امور داخلہ اور امداد باہمی کے مرکزی وزیر جناب امت شاہ نے حال ہی میں جموں و کشمیر میں ہوئے دہشت گردانہ حملے کے مدنظر وہاں کے سیکورٹی  کے حالات کا جائزہ لینے کے لیے آج نئی دہلی میں ہوئی ایک میٹنگ کی صدارت کی۔ قومی سلامتی کے مشیر جناب اجت ڈوبھال، جموں و کشمیر کے لیفٹیننٹ گورنر جناب منوج سنہا، مرکزی ہوم سکریٹری، چیف آف آرمی اسٹاف، ڈائریکٹر (آئی بی)، مرکزی نیم مسلح افواج کے سربراہوں، مرکز کے زیر انتظام علاقہ جموں و کشمیر کے چیف سکریٹری اور ڈی جی پی نے میٹنگ میں شرکت کی۔

میٹنگ کے دوران جناب امت شاہ نے جموں و کشمیر میں دہشت گردی کے خاتمہ کے لیے سیکورٹی ایجنسیوں کے ایریا ڈومنیشن پلان کا جائزہ لیا۔ سیکورٹی گرڈ اور جموں و کشمیر میں سلامتی کے حالات کا جائزہ لیتے ہوئے جناب امت شاہ نے دہشت گردی مخالف مہم کو مضبوط کرنے اور دہشت گردوں کے ایکو سسٹم کو پوری طرح سے ختم کرنے کی ضرورت پر زور دیا۔ انہوں نے سیکورٹی ایجنسیوں کو حساس علاقوں میں مناسب تعیناتی کی صلاح دی۔ انہوں نے وزیر اعظم جناب نریندر مودی کی قیادت میں مرکزی حکومت کے ذریعے دہشت گردی کے خلاف زیرو ٹالرنس کی پالیسی جاری رکھنے کی بات دہرائی۔

مرکزی وزیر داخلہ نے کہا کہ دہشت گردی مخالف کارروائیوں کے دوران سبھی مناسب طریقہ کار کو اپنایا جانا چاہیے۔ جناب شاہ نے علاقے میں مقامی خفیہ نیٹ ورک کو مضبوط کرنے کی ضرورت پر زور دیا۔

جناب امت شاہ نے دہشت گردی سے متعلق واقعات اور در اندازی کے واقعات میں نمایاں کمی اور قانون اور نظم و نسق کی حالت میں قابل ذکر بہتری کے لیے سیکورٹی ایجنسیوں اور مرکز کے زیر انتظام علاقہ کی انتظامیہ کی کوششوں کی تعریف کی۔

*****

ش ح – ق ت

U: 3196