লৈবাক্কী ঙাক-শেন অমসুং লান্মীগী থবকশিংগী মতাংদা থিজিন্নবা অমসুং খন্ন-নৈনবা ১৮৭০ দা লিংখৎখিবা লৈবাক অসিগী খ্বাইদগী লিরবা থিঙ্ক-তেঙ্ক য়ুনাইতেদ সর্বিস ইন্সতিতুসন ওফ ইন্দিয়া (য়ু এস আই)না শীন্দুনা নবেম্বর ২১-২২,২০২৩দা নিউ দিল্লিদা এন্নুয়েল য়ু.এন ফোরম ২০২৩ পাংথোক্কনি। ‘মালেমগী হুমেনিতরিয়ান লো অমসুং পিছকিপ্পিং’ হায়বা হিরমদা মীফম অসি ইন্তরনেসনেল কম্মিতি ওফ রেদ ক্রোস অমসুং সেন্তর ফোর য়ু.এন পিছকিপ্পিং ওপরেসন্সগা খুৎশম্নদুনা পাংথোক্কদবনি।

লাম্বা চানদবা লালফমশিংগুমবা নাতৈ চাদবা ফিবমশিংদা য়ু.এন পিছকিপ্পিং মিসনশিং থম্বা হেনগৎলকপগা লোয়ননা, ইন্তরনেসনেল হুমেনিতরিয়ান লো( আই ঐচ এল)গী অচুম্বা পান্দমশিং ঙাকপা হায়বসি অরুবা অমা ওইরক্লে। অদুবু, মতম অসিগী মুক্নবশিং, নন-স্তেৎ এক্তরশিংগী থবকশিং, সহরগী লালফমশিংদা লান্মীশিং অমসুং মীচমগী মরক্তা খেন্নবা লৈরক্তবা অসিনা হৌজিক ইন্তরনেসনেল হুমেনিতরিয়ান লো চৎনবা খুদোংচাদবা কয়া থেংনরকপনি।

ফিবম অসিদা, ৱারি শান্দুনা অমসুং তোঙান-তোঙানবা থবকশিং পায়খৎতুনা য়ু.এন পিছ ওপরেসনশিংদা ইন্তরনেসনেল হুমেনিতরিয়ান লো থবক ওইনা পায়খৎপদা থেংনগদবা খুদোংচাদবশিং অমসুং ওইথোকপা য়াবশিং খন্ন-নৈনবা ফোরম অসিনা পান্দম থম্লি। সেসনশিংদা হৌজিক মায়োক্নরিবা ৱাফম খর হায়বদি মীচমশিং ঙাক-শেনবা, পিছকিপ্পরশিংগী মথক্তা খুৎ থারকপশিংগী মথক্তা থবক লৌখৎপা, পিছকিপ্পিং ওপরেসনশিংদা নুপীশিংগী থৌদাং অমসুং হেন্না অফবা ওপরেসনশিং পাংথোক্নবা তেক্নোলোজি শীজিন্নবগী মতাংদা কুপ্না থিজিনগনি।

পিছকিপ্পিংগী থবকশিংদা হকথেংননা খুদোংচাদবশিং মায়োক্নরবা অখঙ-অহৈশিং অমসুং থবক তৌরিবশিংদা মখোয়গী ওইবা ৱাফমশিং ফোরম অদুদা পুথোক্তুনা কুপ্না খন্নগনি। ভারতকী আর্মদ ফোর্সশিং অমসুং এক্সতর্নেল এফেয়ার্স মিনিস্ত্রিগী সেনিয়র ওফিসিএলশিংনা মরুওইবা ৱারোল পীগনি। ফোরম অদু নুমিৎ নিনি মখা অসিগুম্না পাংথোক্কনি:

• সেসন ১ দা নন-স্তেৎ এক্তরশিং য়াওবা ফিবমশিংদা পিছকিপ্পিংগী থবক্তা ইন্তরনেসনেল হুমেনিতরিয়ান লো শীজিন্নবা অমসুং সহরগী লালফমগী মতাংদা খন্নগনি।
• সেনসন ২দা মীচমগী অনিংবশিং ঙাক্নবা হোৎনবা থেংনরিবা খুদোংচাদবশিং অমসুং মখোয় ইন্তরনেসনেল হুমেনিতরিয়ান লোগী নিয়মশিংদা পুনশিন্দুনা থেংনবা হায়বগী মতাংদা খন্নগনি।
• সেসন ৩ দা পিছকিপ্পরশিংদা খুৎ থারকপদা মরম চাবা থবক পায়খৎনবা আইনগী ঙাক্লৌশিং য়েংশিনবা অমসুং মখোয় ঙাক-শেন্নবগী থবকশিং হেনগৎনবা পাম্বৈশিং য়েংশিনগনি।
• সেসন ৪দা পিছকিপ্পিংগী থবকশিংদা নুপীশিং শরুক য়াহনবগী মরুওইবা অমসুং নুপী পিছকিপ্পরশিংনা থেংনরিবা খুদোংচাদবশিংগী মতাংদা খন্নগনি।
• সেসন ৫ তা দেতা এনালাইতিক্স, এ.আই অমসুং এদভান্স সর্ভিলিয়েন্সকী খুৎথাংদা পিছকিপ্পিংগী থবকশিং হেন্না ফগৎনবা তেক্নোলোজি শীজিন্নবগী মতাংদা খন্নগনি।

য়ু.এন পিছকিপ্পিংগী থবকশিংদা ইন্তরনেসনেল হুমেনিতরিয়ান লো পুনশিন্নবা অমসুং মখা তানা ইন্তরনেসনেল হুমেনিতরিয়ান লো খন্ন-নৈনবা ৱারেপশিং লৌনবা পান্দম থমদুনা প্লেনারি সেসন অমগা লোয়ননা থৌরম অদু লোইশিনগনি। ফোরম অদুদা খন্ন-নৈনখিবশিং অদুনা পিছকিপ্পরশিং অমসুং মীচম-মীয়ামগী হকশিং ঙাক্তুনা অমসুং অশোই-অঙাম থোকহন্দনা পিছকিপ্পিংগী থবকশিং হেন্না মপুংফানা পাংথোক্নবা ত্রেনিং মোদুলশিং শেমগৎপা অমসুং থৌশিল শেম্বগী থবকশিংদা মতেং পাংগনি।

******