ڈومینیکن ریپبلک کی نائب صدر، عزت  مآب محترمہ راکیل پینا روڈریگز نے آج (3 اکتوبر 2023) راشٹرپتی بھون میں صدر جمہوریہ ہند  محترمہ  دروپدی مرمو سے ملاقات کی۔

  نائب صدر جمہوریہ کا ہندوستان کے پہلے دورہ پر خیرمقدم کرتے ہوئے صدر جمہوریہ نے کہا کہ اس دورے کا وقت بہت موزوں ہے کیونکہ ہندوستان اور ڈومینیکن ریپبلک اپنے سفارتی تعلقات کی 25 ویں سالگرہ منا رہے ہیں۔ انہوں نے کہا کہ دونوں ممالک کے درمیان دوطرفہ تعلقات گرمجوشانہ اور دوستانہ ہیں، جو جمہوریت کی مشترکہ اقدار اور عالمی مسائل پر نظریات کے وسیع اتحاد کی مضبوط بنیاد وں پر استوار ہیں ۔

صدر جمہوریہ نے اس بات کا ذکر کیا کہ ڈومینیکن ریپبلک لاطینی امریکہ میں ہندوستان کا آٹھواں سب سے بڑا تجارتی شراکت دار ہے۔ وہ پراعتماد تھیں کہ تجارتی  فوائد  کو مزیدمتنوع بنانے کی صلاحیت موجود ہے۔ انہوں نے کہا کہ دونوں ممالک کے درمیان  دواسازی کی مصنوعات، سمندری سائنس، موسمیات، تباہی سے  تحفظ فراہم کرنےوالے بنیادی ڈھانچے اور ڈیجیٹل ادائیگیوں کی ٹیکنالوجی جیسےشعبوں میں مل کر کام کرنے اور اپنے تجربے اور مہارت کے تبادلے کی گنجائش موجود ہے۔

صدر جمہوریہ نے کہا کہ صلاحیت کی تعمیر ہند-ڈومینیکن ریپبلک تعاون کے مرکزی ستونوں میں سے ایک ہے۔ انہیں یہ جان کر خوشی ہوئی کہ حال ہی میں، ہندوستان نے سائبر سیکورٹی اور ریموٹ سینسنگ کے اہم شعبوں میں ڈومینیکن ریپبلک کے عہدیداروں کے لیے دو خصوصی آئی ٹی ای سی تربیتی کورسز کا اہتمام کیا ہے۔

دونوں رہنماؤں نے اس بات پر اتفاق کیا کہ ہندوستان اور ڈومینیکن ریپبلک کے درمیان مسلسل تبادلے اور رابطوں سے ہمارے دوطرفہ تعلقات مزید مضبوط ہوں گے۔

*************

ش ح۔ س ب۔ رض

U. No.10290