কেন্দ্ৰীয় বন্দৰ, জাহাজ আৰু জলপথ আৰু আয়ুষ মন্ত্ৰী শ্ৰী সৰ্বানন্দ সোণোৱালে আজি অসমৰ যোগীঘোপাত ভাৰতৰ প্ৰথমখন আন্তঃৰাষ্ট্ৰীয় বহুমুখী লজিষ্টিক পাৰ্কৰ নিৰ্মাণস্থলী পৰিদৰ্শন কৰি কাম-কাজৰ অগ্ৰগতিৰ পৰ্যালোচনা কৰে। শ্ৰী সোণোৱালে কয় যে চলিত বৰ্ষৰ ভিতৰত উদ্যানখনৰ জেটি নিৰ্মাণ সম্পূৰ্ণ হোৱাৰ সম্ভাৱনা আছে। কেন্দ্রীয় মন্ত্রীয়ে কামৰ অগ্ৰগতিত সন্তুষ্টি প্রকাশ কৰে কিয়নো চলিত বৰ্ষৰ শেষৰ ফালে পথ আৰু ৰে’ল সংযোগৰ কামো সম্পূর্ণ কৰাৰ লক্ষ্য লোৱা হৈছে৷

এই উপলক্ষে শ্ৰী সোণোৱালে কয়, “উত্তৰ-পূব ভাৰতৰ দ্ৰুত বিকাশৰ বাবে আমাৰ গতিশীল প্ৰধানমন্ত্ৰী শ্ৰী নৰেন্দ্ৰ মোদীয়ে আমাৰ অৰ্থনীতি পুনৰুজ্জীৱিত কৰাৰ বাবে বহু বৈপ্লৱিক পদক্ষেপ গ্ৰহণ কৰি আহিছে। প্ৰধানমন্ত্ৰী মোদীৰ পৰিবহণৰ জৰিয়তে পৰিৱৰ্তনৰ দৃষ্টিভংগীয়ে সমগ্ৰ উত্তৰ-পূব অঞ্চলটোক ইয়াৰ পৰিবহণ নেটৱৰ্কক নতুন ৰূপ দিবলৈ সক্ষম কৰি তুলিছে। এই গুৰুত্বপূৰ্ণ বহুমুখী পাৰ্ক নিৰ্মাণৰ কাম দ্ৰুতগতিত চলি থকাৰ লগে লগে ই ভূটান আৰু বাংলাদেশৰ দৰে চুবুৰীয়া দেশৰ লগতে অঞ্চলটোৰ বাবেও বিশাল সম্ভাৱনা মুকলি কৰাৰ থল আছে। পৰিবহণ ব্যৱস্থাক পুনৰুজ্জীৱিত আৰু সজীৱ কৰি পৰিৱৰ্তনৰ এক দক্ষ আৰু ফলপ্ৰসূ এজেণ্ট হিচাপে পৰিগণিত হোৱাৰ বাবে প্ৰধানমন্ত্ৰী গতি শক্তি নেচনেল মাষ্টাৰ প্লেনৰ কল্পনা কৰা হৈছে। অৰ্থনৈতিক সমৃদ্ধিৰ গতি সুনিশ্চিত কৰাৰ বাবে পিএম গতি শক্তি নেচনেল মাষ্টাৰ প্লেনৰ লক্ষ্য হৈছে সাগৰ আৰু নদী উভয়ৰে উপকূলীয় অঞ্চল শক্তিশালী কৰা। মই সকলোকে এই সুন্দৰ পদক্ষেপত যোগদান কৰি ইয়াক ব্যাপক ৰূপত সফল কৰি তুলিবলৈ আহ্বান জনাইছো।”

চৰকাৰৰ অভিলাষী ভাৰতমালা পৰিযোজনাৰ অধীনত উদ্যানখনৰ উন্নয়ন সাধন কৰা হৈছে৷ অসমৰ যোগীঘোপাত এনএইচআইডিচিএলে প্ৰথম এনে এমএমএলপি নিৰ্মাণ কৰিছে। পাৰ্কখন পথ, ৰে’ল, বিমান আৰু জলপথৰ সৈতে সংযোগ কৰা হ’ব। ব্ৰহ্মপুত্ৰৰ দাঁতিত ৩১৭ একৰ মাটিত এই পাৰ্কখন নিৰ্মাণ কৰা হৈছে।

যোগীঘোপা আৰু গুৱাহাটীৰ মাজৰ ১৫৪ কিলোমিটাৰ দূৰত্ব এই অংশত ফ’ৰলেন পথ নিৰ্মাণ কৰা হ’ব, ৩ কিলোমিটাৰ ৰে’ল লাইনে যোগীঘোপা ষ্টেচনক এমএমএলপিৰ সৈতে সংযোগ কৰিব, বাকী এটা ৩ কিলোমিটাৰ ৰে’ল সংযোগে ইয়াক আইডব্লিউটিৰ সৈতে সংযোগ কৰিব আৰু নতুনকৈ উন্নীত হোৱা ৰূপচী বিমানবন্দৰলৈ যোৱা পথটো সুচল সংযোগৰ বাবে ফ’ৰলেনলৈ উন্নীত কৰা হ’ব।

এই বহুমুখী পাৰ্কত সকলো সা-সুবিধা যেনে-গুদাম, ৰে’লৱে চাইডিং, কল্ড ষ্ট’ৰেজ, শুল্ক নিষ্পত্তি ভৱন, মুকলি এলেকা, ৱৰ্কশ্বপ, পেট্ৰ’ল পাম্প, ট্ৰাক পাৰ্কিং, প্ৰশাসনিক ভৱন, থকা-খোৱা, পানী পৰিশোধন প্লাণ্ট ইত্যাদি থাকিব।

****