زراعت اور کسانوں کی بہبود اور قبائلی امور کے مرکزی وزیر جناب ارجن منڈا نے آج نئی دہلی کے پوسا میں انڈین ایگریکلچرل ریسرچ انسٹی ٹیوٹ (آئی اے آر آئی) میں ایگریکلچرل سائنٹسٹس ریکروٹمنٹ بورڈ (اے ایس آر بی) کے گرلز ہاسٹل ’’فالگنی‘‘ اور ’’چین بھون‘‘ کا افتتاح کیا۔ زراعت اور کسانوں کی بہبود کی مرکزی وزیر مملکت محترمہ شوبھا کرندلاجے اور جناب کیلاش چودھری، ڈی اے آر ای کے سکریٹری اور انڈین کونسل آف ایگریکلچرل ریسرچ (آئی سی اے آر) کے ڈائریکٹر جنرل ڈاکٹر ہمانشو پاٹھک، اے ایس آر بی کے چیئرمین ڈاکٹر سنجے کمار، آئی اے آئی آر کے ڈائریکٹر ڈاکٹر اے کے سنگھ بھی اس موقع پر موجود تھے۔

اپنے خطاب میں جناب منڈا نے کہا کہ وزیر اعظم جناب نریندر مودی کی قیادت میں مرکزی حکومت زرعی شعبے اور کسانوں کی ترقی کے لیے پرعزم ہے اور ریاستی حکومتوں کے ذریعے بھی منصوبہ بند طریقے سے زراعت اور متعلقہ شعبوں نیز کسانوں کے مفاد میں کام کو آگے بڑھایا جا رہا ہے۔ وزیر اعظم جناب مودی چاہتے ہیں کہ ہمارے کسان خود کفیل اور بااختیار بنیں اور ملک کے ساتھ ساتھ دنیا کے بازاروں میں سپلائی کرنے کے قابل ہوں۔ اس کے لیے زرعی انفرا اسٹرکچر کو ترقی دینے کے ساتھ ساتھ مختلف اسکیموں اور پروگراموں کے ذریعے کام کیا جا رہا ہے۔ وزیر اعظم چاہتے ہیں کہ ہمارے کسان پیچھے نہ رہیں، اس کے لیے کاشت کاری کو جدید ٹیکنالوجی سے بھی جوڑا جا رہا ہے۔ وزیر اعظم سیٹلائٹ کی مدد سے لوگوں کو زراعت کے شعبے میں کام کرنے کی ترغیب بھی دے رہے ہیں۔ کرشی وگیان کیندر بھی اچھا کام کر رہے ہیں۔ کسانوں کی آمدنی میں مدد کے لیے مرکزی حکومت کی جانب سے ’’پردھان منتری کسان سمان‘‘ (پی ایم کسان) اسکیم سمیت کئی اسکیمیں چلائی جارہی ہیں۔ سنکلپ کے ساتھ ملک کو 2047 تک ترقی یافتہ بنانے کے لیے کام کیا جا رہا ہے۔

جناب منڈا نے تقریب میں موجود جھارکھنڈ کے قبائلی کسانوں سے کہا کہ وہ ان جدید ٹیکنالوجیز کو آگے لے جانے میں اپنا حصہ ڈالیں جس کے لیے انہوں نے یہاں تربیت حاصل کی ہے اور فیلڈ کے دورے کے دوران سیکھے اور سمجھے گئے بہترین طور طریقوں کو دور دراز کے علاقوں تک پہنچایا جائے۔ جناب منڈا نے کہا کہ پوسا میں نایاب بیجوں اور پودوں کے تحفظ کا کام بھی کیا جا رہا ہے۔ اس کے علاوہ معیار اور غذائیت پر توجہ دیتے ہوئے یہاں تحقیقی کام تیز رفتاری سے ہو رہا ہے۔

جناب منڈا نے دیگر کامیابیوں کا بھی تذکرہ کیا جن میں ہندوستان کا دنیا کی 5ویں سب سے بڑی معیشت بننا، جی- 20 کی صدارت کے ذریعے عالمی دوست بننا، کورونا بحران کا بہادری سے سامنا کرنا وغیرہ شامل ہیں۔ ڈاکٹر پاٹھک اور چیئرمین ڈاکٹر سنجے نے بھی اپنے خیالات کا اظہار کیا۔

آئی اے آر آئی کے ڈائریکٹر ڈاکٹر سنگھ نے کہا کہ ’’فالگنی‘‘ میں 500 کمرے ہیں۔ فوڈ کورٹ، سولر انرجی سسٹم، رین واٹر ہارویسٹنگ سسٹم، جنریٹر بیسڈ پاور بیک اپ، وائی فائی نیٹ ورک، آر او پینے کا پانی، فائر فائٹنگ کا نظام، پارکنگ، لفٹ سمیت تمام سہولیات اس ہاسٹل میں فراہم کی گئی ہیں۔ پروگرام کے دوران آئی سی اے آر، آئی اے آئی آر، اے ایس آر بی کے افسران، سائنس دان، اساتذہ، طلباء اور کسان بھی موجود تھے۔

 

******

ش  ح۔ م م ۔ م ر

U-NO. 4208

(Release ID: 2000983) Visitor Counter : 71