অকোইবগী ফিভম অমসুং ঊমংগী মন্ত্রালয়
পাৎশিং কন্নবা খুন্নাইগী মীয়াম পুম্নমক শরুক য়াবা থৌরাং অমা পায়খৎনবা ভুপেন্দ্র যাদবনা তকশিনখ্রে
পাৎশিং অমুক হিঙ্গৎহন্নবা অমসুং অপুনবা ওইনা শেন্নবা রিজনেল কন্সলতেসন ৱার্কশোপ অমা মনিপুরগী ইম্ফালদা পাংথোকখ্রে
Posted On:
29 APR 2023 7:39PM by PIB Imphal
অৱাং-নোংপোক্কী পাৎশিং অমুক হিঙ্গৎহন্নবা অমসুং অপুনবা ওইনা শেন্নবা ইনভাইরোনমেন্ত, ফোরেস্ত অমসুং ক্লাইমেত চেঞ্জনা শীন্দুনা নুমিৎ নিনিগী রিজনেল কন্সলতেসন ৱার্কশোপ অমা এপ্রিল ২৯- এপ্রিল ৩০,২০২৩দা মনিপুরগী ইম্ফালদা পাংথোকখ্রে। মিসন সহভগিতাগী মখাদা পরিং নাইনা পাংথোরকপা রিজনেল ৱার্কশোপশিং(মমাঙদা শ্রীনগর, গৱা অমসুং কোচিদা পাংথোকখ্রে)গী মরীশুবা ওইনা ইম্ফালদা পাংথোকপনি। খু্ন্নাই পুম্নমক অমসুং সরকারগী তোঙান-তোঙানবা মিনিস্ত্রিশিংগী অপুনবা থৌরাং অমগী মখা লৈবাক অসিদা লৈরিবা জাতি অমসুং মালেমগী ওইনা মরুওইবা পাৎ ৭৫ কন্নবা অমসুং মপুংফানা য়েংশিন্নবা মিসন সহভগিতানা পান্দম থম্লি।
মখোয়গী রাজ্যশিংদা পাৎশিং কন্নবা হোৎনবদা মায়োক্নরিবা খুদোংচাদবশিং খঙদোক্নবা অৱাং-নোংপোক্কী রাজ্যশিং হায়বদি অরুনাচল প্রদেস, অসাম, মনিপুর, মেঘালয়, মিজোরম, নাগালেন্দ, সিক্কিম অমসুং ত্রিপুরাগী সাইত মেনেজরশিং অমসুং স্তেৎ ৱেতলেন্দ ওথোরিতিশিংগা ৱার্কশোপ মনুংদা ইনভাইরোনমেন্ত, ফোরেস্ত অমসুং ক্লাইমেত চেঞ্জগী য়ুনিয়ন মিনিস্তর শ্রী ভুপেন্দ্র যাদবগা ৱারি শানখি। য়ুনিয়ন মিনিস্তরনা হায়খি পাৎ অমগী মহৌশাগী অকোয়বগী শক্তম কাইহন্দনা হৈশিংনা পাৎশিং শীজিন্নবা হায়বসি হায়রিবা অকোয়গী ফিবমশিং হিংহন্নবা য়াম্না মরুওইবনি। পাৎশিং ঙাক-শেন্নবা অমসুং কন্নবা তোঙান-তোঙানবা এজেন্সিশিং পুন্না থবক তৌমিন্নগদবনি। হায়রিবা পাৎশিং অসি কন্নবা খুন্নাই পুম্নমক পুন্না চৎমিন্নগদবনি। করিগুম্বা ঐখোয়না পাৎশিং কন্সি হায়রবদি মীওই অমগী লমচৎ-শাজত্তা অহোংবা পুরকপা হায়বসি য়াম্না মরুওই। পাৎশিং কন্নবা মীয়াম শরুক য়াহনবদা মিসন লাইফ অসি য়াম্না মরুওই।
শ্রী যাদবনা হায়খি পাৎশিং কনবা হায়বসি সরকার খক্তগী দাইত্ব নত্তে। পাৎশিং খুন্নাইগী তঙাইফদবা লনশিংনি, ভারতকী মীয়ামগী মহুত্তা হায়রিবা লনশিং অসিগী মপু অমা ওইনা সরকারনা থবক তৌরি। পাৎশিং কনবগী থবকশিংদা করিগুম্বা খুন্নাই পুম্নমক অমসুং চৎমিন্নরিবা লুপশিং শরুক য়াদ্রবদি মশক থোকপা অহোংবা পুরকপা ঙম্লোই।
