কেন্দ্রগী গৃহ মন্ত্রী অমসুং কোওপরেসন মন্ত্রী, শ্রী অমিত শাহনা ঙসি মিজোরমগী কোনুং আইজোলদা লুপা করোর ২৪১৫গী চাউখৎ থৌরাংগী থবকশিং শঙ্গাখ্রে। মিজোরমগী মুখ্য মন্ত্রী, শ্রী জোরামথাঙ্গা য়াওনা দিগ্নিতরী কয়ানা ঙসিগী থৌরমদা শরুক য়াখি।

শ্রী অমিত শাহনা মহাক্কী ৱারোলদা অসম রাইফল্সকী অনৌবা বত্তালিয়ন হেদক্বার্তর অমা ঙসি মফমসিদা শঙ্গাবা অসিনা মরম ওইরগা ঙসিগী নুমিৎ অসি মিজোরমগী য়াম্না মরু ওইবা নুমিৎ অমনি হায়খি। মসিগা লোয়ননা, রাজ্য অসিগী চাউখৎ-থৌরাংগীদমক্তা মিজোরম সরকারদা লম খুৎশিন্ননবগীদমক্তা গৃহ মন্ত্রালয়, অসম অমসুং মিজোরম সরকারগী মরক্তা খুৎয়েক পীনরিবা এম.ও.য়ু. অসিনা চাউখৎ-থৌরাংগী অনৌবা খুদোংচাবা কয়া পুরক্লগনি। লালদেঙ্গা লাম্মেৱাল সেন্তরগী উরেপ উয়ুংসু ঙসি তম্লে অমসুং মসিনা মফমসিদা য়াম্না ফবা কলচরগী সেন্তর অমা পীরগনি হায়না শ্রী অমিত শাহনা হায়খি। প্রধান মন্ত্রী শ্রী নরেন্দ্র মোদীনা লুচিংবা কেন্দ্র সরকার অমসুং মিজোরম সরকারনা রাজ্যসিগী মীয়ামগী সেবাগীদমক্তা খোঙফম চেৎলি অমসুং মাইকৈ অসিদা থাংজিনবা খোঙথাং অমা ওইনা, লুপা করোর ২৫০০গী শেনফমগী স্কিম ১১ ঙসি শঙ্গাবগা লোয়ননা উরেপ উয়ুংসু তম্লে হায়না মহাক্না হায়খি।

মিজোরম্বু হীরম খুদিংদা চাউখৎহন্নবগীদমক্তা লুপা করোর ১২০০গী অনৌবা রোদ প্রোজেক্ত ৪সু ঙসি শঙ্গারে অমসুং মসিনা মিজোরমগী ত্রেদ অমসুং ইন্দস্ত্রীগা লোয়ননা ম্যানমারগা লৈনরিবা লল্লোন ইতিক্কী মরীসু মশক থোক্না হেনগৎহনগনি হায়না কেন্দ্রগী গৃহ মন্ত্রী অমসুং কোওপরেসন মন্ত্রী, শ্রী অমিত শাহনা ঙসি হায়খি। চৎলিবা চহি অসি মিজোরম শেমখিবা অমসুং স্তেতহুদ ফংবগী ৩৬শুবা চহিনি অমসুং রাজ্য অসিনা মতমশিং অসিগী মনুংদা প্রোগ্রেস কয়া লৈরে হায়না মহাক্না হায়খি। তংদু লৈতাদবা অমসুং নোংমৈ কাপ্পগী মখোলনা থনবা মতম অমা লৈরম্মি, অদুবু শ্রী জোরামথাঙ্গানা ঙসিদি মুখ্য মন্ত্রী ওইরে, মসিদি ভারতকী গনতন্ত্রগী মায় পাকপগী নিংথীরবা খুদম অমনি হায়না শ্রী অমিত শাহনা হায়খি। কেন্দ্রগী গৃহ অমসুং কোওপরেসন মন্ত্রীনা হিংশাগী থবক্কা মরী লৈনবা অৱাং নোংপোক লমদমগী লুপশিংনা মীয়ামগী পুন্সিদা লাক্নবা, গনতন্ত্রগী পথাপকী শরুক অমা ওইনবা অমসুং ভারত অমদি অৱাং নোংপোক লমদমগী চাউখৎ থৌরাংদা তেংবাংবা হায়খ্রে।  মিজোরমদা ঙসি শান্তি লৈরিবসি ভারতকী গনতন্ত্রগী মায় পাকপগী মমাংদা অমুক্তা থেংনখিদ্রিবা খুদম অমনি হায়না মহাক্না মখা তাখি।

প্রধান মন্ত্রী শ্রী নরেন্দ্র মোদীগী লুচিংবা সরকার অসিগী মখাদা অৱাং নোংপোক্কী অপুনবা রাজ্যশিংনা শান্তি লৈবা, তংদু লৈতাবা অমসুং চাউখৎ-থৌরাংগী অনৌবা লম্বী অমদা ঙসি চৎলি হায়না শ্রী অমিত শাহনা হায়খি। অৱাং নোংপোক লমদমগী লালহৌলুপশিংনা মতম অমদা হিংশাগী থৌদোক কয়া থোকহল্লম্মি, অদুনা রেল, রোদ অমসুং এয়র কন্নেক্তিবিতী য়াম্না ৱাৎলম্মি, চাউখৎপগী মমি তারমদে হায়না মহাক্না হায়খি। অদুবু, প্রধান মন্ত্রী শ্রী নরেন্দ্র মোদীগী লুচিংবা সরকার অমসুং অৱাং নোংপোক লমদমগী মীয়াম্না তেংবাংবদগী অৱাং নোংপোক লমদম অসিদা মমাংগী চহি ৯দগী শান্তি লৈরে, কন্নেক্তিবিতী হেনগৎলে অমসুং ভারতকী অতোপ্পা মফমশিংগা মান্ননা চাউখৎলে। প্রধান মন্ত্রী শ্রী নরেন্দ্র মোদীগী লুচিংবা সরকার অসিনা অৱাং নোংপোক লমদম্বু ইরাং লৈতবা, লালহৌলুপ লৈতবা অমসুং শান্তি লৈবা মফম ওইহল্লে হায়না শ্রী অমিত শাহনা হায়খি।

