امور داخلہ اور امداد باہمی کےمرکزی وزیر جناب امت شاہ نے آج ویڈیو کانفرنس کے ذریعے احمد آباد میونسپل کارپوریشن،احمد آباد اربن ڈیولپمنٹ اتھارٹی اور سابرمتی ریور فرنٹ ڈیولپمنٹ کارپوریشن لمیٹڈ کے مختلف ترقیاتی پروجیکٹوں کا افتتاح اور سنگ بنیاد رکھا۔ اس تقریب کے دوران گجرات کے وزیر اعلیٰ بھوپیندر پٹیل سمیت کئی معززشخصیتیں بھی  موجود تھیں۔

 

 

اس موقع پر جناب امت شاہ نے کہا کہ آج احمد آباد شہر کے سبھی تینوں لوک سبھا حلقوں میں 3000 کروڑ روپے سے زیادہ  مالیت کے تقریباً 63 ترقیاتی پروجیکٹوں کا افتتاح اور سنگ بنیاد رکھنے کی تقریبات منعقد کی گئی ہیں۔ انہوں نے بتایا کہ گاندھی نگر لوک سبھا حلقے میں 1800 کروڑ روپے کی لاگت سے 27 پروجیکٹوں، احمد آباد مشرقی لوک سبھا حلقے میں 1040 کروڑ روپے کی لاگت کے 25 پروجیکٹوں اور احمد آباد مغربی لوک سبھا حلقے میں 168 کروڑ روپے کی لاگت والے 11 پروجیکٹوں کا افتتاح کیا گیا ہے اوران کا سنگ بنیاد رکھاگیا ہے۔

 

 

داخلی امور اورامداد باہمی کےمرکزی وزیر نے کہا کہ وزیر اعظم جناب نریندر مودی نے گجرات میں جو ترقی کا سفر شروع کیا تھا وہ پورے ملک میں پھیل رہا ہے۔ پچھلے کچھ سالوں میں گجرات میں ایسی ترقی ہوئی ہے جسے ہر فرد محسوس کر سکتا ہے۔ جناب شاہ نے اس بات کاذکر کیا کہ آج ہیبت پور، گوٹا اور تھلتیج میں تقریباً دو ہزار لوگوں کے لئے  اپنا گھر بنانے کے خواب کوپورا کیا گیا ہے۔ اس کے علاوہ رنگ روڈ پر انڈر پاسز، نہروں پر پلوں، آنگن واڑی عمارتوں، واٹر پیوریفیکیشن پلانٹس اور اوور برجوں کی افتتاحی تقریب منعقد کی گئی ہے۔ انہوں نے کہا کہ گاندھی نگر کے مضافاتی علاقے میں تقریباً 40 میونسپل اسکولوں کو اسمارٹ اسکولوں میں تبدیل کردیا گیا ہے، جہاں غریب  کنبوں کے بچے پڑھتے ہیں۔ ان 40 اسکولوں کو اسمارٹ اسکولوں میں تبدیل کرنے کے ساتھ ہی گاندھی نگر لوک سبھا حلقے کا ہر اسکول جدید اور اسمارٹ بن گیا ہے۔ ہزاروں بچوں کے لیے تعلیمی سہولیات کو جدید بنانے کی کوشش کی گئی ہے۔

 

 

جناب امت شاہ نے کہا کہ آج کل نو کلومیٹر تک پھیلے ہوئے بنیادی ڈھانچے سے متعلق مختلف کام جن میں صدر بازار سے اندرا پل اور ٹورینٹ پاور اسٹیشن سے اندرا برج تک شامل ہیں، سابرمتی ریور فرنٹ ڈیولپمنٹ کارپوریشن لمیٹڈ کے ذریعے مکمل کیے جا رہے ہیں۔ انہوں نے بتایا کہ ہر جگہ ہیلتھ اے ٹی ایم اور پرائمری اسکولوں کے لیے بھی کام جاری ہے۔ مزید برآں، احمد آباد شہر کے مغربی حصے میں پنجراپول جنکشن پر ایک اوور برج کی تعمیر اور جنوبی زون کے دانیلمڈا وارڈ میں چندولا جھیل کی خوبصورتی کے لیے کام جاری ہے۔

امور داخلہ اور امداد باہمی کے مرکزی وزیر نے کہا کہ ماضی کی حکومتوں کے دور میں پروجیکٹوں کا بھومی پوجن ہوتا تھا لیکن پھر کام ٹھپ ہوجاتا تھا، تاہم اب ایسا نہیں ہے۔ جناب شاہ نے اس بات کاذکر کیا کہ بحیثیت رکن پارلیمنٹ پچھلے پانچ سالوں میں انہوں نے جتنے بھی پروجیکٹوں کا افتتاح کیا ان میں سے 91 فیصد مکمل ہوچکے ہیں اور ان کا افتتاح ہوچکا ہے۔

 

 

جناب امت شاہ نے کہا کہ جب جناب نریندر مودی وزیر اعظم بنے تو انہوں نے اپنے منشور میں کئی ایسے پروجیکٹوں کا ذکر کیا تھا جو تقریباً 50-75 سالوں سے زیر التوا تھے۔ اس سے قبل، اپوزیشن جماعتیں ہمیشہ ایودھیا میں رام مندر کی تعمیر کے ہمارے وعدے کا مذاق اڑاتی تھیں، لیکن وزیر اعظم جناب نریندر مودی نے نہ صرف ایودھیا میں عظیم الشان رام مندر کے لیے سنگ بنیاد کی تقریب انجام دی بلکہ بھگوان شری رام کی مورتی کی تقدیس بھی کی۔ مندر کو لاکھوں لوگوں کے لیے کھولنے کا کام بھی انجام دیا گیا۔

امور داخلہ اور امداد باہمی کے مرکزی وزیر نے کہا کہ چاہے وہ ’ایک رینک، ایک پنشن‘ کو لاگو کرنا ہو یا جموں و کشمیر سے آرٹیکل 370 کو ہٹانا ہو، وزیر اعظم جناب نریندر مودی نے دکھایا ہے کہ وہ بظاہر ناممکن نظر آنے والے کاموں کو پورا کر سکتے ہیں۔اس کے ساتھ ساتھ 80 کروڑ غریبوں کو مفت اناج فراہم کرنا، 12 کروڑ غریبوں کے لیے بیت الخلاء کی تعمیر، 4 کروڑ لوگوں کے لیے رہائش فراہم کرنا، 10 کروڑ سے زیادہ غریبوں کو اجولا اسکیم کے تحت ایل پی جی کنکشن دینا، 14 کروڑ گھرانوں کو پائپ سے پانی فراہم کرنا جیسے اقدامات شامل ہیں۔ اور 11 کروڑ کسانوں کے بینک کھاتوں میں سالانہ 6,000 روپے کی براہ راست منتقلی شروع کر دی ہے۔ انہوں نے ذکر کیا کہ وزیر اعظم جناب نریندر مودی نے پورے ملک کو محفوظ اور خوشحال بنایا ہے اور نئی تعلیمی پالیسی متعارف کروا کر مستقبل کے شہریوں کے لیے تعلیم کی مضبوط بنیاد رکھی ہے۔

 

***********

 

ش ح ۔  ح ا - م ش

U. No.6136

(Release ID: 2014819) Visitor Counter : 74