ৱার্কশোপ হৌদোকপগী থৌরমদা ৱা ঙাংবদা মনিপুরগী চীফ মিনিস্তর শ্রী এন বিরেন সিংহনা হায়খি ৱার্কশোপ অসিদা অৱাং-নোংপোক্কী রাজ্য পুম্নমক শরুক য়াবা অসিদা অপেনবা পোকই। পাৎশিং কন্নবা থবক ওইনা পাংথোকপা য়ারবা ৱাফম কয়া খন্নরে। লোক্তাক পাৎ অসি মন্ত্রো রেকোর্দতগী লৌথোক্নবা অকনবা থবক লৌখৎপা দরকার ওইরে।
ৱার্কশোপ হৌদোকপা থৌরম অদুদা মনিপুর সরকারগী মিনিস্তরশিং হায়বদি কঞ্জুমর এফেয়ার্স, পব্লিক এদমিনিস্ত্রেসন অমসুং পব্লিক হেল্থ দিপার্তমেন্তগী মিনিস্তর শ্রী এল সুসিন্দ্রো, ফোরেস্ত, ইনভাইরোনমেন্ত অমসুং ক্লাইমেত চেঞ্জগী মিনিস্তর শ্রী তি.ঐচ বিশ্বজিৎ সিংহ, লোক্তাক দিবলপমেন্ত ওথোরিতিগী চিয়ারমেন শ্রী মোইরাংথেম অশ্বিনিকুমার সিংহ, মনিপুর সরকারগী ফোরেস্ত, ইনভাইরোনমেন্ত অমসুং ক্লাইমেত চেঞ্জ দিপার্তমেন্তগী এদিসনেল চীফ সেক্রেতরি শ্রী এম.ঐচ খান শরুক য়াখি। মনিপুর সরকারগী পি.সি.সি.এফ অমসুং ঐচ.ও.এফ.এফ দোক্তর এ.কে জোসি অমসুং ইনভাইরোনমেন্ত, ফোরেস্ত অমসুং ক্লাইমেত চেঞ্জ মিনিস্ত্রিগী জোইন্ত সেক্রেতরি দোক্তর সুজিৎ কুমার বাজপায়না লুচিংদুনা খন্ন-নৈনবশিং পাংথোকখি অমসুং পাৎশিং কন্নবা থৌরমশিং থবক ওইনা পায়খৎনবা রাজ্যশিংগা অকুপ্পা ৱাফমশিং খন্নখি।
য়ুনিয়ন মিনিস্তরনা ‘ভারতকী পাৎশিংগী নাৎকী মরুওইবশিং’ মিংথোনবা চেফোঙ অমা ফোঙখি। পাৎশিংগী নাৎকী মরুওইবশিং, মহৌশাদগী লৈরক্লবা লৌশিং, মফম অদুগী মীয়ামগী থাজনবী, কুহ্মৈশিং, মীয়ামগী থবক-থৌরমশিং অমসুং পাৎশিংগা মরী লৈনবা ফুঙ্গা ৱারিশিংগী মতাংদা চেফোঙ অদুদা য়াওখি।
ৱার্কশোপ অদুগী অহানবা শরুক্তা, রাজ্যশিংনা মখোয়গী পাৎশিংগী ফিবম কন্নবা পায়খৎলিবা থবকশিং, মাইপাকপা অমসুং থেংনরিবা খুদোংচাদবশিংগী মতাংদা পাউদমখি। পাউদম্বা অদুদা মরুওইনা পাৎশিংগী ফিবম, পাৎশিংগী মশিং, চে-চাংশিং শেম-শাবা, থৌরাং শেম-শাবা, পাউ ফাওনবা অমসুং মীয়ামগা শম্নবা থবকশিংগী মতাংদা ফোঙদোকখি।
লায়রবা মীওইশিং শিন্মী ওইনা শীজিন্নদুনা অকোয়বগী ফিবম কাইহন্দনা হৈক্রক মগুন হেনগৎহন্দুনা পোৎথোকশিং পুথোকপগী মতাংদা সনাতন ধর্মা কলেজ, কেরলাগী অনুপ কুমারনা শন্দোক্না তাকখি। ৱার্কশোপকী অনিশুবা শরুক্তা পেনেল দিক্সসন অহুম পাংথোকখি। অহানবদা অমৃত ধারোহর অমসুং মিসন লাইফ হায়বা হিরমদা পাংথোকখি। অনিশুবদা সেভ ৱেদলেন্ত কেম্পেন থবক ওইনা পাংথোকপা হায়বা হিরমদা খন্নখি। অহুমবদা ইন্তেগ্রেতেদ মেনেজমেন্ত প্লানশিং থৌরাং তৌবা অমসুং থবক ওইনা পায়খৎপদা থেংনরিবা খুদোংচাদবশিংগী মতাংদা খন্নখি। ৱার্কশোপ অসিগী নিনি চনবা নুমিৎ এপ্রিল ৩০,২০২৩দা য়ুনিয়ন মিনিস্তর শ্রী যাদবনা ৱার্কশোপ শরুক য়ারিবশিংগা লোয়ন্না লোকতাক পাৎ য়েংগনি।
*****
(Release ID: 1920815)
Visitor Counter : 124