কেন্দ্রগী গৃহ মন্ত্রী অমসুং কোওপরেসন মন্ত্রী, শ্রী অমিত শাহনা ইং ২০১৪গা চাংদম্নরুবা মতমদা, হিংশাগী থৌদোক থোকপগী চাং ৬৭% হন্থরে, সেক্যুরিতী ফোর্সশিংদা মীশি-মীনা থোকপগী চাংনা ৬০% হন্থরে অমসুং মীচমগী পুন্সি মাঙবগী চাংনা ৮৩% হন্থরে হায়না ফোংদোকখি। ইং ২০১৪দগী হৌজিক ফাওবদা, অপুনবা অৱাং নোংপোক্কী লালহৌলুপ কয়াগী কেদর ৮০০০ রোম্না খুৎলায় থাদোক্তুনা মীয়ামগী পুন্সিদা তিনখ্রে হায়না মহাক্না হায়খি। প্রধান মন্ত্রী শ্রী নরেন্দ্র মোদীনা লুচিংবা সরকারনা ইং ২০১৯দা ত্রিপুরাদা এন.এল.এফ.তি.গা য়ানচে অমগী খুৎয়েক পীনখি, ইং ২০২০দা ব্রু এক্কোর্দকী খুৎয়েক পীনদুনা চাউরাকপা মীওই ৩৭,০০০বু ত্রিপুরাদা রিহেবিলিতেত তৌখি হায়না মহাক্না হায়খি। সরকার অসিনা ইং ২০২১দা বোরো একোর্দকী খুৎয়েক পীনদুনা অসমদা শান্তি পুরকখি অমসুং ইং ২০২২দা কার্বী আংলোং এক্কোর্দকী খুৎয়েক পীনদুনা অপ্পর অসমদা য়াম্না মরু ওইবা খোঙথাং পায়খৎখি। এ.এফ.এস.পি.এ.গী মনুংদা লৈবা মফমশিংসু মমাংগী চহি ৯গী মনুং অসিদা ৭০%গী মখাদা লৈখ্রে হায়না শ্রী অমিত শাহনা হায়খি।

শ্রী নরেন্দ্র মোদীজীনা অৱাং নোংপোক্কী চাউখৎ থৌরাংগীদমক্তা খোঙফম চেৎলি অমসুং মহাক্না প্রধান মন্ত্রী হেক ওইখিবদগী হৌজিক ফাওবদা, অৱাং নোংপোক লমদমদা ৫৩লক চৎখ্রে, মসিগুম্বা থৌওং পাংথোকপা অহানবা প্রধান মন্ত্রীদি মহাক্নি হায়না শ্রী অমিত শাহনা হায়খি। মহাক্কী পাউতাক্কী মখা পোন্না, ভারত সরকারগী মন্ত্রীশিংনা অৱাং নোংপোক লমদমদা ৪৩২রক চৎখ্রে হায়না মহাক্না মখা তানা হায়খি। প্রধান মন্ত্রী শ্রী নরেন্দ্র মোদীনা লুচিংবা সরকারনা পি.এম.-দি.ই.ভি.আই.এন.ই.গী খুত্থাংদা অৱাং নোংপোক্কী বজেৎপু ২৭৬%কী চাংদা হেনগৎখ্রে, মহাক্কী লুচিং মখাদা অৱাং নোংপোক্কী রাজ্য নিপানবু ইং ২০২৫গী মমাংদা লুপা করোর ১,৭৬,০০০গী শেনফম চঙদুনা রেল, রোদ অমসুং এয়র কন্নেক্তিবিতী লৈহল্লগনি হায়না মহাক্না ফোংদোকখি। মিজোরম্না চাউখৎপা রাজ্য অমা ওইবগী য়াম্না চাউবা মতিক লৈ অমসুং , মরু ওইনা, শ্রী জোরামথাঙ্গানা মিজোরমগী মুখ্য মন্ত্রী ওইরবা মতুংদা মিজোরমগী শেন্মিৎলোনগী ফিভম য়াম্না ফগৎলে অমসুং মমাংগী দিকেদতা জি.দি.পি.না চাংচত্তা ১২.১৫% হেনগৎখি  হায়না শ্রী অমিত শাহনা হায়খি। কলাদান মলতিমোদেল ত্রাঞ্জিত ত্রান্সপোর্ত প্রোজেক্তনা মিজোরম অমসুং ম্যানমারবু শম্নহনগনি অমসুং মসিনা কারবারগী মশক থোকপা খুদোংচাবা কয়া মিজোরমগীদমক্তা হাংদোক্কনি হায়না মহাক্না পাউদমখি। ৱা থাবা অমসুং সোলর ইনর্জীগী মতাংদা খুদোংচাবা কয়া ফংহন্নবগীদমক্তা ভারত সরকারনা পায়খৎফম থোকপা থবক খুদিংমক পায়খৎকনি হায়না মহাক্না ফোংদোকখি।

*****