮੇਤ ਭਾਰਤ ਸਰਕਾਰ ਵਲੋਂ ਚੁੱਕੇ ਗਏ ਕਦਮਾਂ ਨੂੰ ਉਜਾਗਰ ਕੀਤਾ। ਨੈਸ਼ਨਲ ਇੰਸਟੀਚਿਊਟ ਆਫ਼ ਵਿੰਡ ਐਨਰਜੀ (ਐੱਨਆਈਡਬਲਿਊਈ) ਦੇ ਅਨੁਸਾਰ, ਭਾਰਤ ਦੀ ਸਮੁੰਦਰੀ ਕੰਢੇ ਦੀ ਹਵਾ ਦੀ ਸਮਰੱਥਾ ਓਡੀਸ਼ਾ ਦੀ 12 ਗੀਗਾਵਾਟ ਦੀ ਸਮਰੱਥਾ ਦੇ ਨਾਲ, ਜ਼ਮੀਨੀ ਪੱਧਰ ਤੋਂ 150 ਮੀਟਰ ਉੱਪਰ 1,164 ਗੀਗਾਵਾਟ ਹੋਣ ਦਾ ਅਨੁਮਾਨ ਹੈ।

* ਸ਼੍ਰੀ ਬੋਹਰਾ ਨਿੱਜੀ ਤੌਰ 'ਤੇ ਕਾਨਫਰੰਸ ਵਿਚ ਸ਼ਾਮਲ ਨਹੀਂ ਹੋ ਸਕੇ। 

ਆਪਣੇ ਮੁੱਖ ਭਾਸ਼ਣ ਵਿੱਚ, ਸ਼੍ਰੀ ਪ੍ਰਦੀਪ ਕੁਮਾਰ ਦਾਸ, ਸੀਐੱਮਡੀ, ਆਈਆਰਈਡੀਏ ਨੇ ਓਡੀਸ਼ਾ ਦੀ ਮਹੱਤਵਪੂਰਨ ਗ੍ਰੀਨ ਊਰਜਾ ਸਮਰੱਥਾ ਅਤੇ ਰਾਜ ਦੇ ਅੰਦਰ ਹੋਣ ਵਾਲੇ ਮੌਕਿਆਂ ਨੂੰ ਉਜਾਗਰ ਕੀਤਾ। ਉਨ੍ਹਾਂ ਟਿਕਾਊ ਊਰਜਾ ਪਹਿਲਕਦਮੀਆਂ ਨੂੰ ਅੱਗੇ ਵਧਾਉਣ ਵਿੱਚ ਰਾਜ ਦੀ ਅਹਿਮ ਭੂਮਿਕਾ 'ਤੇ ਜ਼ੋਰ ਦਿੰਦੇ ਹੋਏ, ਗ੍ਰੀਨ ਹਾਈਡ੍ਰੋਜਨ ਪ੍ਰੋਜੈਕਟਾਂ ਵਿੱਚ ਅਗਵਾਈ ਕਰਨ ਦੀ ਓਡੀਸ਼ਾ ਦੀ ਸਮਰੱਥਾ ਵੱਲ ਇਸ਼ਾਰਾ ਕੀਤਾ। 31 ਮਾਰਚ 2024 ਤੱਕ, ਆਈਆਰਈਡੀਏ ਨੇ ਅਖੁੱਟ ਊਰਜਾ ਵਿੱਚ ਕੁੱਲ 1,25,917 ਕਰੋੜ ਰੁਪਏ ਦੇ ਸੰਚਤ ਕਰਜ਼ੇ ਵੰਡੇ ਹਨ, ਜਿਸ ਵਿੱਚ 26,913 ਕਰੋੜ ਰੁਪਏ ਦੇਸ਼ ਭਰ ਵਿੱਚ ਪੌਣ ਊਰਜਾ ਪ੍ਰੋਜੈਕਟਾਂ ਲਈ ਵੰਡੇ ਗਏ ਹਨ। ਖਾਸ ਤੌਰ 'ਤੇ, ਆਈਆਰਈਡੀਏ ਦੁਆਰਾ ਓਡੀਸ਼ਾ ਵਿੱਚ ਅਖੁੱਟ ਊਰਜਾ ਪ੍ਰੋਜੈਕਟਾਂ ਲਈ 1,637 ਕਰੋੜ ਰੁਪਏ ਦਾ ਕਰਜ਼ਾ ਵੰਡਿਆ ਗਿਆ ਹੈ। ਸ਼੍ਰੀ ਦਾਸ ਨੇ ਓਡੀਸ਼ਾ ਦੀ ਅਖੁੱਟ ਊਰਜਾ ਨੀਤੀ 2022 ਨੂੰ ਵੀ ਰੇਖਾਂਕਿਤ ਕੀਤਾ, ਜਿਸਦਾ ਉਦੇਸ਼ RE ਮੈਨੂਫੈਕਚਰਿੰਗ ਅਤੇ ਉਭਰਦੀਆਂ ਤਕਨੀਕਾਂ ਜਿਵੇਂ ਕਿ ਗ੍ਰੀਨ ਹਾਈਡ੍ਰੋਜਨ, ਜਿਸ ਵਿੱਚ ਗ੍ਰੀਨ ਅਮੋਨੀਆ ਅਤੇ ਫਲੋਟਿੰਗ ਸੋਲਰ 'ਤੇ ਵਿਸ਼ੇਸ਼ ਫੋਕਸ ਦੇ ਨਾਲ, ਸਵੱਛ ਊਰਜਾ ਵਿੱਚ ਨਿਵੇਸ਼ ਨੂੰ ਵਧਾਉਣਾ ਹੈ। ਉਨ੍ਹਾਂ ਟਿਕਾਊ ਰਾਸ਼ਟਰੀ ਵਿਕਾਸ ਲਈ ਅਖੁੱਟ ਊਰਜਾ ਦੀ ਵਰਤੋਂ ਦੇ ਮਹੱਤਵਪੂਰਨ ਮਹੱਤਵ ਦੀ ਪੁਸ਼ਟੀ ਕੀਤੀ ਅਤੇ ਅਖੁੱਟ ਊਰਜਾ ਵਿਕਾਸਕਾਰਾਂ ਨੂੰ ਓਡੀਸ਼ਾ ਅਤੇ ਹੋਰ ਰਾਜਾਂ ਵਿੱਚ ਵਿਸਥਾਰਿਤ ਮੌਕਿਆਂ ਦਾ ਫਾਇਦਾ ਉਠਾਉਣ ਲਈ ਉਤਸ਼ਾਹਿਤ ਕੀਤਾ।

*********

ਪੀਆਈਬੀ | ਕ੍ਰਿਪਾ ਸ਼ੰਕਰ ਯਾਦਵ/ਕਸ਼ਤਿਜ ਸਿੰਘਾ