مرکزی وزیر داخلہ اورامداد باہمی  کے وزیر جناب امت شاہ نے آج نئی دہلی میں وزارت داخلہ کے سینئر افسران کے دوسرے ‘‘چنتن شیور’’ کی صدارت کی۔ چنتن شیور کا مقصد وزارت کے سینئر افسران کے ساتھ بات چیت کرنا اور وزیر اعظم جناب نریندر مودی کے‘ وژن 2047 ’کے نفاذ کے لیے ایک ایکشن پلان تیار کرنا تھا۔

وزیر داخلہ نے انسداد دہشت گردی اور بنیاد پرستی، اندرونی سلامتی، سائبر اینڈ انفارمیشن سیکورٹی، نارکوٹکس، ڈیزاسٹر مینجمنٹ اور غیر ملکیوں سے متعلق مختلف امور کی کارکردگی کا جائزہ لیا۔ انہوں نے آتم نربھر بھارت، مختلف بجٹ اعلانات اور ایم ایچ اے کے اہم زیر التوا مسائل  کی صورتحال کا بھی جائزہ لیا۔ افسران نے وزارت سے متعلق مختلف امور پر اپنی تجاویز پیش کیں۔

'چنتن شیور' میں اپنے اختتامی خطاب میں، وزیر داخلہ نے کہا کہ وزیراعظم جناب نریندر مودی کی قیادت میں، دنیا میں ہندوستان کا مقام تیزی سے بڑھ رہا ہے اور اسے دنیا کے ہر میدان میں پہلا بننے سے کوئی نہیں روک سکتا۔ جناب امت شاہ نے کہا کہ وزارت داخلہ کو چاہیے کہ وہ ایک روڈ میپ تیار کرے اور اس پر عمل کرے تاکہ ویژن 2047 کے اہداف حاصل کیے جا سکیں اور یہ 25 سالہ روڈ میپ یقینی طور پر ہندوستان کو دنیا کا پہلا ملک بنانے میں کامیاب ہو گا۔

جناب امت شاہ نے کہا کہ ہمیں مستقبل کے چیلنجوں کا تصور کرنے اور ان کے پیشگی حل تلاش کرنے کی ہر ممکن کوشش کرنی چاہیے۔ انہوں نے ڈرونز اور مصنوعی ذہانت سمیت جدید ٹیکنالوجی کے استعمال اور غلط استعمال کو روکنے کی صلاحیت کو مزید بڑھانے پر زور دیا۔

مرکزی وزیر داخلہ نے وزارت کے کام کی تعریف کی اور عہدیداروں سے کہا کہ وہ وژن 2047 میں طے شدہ اہداف کو حاصل کرنے کے لیے مزید تندہی سے کام کریں۔ جناب امت شاہ نے زور دیا کہ بجلی کی کھپت کو کم کرنے کے لیے وزارت داخلہ کی تمام دفتری عمارتوں کے لیے زیادہ سے زیادہ شمسی توانائی کی فراہمی کی جانی چاہیے۔

******

ش ح۔ ا ک۔ ج

UNO- 5229