ایڈمرل آر ہری کمار، چیف آف دی نیول اسٹاف (سی این ایس) نے 31 مئی 2023 کو وشاکھاپٹنم میں مشرقی بحریہ کی کمان میں منعقدہ ایک متاثر کن نیول انویسٹیچر (تفویض خطابات) تقریب میں صدر جمہوریہ ہند کی جانب سے بہادری اور ممتاز خدمات کے لیے اعزازات پیش کیے۔ بحریہ کے اہلکاروں کی بہادری، قیادت، پیشہ ورانہ کامیابیوں اور ممتاز خدمات کو خراج تحسین پیش کرنے کے لیے اس تقریب کا انعقاد کیا گیا۔

تقریب کے دوران 33 ایوارڈز دیے گئے، جن میں ونیت کمار ایل اے (اے ایچ) کو اور کمانڈر نشانت سنگھ (بعد از مرگ) کو نوسینا میڈل (بہادری)، 13 نو سینا میڈل (فرض شناسی)، 16 وششٹ سیوا میڈل، اور 2 جیون رکھشا پدک شامل ہیں۔

ان ایوارڈز کے علاوہ، سی این ایس نے ہتھیاروں کی بہتری اور الیکٹریکل انجینئرنگ کے شعبے میں اہم تحقیق کے لیے لیفٹیننٹ وی کے جین میموریل گولڈ میڈل کے ساتھ ساتھ فلائٹ سیفٹی کو فروغ دینے کے لیے کیپٹن روی دھیر میموریل گولڈ میڈل بھی پیش کیا۔

بہترین گرین پریکٹس 2023 کی سی این ایس ٹرافی بالترتیب صنعتی اور غیر صنعتی زمروں میں نیول ڈاکیارڈ، وشاکھاپٹنم اور آئی این ایس تونیر کو دی گئی۔ سی این ایس نے آپریشنل یونٹوں اور ساحلی اداروں کو ان کی گزشتہ سال کی شاندار کارکردگی کے لیے یونٹ سائیٹشن  سے بھی نوازا۔ ہندوستانی بحریہ کے بحری جہاز بیتوا، ست پورہ، ستلج اور نیریکشک، کلوری کلاس آبدوز آئی این ایس کرنج کے ساتھ آئی این اے ایس 321 ایف ایس ایس اور آئی این اے ایس 318 نے یونٹ سائیٹیشن حاصل کیا۔ اسٹور اسٹیبلشمنٹ کٹیگری میں، ایوارڈ حاصل کرنے والے آئی این ایس انڈیا، تاناجی اور ولسورا، اور میٹریل آرگنائزیشن (وشاکھاپٹنم) شامل تھے۔

تقریب میں ایوارڈ حاصل کرنے والوں کی اہلیہ اور اہل خانہ کے ساتھ ساتھ ہندوستانی بحریہ کے سینئر معززین نے بھی شرکت کی۔ سی این ایس نے ایوارڈ یافتگان کو ان کی بہادری اور ممتاز خدمات کے لیے سراہا اور بحریہ کے اہلکاروں کی حمایت پر ان کے اہل خانہ کا شکریہ ادا کیا۔

بحریہ کے اہلکاروں کے رول کی اہمیت پر زور دیتے ہوئے، سی این ایس نے کہا کہ ’’جس طرح ہندوستانی بحریہ اپنے قومی بحری مفادات کے تحفظ، فروغ، تعاقب اور تحفظ کے لیے اپنے آپریشنل اقدامات کررہی ہے، یہ غیر متزلزل پیشہ ورانہ مہارت ہے جو ہمارے عملے کے حوصلوں کو ٹوٹنے نہیں دیتی اور جو ہمیشہ اور ہر وقت کامیابی کو یقینی بناتی ہے۔‘‘

******

ش ح۔ م م۔ م ر

U-NO.5686

(Release ID: 1928903) Visitor Counter : 103